Read Hadiyya Issaayyaas Kitaaba 29 Bible Online

Issaayyaas Kitaaba 29 - Hadiyya bible

Issaayyaas Kitaaba 29

¹Daawiit wiiddanaa hee'u Ari'eela[2] yamamoo Yerusaalee'm beero'ina aayye! Hiinchi hiinchonne exxona. Ugudduwwi hiincho hiinchonne lonsamona.

²Ihukkaarem an Waa'i Ari'eel beero'o u'nnisoommo. Eekke'enne kichchechchii laachchii ihookko. Beero'oomim xiiginne iffiisamu kiti'm beyyisa ihookko.

³Ixxi kululleetannem wiiddanoommo; qash kululleetam kibbaa u'nnisoommo. Qoto'akka'a egerakkam beyyuwwam baxoommo.

⁴Sholle'llootto; buchchanne afuuttaa woccootto. Buchchiinsi hoogaakkoo sagar macceesamookko. Ki sagar uulliinsi firoo wiiddi saga'llisa firookko. Buchchiinsi firaa ki sagar laarookko.

⁵Ihukkaarem dut ki diina'i silliqammi di'llisa, dut mogaalli keenim fii'amoo bura'isa ihookko.

⁶Gogoxxi Moollanni Waa'i gugitano, uulli huxechcha, kee'mmaalli sagara, humbu'llama, wo'i mooraa itoo giiraa dangonne ki diina'anne asse'aa keese gatiisookko.

⁷Ari'eela ixxi girbuwwinnem qasaa u'nnisoo mulli uulli dut minaadab haqaawwisaa diriironne mo'amoo kaaltisaa ihookko.

⁸Xiyoo'n duuna qasseena wixxitam adilluwwi hundim haqaawwonne itukkuuyyi garaa dara baqoohaare maham itubee'i sibaaraanchi ihukkisaa ee'isam hiimo haqaawwonne agukkuuyyi garaa dara baqoo ammane leella'i wo'i xeebe'u manchisaa ikkamo.

⁹Gawwuwwaa qooqquwwaa ikkehe. Woyi'n diqaasa maham aggakkoo'nnim dimbehe. Dimbisoo agga maham aggakkoo'nnim tartari'llehe.

¹⁰Waa'i kee'mmaalli diriichcha ki'nnuwwanne eddeesu bikkina ki'nnuwwi hiraagaan ille iffiissakko'ookko. Ki'nnuwwi kaalta moo'llakkam keenim horoore iffiissakko'ookko.

¹¹Hundem hiraaqqi saga'llekim tirat ki'nnuwwiinsi daphphaa koobamu kitaabisa ihookko. Ki'nnuwwim ixxo qananaa'oo manchi beyyo massitakka'a «Kaka niina qananaa'e» yitakka'a xa'mmitakkota'n «Koobammi ihu bikkina qananaa'eena xanoommoyyo» yaa dabarookko.

¹²Odim qananaa'aa xanoobee'i manchi beyyo massitakka'a «Kaka niina qananaa'e» yitakkota'n ixxi ki'nnuwwina dabaraa «An qananaa'eena xanoombee'ane» yookko.

¹³Waa'i «Ku minaadab xale'i suuminne eese lonsoolla. Ihukkaarem wodanoom iinniinsi qee'llaakkoohane. Manni uullisaakkoo seeraa ogoraa losissu'uuyyi kora'am iina otossitamuulla.

¹⁴Ee bikkina maalalsiiso aganna hanem eebimminne ku minaadab maala'lloo'isa isoommo. Qoolluwwi kee'n qooroomim bi'ookko; qoossitam kee'n hindiyyaatim xadamookko» yoolla.

¹⁵Ixxuwwi sawwite Waa'iinsi daphphaa'lleena xillanne dillitam keenina, tuunsonne baxxo'okam «Ayyi moo'ookko? te'im ayyi la'ookko?» yitam keenina aayye!

¹⁶Ki'nnuwwi hundem luwwam dabaransitakkamuulla. Hara baxoo manchi hariinsi lophphooyyonnihe? Mat baxamu luwwi baxukkoka «At eese baxxittoyyo» yoohonnihe? Te'im ha'l mu'ut hara baxaanchina «At maha baxxooda'e laqqoobee'ane» yoohonnihe?

¹⁷Liibaanoos uulli hurbaata uwwoo harish uullanne daba'lleena, hurbaata uwwoo harish uullim doomanne daba'lleena hofqax ammanim gataakkoollayyonnihe?

¹⁸Ee balla gawwuwwi kitaab sagariinsi macceessamo. Tuunsonne hee'llam qooqquwwim illi fooqaa moo'llamo.

¹⁹Maashshaalli keenii hawwita'a hee'llam keenii Isra'ee'l keesammi Waa'anne odim liirantamo.

²⁰Mogaalli keenii naacantam keenii bi'llamo; jora issitam keen hundim beedditamo.

²¹Manna woshshanne aagisimminne damigaan issitam keeno, kasasamu manchom oogaxxi dummichchanne hawwoddam keenoo qophpha'n naqaashinne muccur keen hanqo'i oogato siiddambee'isa qophphano naqqassam keenoo hundam Waa'i bi'isookko.

²²Ee bikkina Abrihaama gatisu Waa'i Isra'ee'l minaadabina «I minaadaba, kanniinsi eehid sholle'nnii tuullii ki'nnuwwanne ihooyyo.

²³I angi bax ihu ixxuwwi ooso ixxuwwi lambe'enne moo'lla'a i summa maasse'llamo. Isra'ee'l keesammi ihummi eese lonsitamo; i illagennem baddimminne uullitamo.

²⁴Ee ammane qawwuwwi keen qoossimma siiddamo. Hundi ammanem quunquuntam keenim losano siiddamo» yoolla.