Read Hadiyya Issaayyaas Kitaaba 32 Bible Online

Issaayyaas Kitaaba 32 - Hadiyya bible

Issaayyaas Kitaaba 32

¹Oono'o, adil muccuroominne gassookko; gassaanim hanqo'isinne oogatookko.

²Ixxuwwi annaannichchim manni hundinam hafachchiinsi daphphakkam mi'nnisaa hambu'llamiinsim maaxamakkam girbisaa ikkamo; uulli udma'anne daadoo daajjuwwisaa iibbi uullanne lob geejji ki'n hafisaa ikkamo.

³Ka lasage moo'oo kee'nnek illi ximbiiphphooyyo; macceesoo keenim baqaa macceesookko.

⁴Gaaggaabbam keen iyyaaqqimminne qoossitam keen ikkamo; duda'llam keenim danaamisa woccam keen ikkamo; woccam woshshim mannina aagoo keen ikkamo.

⁵Ka lasage ceemmaalla lombaamo yakkamoyyo; idiidaanchom biijaalla yakkamoyyo.

⁶Ihukkaarem ceemmaalluwwi ceemmi woshsham woccamo; ixxuwwi sawwitim jollinne wo'mmaakkoohane. Summa bi'issu'uuyyi Waa'a lagimma losissamo; sibaarukkaannina hurbaata xeebe'ukkaanninam wo'o uwwitamoyyo.

⁷Adabee'i kee'nnek sawwit jora; hawwaa'nnek meto'i hanqi ihuta'nnim ixxuwwa qophphaninne bi'iseena jora sawwookko.

⁸Er manchik sawwitim erane; er baxonnem qoxxaa hee'ookko.

⁹Ki'nnuwwi makkixxitakka'a hee'llakkam meenti ki'llakka'a i sagara macceessehe; ki'nnuwwi heechchanne bakke'llakkam keenim i woshsha macceessehe.

¹⁰Kaba ki'nnuwwi heechchanne bakke'llakka'a hee'llakkam meenti ka mat hiinchi woronne neeyyato mussiisoo u'n ki'nnuwwanne afookko. Ki'nnuwwina woyi'nnanem ihukko mulli haqqanne misha siiddakkamoyyo.

¹¹Ki'nnuwwi amaadaan meenti huxe'llehe; makkixxitakka'a hee'llakkam meentim, baachchinne batbati'llehe; eddechcha sheelaxxitakka'a leexa'llehe; xiddi eddechchinnem lamado lade'llehe.

¹²Liiransoo harish er uullii woyi'n kaashshii bi'u bikkina biqe aphphixxehe; kichche'lleheme.

¹³Uttii qarxaffii i minaadaphphi uullanne mutaakko; minaadab liiranchinne hee'llam hee'llo'i minneewwinaa liiranchinne wo'mmaa hee'u ka beero'inaa wi'llehe.

¹⁴Adi'lla'n min gatoo'n diihookko; adilla'n beero'oomim ogor bee'i uulli udma'i ihookko; minneewwii waardiyyi egereena afuuroo beyyuwwii hundim gindamookko; bii'l hallii kade'amoo allaachchi diinatim allaa'lloo beyyi ihookko.

¹⁵Ihukkaarem Waa'i ixxeka ayyaana ni hanenne dunoo amman waarookko; ee ammane uulli udma'i harish ihookko; harish uullim lobakat misha uwwookko.

¹⁶Ka lasage hanqo'i oogat uulli udma'anne hee'ookko; harish uullannem muccuroom hee'ookko.

¹⁷Muccuroo'mmek bax xumma; mishoomim xummaa heer heerina amma'nnanchaa ihookko.

¹⁸Waa'i minaadab qulitiinsii u'nniinsii usheexxookko; ixxuwwi minim xumminnee gatimminnee wo'mmaakkoohan ihookko.

¹⁹Baradaam xeeninne haqqi doomoom aphphisamuta'n beero'oomim hore'em bi'uta'nnim

²⁰wo'i bu'i gadanonne ki'nnuwwika wixo wixxakkam bikkinaa ki'nnuwwi larinaa hallinaa ihoo allaachchi beyyo siiddakkam bikkinaa maassinne wo'mmitakko'oo keen ikkakkamo.