Read Hadiyya Issaayyaas Kitaaba 3 Bible Online

Issaayyaas Kitaaba 3 - Hadiyya bible

Issaayyaas Kitaaba 3

¹Oono'o, Gogoxxi Moollanni Waa'i minaadab bakke'llam luwwi hundam Yerusaaleemiinsii Yihudiinsii bi'isookko. Ixxuwwika hurbaata, wo'o,

²geedduwwa, gaadaano, daannuwwa, hiraagaano, gennaano, lommanna,

³o'l awwonsaano, sogaano, kiiraanoo qoolluwwaa bi'isookko.

⁴Li'oo keenoo umuranne hoffi oosoo awwonsaan issookko.

⁵Mat mulleka wor amadookko; beshichchi beshichchonne ki'ookko. Woraadichchi lommancho lonsooyyo; gadamaa hee'oo manchim lombaam manchonne bolxookko.

⁶Mat abaroos ixxuwwi abbaayyuwwiinsi mato doo'llita'a «Kiina mulli luwwi bee'ukkaarem edde'lloo luwwi yoo bikkina niina awwonsaanchi ihe; gindamu luwwim ki gassi woronnette ihona» yitamo.

⁷Ihukkaarem ixxi sagara iimaa'aa ee balla «I minennem hurbaatii eddechchii bee'i bikkina ki'nnuwwina maham isseena xanoommoyyo; ee bikkina eese awwonsaanchi issitakkotte» yaa dabarookko.

⁸Yerusaaleem tartaroolla; Yihudim ubeena hincaakko; mashka'oomim ixxuwwi woccam wocinnee baxxam baxinnee Waa'a quuqissa'a ixxeka lomba sholliisso'ookko.

⁹Ixxuwwi illi kolli ixxuwwi bikkina naqqasookko; Soddo'm mannisa baaxiilo maaxxoo'n ilbiiroom woccamo. Ixxuwwi gaganne bichcha eebaqqito'oo bikkina aayye!

¹⁰Er baxika bito siixxitam bikkina muccur keenina «Maasse'antakko'oo keeno» yi'llehe.

¹¹Ihukkaarem baaxiilaanina aayye! Ixxuwwi baxika bito siixxitam bikkina ixxuwwanne bichchi afookko.

¹²Woraad i minaadaba wor amaddamo; meentim gassitamo. I minaadaba, ki'nnuwwi awwonsaan ki'nnuwwa huushisso'ookko; mattakkam googiinsim dabatto'ookko.

¹³Waa'i oogato'ina ki'aakko; ixxi minaadabannem oogateena gudaakko.

¹⁴Ee bikkina minaadaphphi awwonsaanoo lommannaa oogaxxi beyyonne hincaa'aa «Woyi'n kaashshi beyyo bi'issakko'ookko; buxiinsi boggakko'i amaxxam ki'nnuwwi minenne wonshitakko'ookko.

¹⁵I minaadaphpheka malaayye iiqqakkeenaa buxa boggakkeenaa xantakkamoyyo. An gogoxxi Moollanni Waa'i kaka wocaammo» yukko.

¹⁶Waa'i «Yerusaalee'm meenti bolximma lonsito'ookko; gaanje qeeraa'llisamukkuuyyi illinne qaqqasamookko; taakko annanni issamaa lokki guma'a chilchiyyeesamukkuuyyi cenqellamaa taakke'amookko.

¹⁷Ee bikkina ixxuwwi horoor boronshoo'isa issoommo; ixxuwwi orachchim maxaramookko» yukko.

¹⁸Ee balla Waa'i Yerusaalee'm meentika lokki guma'a, horoo'l shaashsha, agana laboo gaanji wereegga,

¹⁹macci gutichcha, angi guma'a,

²⁰illenne gunguu'llakkam shaashshaa, idaayyuwwi gunguu'lloo shaashsha, cora, sabbata, shitto'i xaarmuusa, kitaaba,

²¹angikaa sa'nnekaa guma'a, uguxxi eddechcha,

²²lombi eddechcha, kaabba, angi borsa, gagmoo'ixxa,

²³talbi danaam fati'l eddechcha, horoorenne ka'llakkam wereeggi luwwaa afo'aam shaashshuwwaa hundam bi'isookko.

²⁴Ee bikkina ixxuwwanne shitto'i bikkenne bob, sabbaxxi bikkenne us, horoo'l haabbi bikkenne boronshi, qamis bikkenne xiddi eddechchi, da'n bikkenne mateenchi ihookko.

²⁵Ki'nnuwwik woraad bisa'inne geedduwwim orinne beedditamo.

²⁶Yerusaalee'm gooccuwwi kichchechchinne wi'llitu'uuyyi afuutto'i meentichchosa leexa'aa gatookko.