Read Hadiyya Issaayyaas Kitaaba 28 Bible Online

Issaayyaas Kitaaba 28 - Hadiyya bible

Issaayyaas Kitaaba 28

¹Efiree'm dimbaanina bolxoo'm mare'i ihu, harish cebbiinsi hanaan hee'oo lombi wereeggi ihaa quubaakkoo fiitinaa woyi'n diqaasinaa kaa'amaakkoo kee'n beero'ina aayye.

²Oono'o, Waa'i wodaamoo malaayyaamoo ihaakkoo mat mancho gudisaakko. Oo manchim wiisho'aam baraxxisa, iiqansoo humbu'llamisaa malaayyaam dirisisaa ixxuwwa xoqolaa uullanne ubbuusookko.

³Efiree'm dimbaa'nneka bolxoo'm mare'e lokkinne hancaacamakkamo.

⁴Harish cebbiinsi hanaan yoohan ihaa lombi wereeggi fiit giggiraa gaassaa mishu oda'i mishisa ihookko. Eeham manni moo'aa feeraa itoohaannisa.

⁵Ee ammane Gogoxxi Moollanni Waa'i gatto'i ixxi minaadabina adilla'n lombi mare'ee wereeggi laakkaa ihookko.

⁶Ee ammane oogataanina hanqa oogattam qoorooma, diina'iinsi beero'i ooxxi gooca egettam keeninam malaayye uwwookko.

⁷Hiraagaanii qeessuwwii dimbita'a tartartamuulla; woyi'n diqaasaa dimbisoo mulli aggaa aggo'i bikkina tiiro huushsha'a qo'llitamuulla. Hiraagaan lobakata dimbito'i bikkina Waa'i ixxuwwina moo'isu kaalta qoossitamoyyo. Qeessuwwim lobakata dimbito'i bikkina ixxuwwi hincoo quuxxuwwanne hanqo'isinne oogatteena xantamoyyo.

⁸Hurbaata ittam leemaat hundim uwwinne wo'mmaakko; uwbee'i muccur beyyi hore'em bee'e.

⁹Ixxuwwim iina «Ku manchi ayye losiseena hasoolla? Ixxi asso la'isoollakdu ayyenatte? Ixxi losan awwaadookkok anuuna utto'i oos xale'inatte.

¹⁰Ijaajonne ijaajo, ijaajonne ijaajo. Seeranne seera, seeranne seera; hoffoka keyye hoffokam odim ekke'e» yitamuulla.

¹¹Eehan ihulas Waa'i mulli uulli suuminnee la'akkambee'i sagarinnee ka minaadabina wocookko.

¹²Ixxi «Kuk usheexxaxxi beyyo; hoogukkok usheexxona. Kuk hore'em usheexxakkam beyyo» yaa hee'ukko. Ihukkaarem ixxuwwi ixxo macceesimma sabbo'o.

¹³Ee bikkina laso matta'a ubbona, iiqantona, qaashanne amadantonaa qeefadantonaa Waa'i sagar ixxuwwina ijaajonne ijaajo, ijaajonne ijaajo, seeranne seera, seeranne seera hofqax keyyenne hofqax odim ekke'enne ihookko.

¹⁴Yerusaaleemanne yoo minaadaba gassitakkam ka naacantakkam keeno, Waa'i sagara macceessehe.

¹⁵Ki'nnuwwi «Lehinne hidi'l sagara aangaammo; Si'oolinnem hide'ammaammo; ee'isam qophphano girbisa, qawwiishsham mi'nnisa issinummi bikkina kee'mmaalli booban waaroo ammane neese afoo'nnim higookko» yitakka'a neeyyato issitakko'ookko

¹⁶Ee bikkina Hundam xanoo Waa'i «Oono'o, shooho'ina ihoo qoxxaalli kina Xiyoonanne dissoommo. Oo kinim keenancha higaakkoohane; lamejjina ihoo lombi kina; ixxonne amma'nnookkok ayyim tuurooyyo.

¹⁷Ee ki'nnek keennanchi hanqa; tumbe'im muccurooma» yoolla. «Niina girba» yitakka'a amma'nnantakkam qophphano wiisho'aam barad agookko. Maaxantakkam beyyuwwam diris agookko.

¹⁸Lehinne aaggakko'i hidi'l sagar gindamookko. Si'oolinne hide'antakko'okim gatookko. Kee'mmaalli booban waaroo ammane bi'llakkamo.

¹⁹Oo booban waaru amman hundam aphphisookko; darina darinaa ballannee hiimonnee waaru amman hundam aphphisookko. Kaka qoossitakkam ammane ki'nnuwwi dambaqqakkamo.

²⁰Kobi'llishshanne gundi ara'anne iinse'aa lokko fidiixximma hoogukko; weyyakki gundi ihu bikkinam orachcho ifiisimma hoogukko yamamoo manchisa ikkakkamo.

²¹Waa'i Pharaaxiim duunannee Gaba'oo'n cebbannee issukkisam ihaa la'oobee'i luwwaa hore'em koyyiinchi ihaakkoo luwwaa isseena odim ki'ookko.

²²Kabadem Gogoxxi Moollanni Waa'i uulla hundoomam bi'seena qoodukkisa macceesaammo. Ee bikkina hawwi ki'nnuwwi hanenne qoxxoobee'isa an ki'nnuwwina kuroommi sagaranne naacancha ullehe.

²³An ki'nnuwwina kuroommi luwwa macceessehe; i woshsham qoossehe.

²⁴Abuullaanchi wixeena hundi ammanem abuulloohonnihe? Te'im hundi ammanem dimara iiqukkuuyyii wereeggukkuuyyii hee'oonnihe?

²⁵Uulla axisaa abuullaa lasage heemachchi enjaa kosarataa, soo'oo arasaa mulli keeno hundamii beyyo beyyonnem wixooyyonnihe?

²⁶Ee lachcham ixxi Waa'i ixxena losisookko; la'isookkome.

²⁷Heemachchi enjam ihukko kosarata ganeena ganakkam luwwi hundamii faraxxi gaare'ee awwaaxxooyyo. Ee keeno hundam hoffi biccichcha'inne ganookko.

²⁸Hundi ammanem ganukkuuyyi daabbo'i arasa bi'isooyyo. Hurbaata ganoo faraxxi gaare'inne hurbaat bi'oo'n ganimma la'ookko.

²⁹Oo hundim ihookkok sogitaninnee maalalsiisoo qooroominnee la'amaakkoohan ihu Gogoxxi Moollanni Waa'iinsette.