Read Hadiyya Issaayyaas Kitaaba 27 Bible Online

Issaayyaas Kitaaba 27 - Hadiyya bible

Issaayyaas Kitaaba 27

¹Ee balla Waa'i bararoo hamashshichcho Leewaataana xaaxamoo xarakkichcho Leewaataana lob qoxxaalli qare'aalli bisa'inne guzumo'ookko. Dambalaq woro'l lob moochchichchom muransookko.

²Ee ammane Waa'i «Doo'llamaakkoo i woyi'n beyyina zammallehe.

³An Waa'i ixxo egeraancho; hundi ammanem wo'o agisoommo; ee bikkina ayyim hawwodooyyo; ballaa hiimom egeroommo.

⁴Od i woyi'n beyyonne an quuqoommoyyo; uttii halluttii hee'uta'n an ee keeno xoqolansoommo; giirinne shokkiisaa bi'isoommo.

⁵Ee beelas ixxuwwi waatta'a i beyyonne maaxantona; iinninne xumma qooccitona; eeyya, iinninne xumma qooccitona» yoolla.

⁶Waaroo doollenne Yaaqoob nigga issookko; Isra'eelim latookko; fiitookkome; ixxuwwi mishim uulli hundannem wo'mmookko.

⁷Waa'i Isra'ee'l diina'a guzumo'ukkisa Isra'eela guzumo'ukkoyyo. Ixxuwwi diina'i beedduqaxa ixxuwwi beedditahinnehe?

⁸Waa'i ixxi minaadaba qeefadantamisa issaa guzumo'ukko; eelliinchi fi'l malaayyaam hambu'llamisam binnaa'ukko.

⁹Ee bikkina Isra'ee'l oos ixxuwwi baaxiilina haafite siiddeena xantamok mulli minaadaphphi kiti'm beyyuwwa boorjo'isa liitta'ahii aduruusa wiriissakkam beyyuwwaa Asheer misilluwwaa bi'issolasettee. Oohim ixxuwwina baaxiilo sabimmi mish ihookko.

¹⁰Girbamaakkoo beero'i gindamaakko; leexa'am gataa udma'i uulli ihaakko; diinat allaa'lloo beyyi ihu bikkina eekke'enne adduwwi haqqi buyya itukkuuyyi gii'mmookko.

¹¹Haqqi caaffuwwi gogaa iiqamookko; meentim giirina wixxaa'ookko. Ixxi minaadab qoossubee'i bikkina Qooccukkok ixxuwwina qishixxooyyo. Baxukkokim haafooyyo.

¹²Ee balla Efiraaxiis daajjiinsi ki'isaa Gibxi uulli tochchi gogaalli daajji afeebe'e Waa'i hurbaata ganookko. Isra'ee'l oosom matim gatoo'n wixxaa'ookko.

¹³Ee ammane kee'mmaalli xurumbi fugamookko. Aasoo'l uullanne bi'lla'a hee'llo'i keenii Gibxi uulla gibba'a matta'a hee'llo'i keenii waatta'a keesammi duunanne Yerusaaleemanne Waa'ina otossitamo.