Read Hadiyya Issaayyaas Kitaaba 30 Bible Online

Issaayyaas Kitaaba 30 - Hadiyya bible

Issaayyaas Kitaaba 30

¹Waa'i «Ijaajantambee'i oosina aayye! Iihan ihubee'i sawwite awwontamo; i doo'llinsetti ihubee'i hidi'l sagara aagimminnem baaxiilonne baaxiilo eddamo.

²Eese a'llansitoo'nnim Gibxa mattamo; Faari'oon digalalona, Gibxi uulli hafim daphphixxi beyyi ihona hassamo.

³Ihukkaarem Faari'oon digalaloom sholle'n ihookko; Gibxi uulli hafim tuulli ihookko.

⁴Ixxuwwi daannuwwi Xoo'aana asse'amaanim Haaneesa yamamoo Gibxi uulli beero'uwwa affota'nnim

⁵tuullee sholle'nnee bagaan hara'mmatoo awwaadoo luwwaa uwweena xanoobee'i minaadaphphi beyyo marimmi tuussiisookko» yoolla.

⁶Woroo'n qarinne yoo udma'i uullanne hee'oo bii'l moochchina wocamu Waa'i sagar kane. Oo asse'amaan hobbi, qubaam hamashshii bararoo xara'ii hee'oo baddisoo uullinne higga'a mattamo. Ixxuwwi hallannee gaameela'annee lobakata bito xee'aalli ihu mu'uta iyyiissa'a hara'mmato maham uwweena xanoobee'i uulla mattamo.

⁷Gibxiinsi egerakkam hara'mmat awwaad bee'ane; ee bikkina Gibxina ‹Qub bee'i Hamashshichcho› yaa summa fissaammo» yoolla.

⁸Waa'i iina «Kaba mattaa ku aganni waaroo doollenne heer heerina naqaash ihona ixxuwwi moo'llu'uuyyim kirbaasanne kitaabe; kitaabannem kitaabe» yukko.

⁹Ixxuwwi Waa'i ijaajo macceesseena hassambee'i boqquwwaa qawwiisaan keeno.

¹⁰Hiraagaaninam woccam bee'isa «Niina xabbee'n woshsha kuttakkotte; neese macceenseena hansoommi woshshi xale'e kullehe; qacaallaa woshsha xadisoohanee ihu luwwuwwi xale'e losissehe.

¹¹Ni googiinsi ekkid laa'llehe; ni taakkinam qolat ikkakkotte; neese keesammi ihu Isra'ee'l Waa'i bikkina macceenseena hansoommoyyo» yitamuulla.

¹²Ee bikkina Isra'ee'l keesammi «I sagara gaddakka'a barche'enne amma'nnantakko'ookko; qawwiishshannem bakke'llakko'ookko.

¹³Ee bikkina ku ki'nnuwwi baaxiil diqamaa ubeena hincaa ubimmoomim qaqqisaa dangonne afoo qeeraa'l ootisa ihookko.

¹⁴Iiqamaa lasage giira eebakkeena te'im wo'o bariinsi inkiirakkeena ihoo gala'im hee'oobee'isa butbutaa iiqamaa uboo buchchi mu'uxxisa ikkakkamo» yoolla.

¹⁵Isra'ee'l keesammi Moollanni Waa'i «I kollonne daba'llitakkolasii usheexxitakkolasii gattakkamo; tiirsitakkolasii amma'nnantakkolasii malaayye siiddakkamo. Ihukkaarem ki'nnuwwi sabbakko'ookko.

¹⁶Ee bikkinne ‹Qare'aalli faradonne saa'llinaa xolloommo› yitakkamuulla. Ee bikkina gibbakkam. Ki'nnuwwi ‹Ni farad hore'em qare'aalla› yitakko'ookko. Ihukkaarem ki'nnuwwa hollansitam kee'nnek ki'nnuwwaanniinsi lophphaa qare'aalli ihookko.

¹⁷Diina'i gaadaaniinsi matik sha'llanchi ki'nnuwwik mat kum manni giboo'isa issookko; Duunanne kaasamu baandi'llisaa hoffi duunannem moo'amoo mare'isaa ikkakkeebe'e ki'nnuwwiinsi hofqaxim gateebe'e diina'i gaadaaniinsi xale'i onti ki'nnuwwa hundam hollookko» yoolla.

¹⁸Waa'i hanqa oogatoohan ihu bikkina ki'nnuwwina haafookko; qishixxeenam ki'ookko. Ixxo amma'nnanchinne egeroo keen hundim maassaammuwwa.

¹⁹Yerusaaleemina hee'llakkam Xiyoo'n minaadaba, kanniinsi eehid wi'llitakkamoyyo. Hara'mmatina ixxi kollonne laattakkam ammane qishixxookko; macceesukkisam qaqqisaa agaagookko.

²⁰Waa'i lobakat hawwonne aaggakkamisa isseena xanookko; ihukkaarem ixxi gagoomim ki'nnuwwinne ihaa losisookko; ixxo hassakku'uuyyim od qondooddakkamoyyo.

²¹Googiinsi tochchonne makkanne te'im qeddanne fittakka'a jaljallitakku'uuyyi kinnuwwi lasinne «Hanqo'i goog kane; ka googinne mare!» yoo sagara macceessakkamo.

²²Ee ammane birinne goolabamaakkoo ki'nnuwwi waa'uwwa worqinne wereeggaakkoo misilluwwaa sholliissakkamo. «Niinniinsi qee'lle» haashaarammi luwwisa uunjitakkamo.

²³Hurbaata wixxakkam ammane muta li'aa er atoota siiddakkona Waa'i ki'nnuwwina xeena ga'nnisookko; ki'nnuwwi diinatim haraar allaachchi biiranne allaa'llookko.

²⁴Ki'nnuwwi abuullitakkam mirgo'uuwwii hallii doo'llammi er hixe itookko.

²⁵Uullanne hawwi ihoo ammane lob duunnuwwiinsii hoffi duunnuwwiinsii wo'i daadookko.

²⁶Waa'i ixxi minaadaphpheka iiqancha caccoo balla, booban omassukkokam fayyiisoo balla agan eelliinchisa caakkisookko; eelliinchi caakkim gaassaanniinsi lamar anga lophphaakkoohan ihookko.

²⁷Oono'o, Waa'ik malaayyii hibbii qee'llinnem moo'amookko; labanii wiriirii ixxi quunqi mare'uwwa; wocoohaarem ixxek sagar gii'llisa aphphookko.

²⁸Ixxi fooshshi gaanji afeebe'e aqqoo dirisisa; minaadaba illaanchonne illaansakkam haccisa illaansaa bi'isookko. Aqonnem bichchi hakkamma issaa bi'isookko.

²⁹Ihukkaarem Waa'i minaadaba, ki'nnuwwi liirantakkamo; keesammi uguxxi hiimonne zammattakkamaannisam zammattakkamo. Isra'ee'l allaaraanchi ihu Waa'i Keesammi Mine marukkuuyyi xurumba fuggu'uuyyi zammaroo mannisa liirantakkamo.

³⁰Waa'i ixxeka malaayyaam sagara manni hundim macceesoo'isa issookko. Ixxi malaayyi dillukkisam aphphoo quunqinne, itoo giirinne, hambu'llaminne, wiisho'innee baradinnee la'isookko.

³¹Waa'ik sagar Aasoo'l minaadaba muggisookko; ixxi biccim ixxuwwa aphphisookko.

³²Waa'i Aasoo'l minaadaba dabaransaa aphphisoo ammane ixxi minaadab xarbe'ikaa maasinqo'ikaa sagara macceesissamo. Aasoo'l minaadabinne oramookkok Waa'i ixxi gagame.

³³Lobakat doolliinsi illageen Aasoo'l adilluwwi adil shokkoo beyyi gudaa hee'ukko. Oo beyyi haraaraa xillaallaa ihaa lobakat haqqi tuubamaakkoo beyyi hee'ukko; iimaniinsi dilloo gii'llisa Waa'ik fooshshi giira bubbaa'ookko.