Read Hadiyya Issaayyaas Kitaaba 34 Bible Online

Issaayyaas Kitaaba 34 - Hadiyya bible

Issaayyaas Kitaaba 34

¹Minaadaba, waallehe macceessehe! Manna, qoossehe. Uullii uullanne yoo luwwii hundim heer uullii heer uullanne mutoo luwwii hundim macceesona!

²Waa'i uulli minaadabannee ixxuwwi gogotannee lobakata quuqaakko. Guullaahim bi'isookko; bisa'inne durantonam higisaa uwwookko.

³Ixxuwwi leeshim hannonnem ubaa shamookko bagaan waammamooyyo; duunnuwwim xiiga gunguu'llookko.

⁴Eelliinchi, aganii boollaankii bi'ookko; iimanim omachchisa xaaxamaa laa'ookko; boollaankim woyi'n buyyisaa oda'i buyyisaa giggirookko.

⁵Waa'i iimanenne bisa'a gudisaakko; bichchi ixxuwwanne afoo'isina ixxuwwanne oogatu Eedoo'm minaadabam oo bisa'i aphphisookko.

⁶Kitimina hincu gereebbikii fella'ikii ambulluwwi durantam ammane ixxuwwik xiigii di'irii billawwa gunguussoo'isam ixxi bisa'im Eedoo'm manni xiiginnee di'irinnee gunguussamookko. Waa'i ka kitima Booxir beero'onnee lophphaakkoo durancham Eedoo'm uullannee issookko.

⁷Boobir Eedoo'm minaadabinne maqire labeennuwwim moolluwwinne maqire ubbamo; ihukkaarem mulli keeninne maqirem letamo; ixxuwwi uulli xiiginne kolbamookko; di'irinnem harishookko.

⁸Waa'i Xiyoona gatiseenaa ixxi diina'iinsim baado miqiseenaa waaroo hiinchoo ballaa qoodaakko.

⁹Eedoo'm daajjuwwi reenjanne buchchim diinanne daba'llookko; uulloom hundoomim shokkookko.

¹⁰Ballaa hiimoo shokkookko; ixxeensim wiriir firimma heer heerinam urooyyo. Uulloomim doolli hundam awwaadoobee'i udma'i ihookko; la'mmaagge ee uullinne ayyim taakke'ooyyo.

¹¹Ee uullanne cingiraallii gandaddii wo'mmookko; mooqqaqqii qooraantii do'nna baxookko. Waa'i Edoo'mmeka gindamoo beyyo keenoo usaa bi'oo beyyo keenoo tumbe'ee biddiqaa'ookko.

¹²Uulloomam gassoo adil hee'ooyyo; uulla awwonsaan hundim bi'ookko.

¹³Adilla'n minneewwannee girbamu beero'uwwannee hundannem uttii halluttii mutookko; wengereellii mooqqaqqim hee'oo beyyi ihookko.

¹⁴Udma'i uulli moochchi gotinne maqire hee'ookko; udma'i uulli fella'a laboo habusim ixxina'i ixxim weeccamookko; hii'm awkare'i ee beyyonne usheexxookko; ixxuwwim usheexxaxxi beyyo siiddamo.

¹⁵Mooqqaqqi do'nna baxaa quunqa qarookko; ciicoollam fissaa li'isookko; ammar lam lam iikka'a weeccanta'a fikkaanniteena ee beyyonne wixxitamo.

¹⁶Fooraam qooccanchuwwi bikkina Waa'i kitaabanne kitaabamukkoka hassakka'a qananaa'llehe; ka qooccanchuwwik matim bi'ooyyo; heechchi besha hoogaa mullam hee'ookkok hee'ooyyo; Waa'i ixxi gagoomim ookki ihoo'isina ijaaju bikkina mateeyyoominne hee'llamisa issookko.

¹⁷Waa'i ixxuwwi annannichchinam hannonne hee'im hasisooda'e qoodukko; oohim heer heerinam qaranchiinsi qaranchi afeebe'e ixxuwwina sharad ihaa hee'llamo.