Read Hadiyya Issaayyaas Kitaaba 36 Bible Online

Issaayyaas Kitaaba 36 - Hadiyya bible

Issaayyaas Kitaaba 36

¹Hizqiyaas Yihuxxi uullanne adil ihu tommonnee soo'l hiinchonnee Aasoo'l adil Sanaakireem girbamaakkoo Yihuxxi beero'uwwa qasaa kaa'aa amadukko.

²Adil Hizqiyaas anga uwwoo'isina Aasoo'l adil gaaxxi awwonsaancho lobakat gogotinne maqirem Laakiishiinsi adil Hizqiyaas beyyo Yerusaaleema asse'ukko. Oo gaaxxi awwonsaanchim eddechcha aanshaanchi abuulli uulla marakkam gooqqi hanaa'n delbi boohe'i gadano afaa uullukko.

³Adilla'n mi'n ijaajaanchi hee'u Hiilqiy beet Eeliyaaqeem, adi'lla'n mi'n kitaabaanchi hee'u Sheebinii aganna kitaabaanchi hee'u Asaaf beet Yoo'aahii Aasoo'l gaaxxi awwonsaanchinne edanteena fitto'o.

⁴Gaaxxi awwonsaanchi Raafaasqiisim ixxuwwina «Aasoo'l adil Hizqiyaasina ‹At kaa'nna ki wodano qoxxissittok ayyenne amma'nnantaate?

⁵O'l gaafa'oomii qoxxaalli gogotii iina yookko yitoolla; ihukkaarem ookki awwaad bee'i woshsha; at iina ijaajancha sabbittok ayye amma'nnantaatette?

⁶Ayyi la'ukko at Gibxi uulli adil iina hara'mmookko yitaa neeyyata issitaa hee'llootto; ihukkaarem ixxonne amma'nnamim iiqamaakkoo shomboqo'i sikkonne bakke'immi ihukkisa la'e; ixxi shiincaar ihaa ki anga qasimmiinsi bagaan mahinam awwaadooyyo› yoolla yitakka'a kullehe» yukko.

⁷Odim Aasoo'l gaaxxi awwonsaanchi «At ‹I Moollanni Waa'anne amma'nnamoommo› yitoolli ihulas Yihuxxekii Yerusaalee'm minaadabii xale'i matem kiti'm beyyonne otossimmi hasisookko yitaa Waa'ina otossakkam beyyuwwaa kiti'm beyyuwwaa gindansittok Hizqiyaas atetteyyonnihe?

⁸Ee bikkina Aasoor adi'l summinne ihaa kiina e'lloo luwwa kuroommo; saa'llita'a jigisimma iggitam manni yolas lam kum farado kiina uwwoommo.

⁹At Aasoo'l gaaxxi awwonsaaniinsi hundiinsi lasaanchikam ihuta'n uullixxanteena xantooyyo; eehannonnem Gibxi uulli manni faraxxi gaarre'uwwaa faradoo iina asse'llamo yitaa neeyyattoolla.

¹⁰Odim an ka uulla qaseena waarummok Waa'i doo'l ihoo'nnim ihukkoka labissaatennihe? Hore'oomam ka uulla qasaa bi'isoommisina ijaajukkok Waa'i ixxi gagoomame» yukko.

¹¹Ee lasage Eeliyaaqeem, Sheebinaanii Yoo'ahii Aasoo'l uulli gaaxxi awwonsaanchina «Neese tirato lanqoomman ihu bikkina Sooriy uulli suuminne kuttoo'isina keese uunxinoommo; ka qash hanenne yo'i manni hundim macceessam Ibro'i manni suuminne kuttitte» yito'o.

¹²Aasoo'l gaaxxi awwonsaanchim «I moollanni adil ka hundam ki'nnuwwinaa ki'nnuwwi uulli adilinaa xale'e kuroommisina asse'ukkoka labissakka'attennihe? Ee'isayyo, ki'nnuwwisam ixxuwwi ciro itimmii shumam agimmii hasisookkok minaadabam edaatette ihu bikkina an kuroommok ka qash hanenne yo'i manni hundim macceessamisinatte» yukko.

¹³Oo gaaxxi awwonsaanchi odim afuuru beyyiinsi ki'aa uullukko; ixxi sagaram iimaa'aa Ibro'isinne «Ki'nnuwwina Aasoo'l lob adil kuroo woshsha macceessehe.

¹⁴Hizqiyaas ki'nnuwwa qawwiisoone; ixxi hore'em ki'nnuwwa gatiseena xanooyyo.

¹⁵Hizqiyaas ‹Waa'anne amma'nnammehe; ixxi neese gatisookko; ni beero'im Aasoo'l gogoxxi anganne aagoobee'isa hoorookko› yoo woshsha macceessakkotte.

¹⁶Hizqiyaas ki'nnuwwina kuroo woshsha macceessakkotte; Aasoo'l adil i beyyo waattakka'a iinninne iittammehe; ki'nnuwwi annannichchim eekka issitakkolas woyi'nnekaa oda'ikaa misha ittakkamo; hintakko'i balleewwiinsim wo'o aggakkamo.

¹⁷Kukim ihookkok adil ki'nnuwwi uulla laboo uulla massaa beyyo amadiiseebe'e; ee uullannem woyi'n diqaasina ihoo woyina kaasakkam beyyuwwii itakkam hurbaatina ihoo wix hurbaata wixakkam beyyuwwii yookko.

¹⁸Ee bikkina Hizqiyaas ‹Waa'i ki'nnuwwa gatisookko› yaa wocukkuuyyi ki'nnuwwa qawwiisoone. Ihona bagaan mulli minaadaphphi waa'uwwiinsi matim Aasoo'l adi'l angiinsi ixxi uulla gatiseena xanukkok yoohonnihe?

¹⁹Haamaatikii Arfaad waa'uwwii hannonne yo'o? Safaarwaa'm waa'uwdu hanno affo'o? Odim ixxuwwiinsi matim ihuta'n Samaare'e i angiinsi gatiseena xanaahinnihe?

²⁰Ka uulli hundikim waa'uwwi i angiinsi ixxuwwi uullla gatisseena xanukkok hinkane? Eehannah ki'nnuwwi ‹Waa'i Yerusaaleema gatisookko› yitakka'a sawwitakkamok hinkidette?» yukko.

²¹Minaadabim illageen adil Hizqiyaas ijaajukkisanne mat luwwam woccambee'isa cawwita'a utto'o.

²²Ee lasage adi'l mi'n gassaanchi hee'u Hilqiy beet Eeliyaaqeem, kitaabaanchi Sheebinaanii aganni kitaabaanchi hee'u Asaaf beet Yoo'ahii kichchechchinne ixxuwwi eddechcha dereetto'o; adil Hizqiyaas kollim hincita'a Aasoo'l gaaxxi awwonsaanchi wocukkoka hundam kutto'o.