Read Hadiyya Issaayyaas Kitaaba 33 Bible Online

Issaayyaas Kitaaba 33 - Hadiyya bible

Issaayyaas Kitaaba 33

¹At bi'lloo'nnim bi'issoottok, ate bi'isaancho, kiina aayye! Lagakkoo'nnim laggoohaanno, ate laggoohaanno kiina aayye! Bi'ishsha uttoo ammane atim bi'llootto! Lagimma uttoo ammanem lagantootto.

²Waa'a! Niina haafihe; keesenne neeyyato issinaammo. Balli hundam at neese egere; hawwi ammanennem at neese gatise.

³Ki sagar banqisa gugoo ammane minaadab gibookko; at hibbinne ki'lloo ammane adilluwwi binnookko.

⁴Qawwaawwi wixxoo'isa qeefajjo'i wixxookko; qawwaawwi wotalli xophxophoo'isa minaadab qeefajjo'o baqookko.

⁵Waa'i hundem luwwiinsem lobane! Hee'ookkokim iimanennette. Ixxi Xiyoo'n beero'o muccuroominnee hanqo'i oogatinnee wonshookko.

⁶Ixxi at hee'lloo doollina amma'nnisoo shooho'o; gatimmina, lachchinaa qooroominaa lugum ihookko. Waa'a baddimmi ka amaxxi hundinam gooca.

⁷Oono'o, maagguwwi goog hundannem laattamo; xummi asse'amaanim qaraaraalli wi'llo wi'llitamo.

⁸Lob googguwwi diihaakko; ee googonne taakke'oo manni bee'e; hidi'l sagalluwwi gindamaakko; sogoo keen gadamaakko; lombi yoo manchim bee'e.

⁹Uulli wi'llukko; wossukko. Liibaanoos tuurukko; quubukko. Saaroon uulli udma'isa ihaakko; Baasaanannee Qarmeeloosannee yoo haqquwwik buyyi giggiraakko.

¹⁰Waa'i «An kaba ki'oommo; iimiimoommo; lophphoommome.

¹¹Gaaba siiraa luunqa qaroohaannisa ki'nnuwwa fooshshi ki'nnuwwam gii'llisa ihaa itookko.

¹²Minaadab boorjo'i ki'nnisaa murakko'i uttisaa giiranne shokkookko.

¹³Ki'nnuwwi qee'llonne yoontakke'i keen issummoka macceessehe; abbisonne yoontakke'i keenim i malaayye laqqehe» yukko.

¹⁴Xiyoonanne hee'llam baaxiilaan muggitamo; laggam keenim tuuttamo. Ixxuwwi «Niinniinsi ka itoo giirinne hee'eena xanookkok ayyette? Heer heerina aphphoo giirindu ayyi hee'eena xanookko?» yitamo.

¹⁵Muccuroominne hee'ookkok, hanqa wocookkok, qawwiishshinne siidamoo luwwa gadookkok, maqanxa aa'immiinsi ixxi anga ege'llookkok, manni xiiga dunimmi bikkina macceeseena hasoobee'ekii jor luwwa moo'immiinsi ege'llookkokii

¹⁶eehido'i manchi lombi beyyonne hee'ookko; duu'n girbi ixxena daphphixxi beyyi ihookko; itoo luwwa hoogooyyo; agoo wo'im xoo'ooyyo.

¹⁷Ki illi adila nuurinne moo'ookko; qee'llonne yoo haraar uullam moo'ookko.

¹⁸Gaassi hawwo tiittittuuyyi «Lob gassaanchi hannonne yookko? gibissiisaanchidu hannonne yookko? Qoto'akka'a egerakkam beyyi awwonsaanchi hannonne yookko?» yitaa xa'mmitootto.

¹⁹At qoossiteenaa laqqeenaa xantoobee'i suuminne woccam bolxitam allaggi minaadaba ka lasage moo'llakkamoyyo.

²⁰La'anto'oo amma'nnaxxi ugudduwwa lonsinoommi Xiyoo'n beero'uwwa moo'e! Xumminne hee'llakkamisina makkaa yoo Yerusaalee'm beero'o moo'llehe! Ixxim xiribbuwwi hore'em gosamoobee'aannisa, usseewwim muramoobee'aannisaa beyyiinsim mikmikoobee'i dukkaa'nnisaa ihookko.

²¹Waa'i ee beyyonne niina malaayyi ihookko; laaydaam wongilluwwi higoobee'isaa lob markabbuwwim chabboobee'isaa haraar daajjuwwaa wo'uwwaa ihookko.

²²Waa'i niina daanna; ixxi niina seera uwwoohanee adilaa; neese gatisookkokim ixxotte.

²³Ihukkaarem at utuphphek us sho'ukkaannisa, utuboomim qoxxubee'aannisaa shara'i biddiqubee'i markaphphisaa; ee lasage fafaakkoo qeefajjo'i baxxansamookko; dimmeewwim gattoo'n aagga'a ee qeefajjo'iinsi massitamo.

²⁴Xiyoonanne hee'oo manniinsi «Iina xissaakko» yoo mat manchim hee'ooyyo; eekke'e hee'llam keen hundikim baaxiil haafamookko.