Read Hadiyya Issaayyaas Kitaaba 35 Bible Online

Issaayyaas Kitaaba 35 - Hadiyya bible

Issaayyaas Kitaaba 35

¹Udma'i uullii gogaalli uullii liira'mmookko; uulli udma'annem fiit fiitookko.

²Udma'i uullim liiranchi mazmuurinne ilil yookko; Liibaanoos duu'nnisam lombaam ihookko; Qarmeeloosisaa Saaroo'nnisaa hibbaam ihookko. Ayyim ni Moollannika hibbaa Waa'ikam lombaa moo'ookko.

³Hoogu wodduwwa qoxxissehe; qacu malaayyuwwam qoxxissehe.

⁴Baachchaaninam «Qoxxehe; badditakkotte! Ki'nnuwwi Waa'i waarookko; ixxi baado miqiseena waarookko; baado miqisaa ki'nnuwwa gatiseena waarookko» yi'llehe.

⁵Ee ammane qooqquwwi moo'llamo; gawwuwwim macceessamo.

⁶Dimmeewwi kukkussisa xophitamo; wocceena xantambee'i duudduwwi zammattamo; uulli udma'anne daajji wo'i daadookko.

⁷Shokkiisoo shashsharim delbi ihookko; gogaalli uullim bu'i wo'inne qufookko; wengereelli daabbaram hee'u beyyim er hixii qara'ii mutoo beyyi ihookko.

⁸Eekke'enne lob bobba'i yookko; ookkim «Keesamaakkoo googo» yamamookko; ee googinne haashaarammuwwi taakke'ooyyo; ihukkaarem Waa'i minaadab xale'i taakke'ookko; maashaalluwwi ee googo huushooyyo.

⁹Hobbi ee beyyonne hee'ooyyo; jor moochchim hance'ooyyo; eehido'i keen googonne siidamooyyo; Waa'i gatisu keen xale'i eekkeen daba'llamookko.

¹⁰Waa'i gatisu keen daba'llitamo; zammatu'uuyyim Xiyoona aaggamo; Heer heeraxxi liirancham laakkisa siixxitamo; liirammatoo heelloo siixxitamo; hawwii kichchechchii ixxuwwiinsi qee'llookko.