Read Hadiyya Issaayyaas Kitaaba 31 Bible Online

Issaayyaas Kitaaba 31 - Hadiyya bible

Issaayyaas Kitaaba 31

¹Isra'ee'l keesammi kolli moo'llambee'i keenina, Waa'iinsim hara'mmato siiddeena hassambee'i keenina, ihukkaarem hara'mmato siiddeenaa yita'a Gibxi uulla dillitam keenina, ixxuwwi faradonne amma'nnitam keeninaa ixxuwwi faraxxi gaare'uwwi dutimmannee faraxxi qoxxaalloomannee bakke'llam keeninaa aayye!

²Ihukkaarem ixxi qoora; boobana dilliisookko; ixxi yukkaanniinsi laso daba'llooyyo; jor baxxam keenoo hantaaraanina agaaggam keenoo guzumo'ookko.

³Gibxi uulli manni manname bagaan Waa'ayyo; ixxuwwi faradim maara edde'llo'ookeeno bagaan ayyaanayyo; Waa'i ixxi quunqinne ki'oo ammane mulli keenina hara'mmaanchi qolamookko; hara'mmam hee'ukkokim ubookko; lamim matikka'a bi'llamo.

⁴Waa'i iina «Hobbichchi diinate shoo ammane amadaa toxoohaare lobakat allaaraan weeccanta'a waattota'nnim ixxuwwik laachchi baddisoobee'isa ixxuwwi corochchinam u'nnamoobee'isa an gogoxxi Moollanni Waa'i Xiyoo'n duunannee qoffit beyyuwwannee orameena dilloommo.

⁵Cii'ichchi ixxi do'nnanne lado biddiqaa'aa ambimminne ixxi ciicoolla egeroo'isam an gogoxxi Moollanni Waa'i Yerusaaleema daphphaa'oommo; egeroommo; gatisoommo; hawwiinsim fissoommo.

⁶«Isra'ee'l minaadaba, hore'em laggakko'i i kollonne daba'llehe.

⁷Baaxiilaanchi ki'nnuwwi anginne birinnee worqinnee baxxakko'i qophpha'n waa'uwwa hundam ubbuussakka'a uttakkam balli waarookko.

⁸Aasoo'l minaadab manniinsetti ihubee'i bisa'inne beedditamo; mannan ihubee'i bisa'im ixxuwwa itookko; bisa'iinsi gibbamo; harde'uwwim agidda'n baxo baxxamo.

⁹Qoxxaalli ixxuwwi girbi dambaqinne gindamookko; gaaxxi awwonsaanim o'l mare'e moo'lla'a muggitamo» yukko. Ixxi giir Xiyoonanne gii'l midachchim Yerusaaleemanne ihu Waa'i kaka wocaakko.