Read Hadiyya Issaayyaas Kitaaba 37 Bible Online

Issaayyaas Kitaaba 37 - Hadiyya bible

Issaayyaas Kitaaba 37

¹Adil Hizqiyaas ka hundam macceesaa kichchechchinne ixxi eddechcha dereerukko; xiddi eddechcham edde'aa Keesammi Mine marukko;

²Adilla'n mi'n gassaanchi Eeliyaaqeema, adi'l mi'n kitaabaanchi Sheebinaanaa qeessuwwiinsim la'anto'oo keenoo Aamoox beet hee'u hiraagaanchi Issaayyaas beyyo asse'ukko; ixxuwwim xiddi eddechcha edde'lla'a hee'llo'o.

³Issaayyaasina kuttona Hizqiyaas ixxuwwanne asse'u assi «Kaballi niina lophphaakkoo hawwi balla, guzumo'anchanee sholle'nnanee; qattam amman afaa xuu'lleena malaayyi bee'u meentichchosa inkaammo.

⁴Aasoo'l adil hee'oo Waa'a game'llona ixxeka gaaxxi awwonsaancho asse'aakko; ki Moollanni Waa'i ee game'llato macceesaa gamme'llukkoka guzumo'ookki ihookko; ee bikkina ni minaadabiinsi foorinne gatoo keenina ki Moollanni Waa'a uunxe» yukko.

⁵Issaayyaasim adil Hizqiyaas asse'u woshsha macceesaa

⁶«Waa'i ‹Aasoo'l awwaadaan eese game'llito'i game'llato macceessaa baddititte.

⁷Oono'o, ixxo hambalaachchisoommo; ixxi uullanne ihu woshsha macceesaa ee uullam daba'llaa maroo'isaa ee beyyonnem bisa'inne aphphisamaa lehoo'isaa issoommo› yoolla» yukko.

⁸Gaaxxi awwonsaanchim Asoo'l adil Laakiishiinsi uraa marukkisa macceesaa hee'u beyyiinsi daba'llukko; ixxim adil Libina'i beero'o qasukkuuyyi edamukko.

⁹Tophphe'i adil Tiirhaaq awwonsoo Gibxi uulli gogot ixxuwwa qaseena waaroolli ihukkisa Aasoo'l minaadab macceesukko. Asoo'l adilim Hizqiyaasina

¹⁰«Yihuxxi adil Hizqiyaasa, at amma'nnantoo Waa'i ‹Yerusaaleem Aasoo'l adi'l anganne ubooyyo› yoo neeyyatinne keese qawwiisoone.

¹¹Aasoo'l adilluwwi mat uulla bi'isseena hassam amman hundam ee uulla hinkid bi'issamda'e macceessaatto; eehannah atdu eehanniinsi gattoo labissaatennihe?

¹²Gaassi iyyanno'i Goozaana, Kaaraanaa Reexeef beero'uwwaa bi'isso'ookko; Talaasaranne hee'oo Ede'n minaadabam shito'ookko; oo luwwi hundim ihukkuuyyi ixxuwwi waa'uwwiinsi matim gatiseena xanaahinnihe?

¹³Haamaatik, Arfaadik, Safaarwaayimik, Heenaa'ikii Iiwwa'i beero'uwwikii adilluwwi kaba hannonne yo'o?› yoo assi kitaaba asse'amaanonne» asse'ukko.

¹⁴Adil Hizqiyaas ee assikitaaba asse'amaa'n angiinsi aa'aa qananaa'ukko; ixxim ee assikitaaba Keesammi Mine massaa Waa'i illagenne biddiqaa'ukko.

¹⁵Hizqiyaasim

¹⁶«Kiruubeelanne afuuttoo Isra'ee'l Waa'i ikkitti gogoxxi Moollanna! Uullanne yoo adilluwwanne hundannem Waa'i xale'i atette; iimanee uullaa qooccittok atette.

¹⁷Kabadem Waa'a! Ki macce ni kolli dabattaa macceese; Waa'a ki ille fooqaa'e; moo'eme; Sanaakireem hee'oo Waa'a game'lleena asse'u sagara macceese.

¹⁸Waa'a! Aasoo'l adilluwwi lobakat adilluwwa guullito'isaa ixxuwwi uullam bi'isso'isaa macceensaammo.

¹⁹Manni anginne haqqaa kinaa cabbarakka'a baxakko'i qophpha'n waa'i misilluwwa shokkiissa'a bi'isso'ookko.

²⁰Ni Moollanni Waa'a! Xale'i at hanqo'i Waa'i ikkittisa heer uulli minaadab hundim la'oo'isina kaba neese Aasoo'l manni angiinsi gatise» yaa uunxukko.

²¹Ee lasage Amoox beet Issaayyaas adil Hizqiyaasina «Isra'ee'l Moollanni Waa'i ‹Aasoo'l adil Sanaakireem sha'llanchi bikkina hincaa'llitti uunxato macceesaammo› yoolla.

²²Ixxi bikkinam Waa'i ‹Sanaakireema, Yerusaalee'm minaadab keese gadaa naacamookko; at gibboo ammanem horoore heekkeesamookko.

²³Game'llanchinne sholliissoottok ayye labissaate? Ki sagara iimiimaa'llittok amaadimminnem ille ki'issittok ayyennette? Isra'ee'l Keesammannettena'e!› yukko.

²⁴Ki awwaadaano asse'llaa Waa'anne game'llaxxi sagara wocimminne ‹I faraxxi gaare'uwwi qoxallaninne iim shiqito'i Liibaanoos duunnuwwa amadaammo; Liibaanoosika qeeraa'l haqquwwaa mishissam hoommuwwaa muraammo; mishissam shiqqeen beyyuwwanne tuut haqqoro aagaammo.

²⁵Allaggi manni uullanne balleewwa hinaa wo'o agaammo; i gogotik lokki dutimmiinsi ki'ukkok Abbaayyi daajje gokkisaakko› yitaa bolxitaatto.

²⁶«Odim Waa'i ‹Lobakat ammaniinsi illageen ka hundam qoodummok an i gagoomam ihummisa macceessittoyyonnihe? Ka woshsha qoodaa tunga afoo'isa issummok anette; girbamu beero'uwwa ginditaa hacci tuubbi issitoo'isina malaayye uwwummok anette.

²⁷Ee beyyonne hee'llo'i minaadaphphek malaayyi hoogaakko; muggito'ookko; sholle'llo'ookkome; biir uulli hixisa, wix hurbaaxxi mutisa, mi'n hanenne mutoo harafisaa hamaamoo'n waaggi aphphisu hurbaaxxisaa ikko'ookko.

²⁸« ‹An ki bikkina hundem luwwam la'oommo; maha issitooda'ee hanno mattooda'ee moo'oommo; i hanennem quunqinne ki'llittisa qoossaammo.

²⁹Eesenne quuqqittisaa ki wodanim bolxukkisaa kaba ki sanenne guma'a ki suumennem hakkamma aagisaa waatti googinnem dabaroommo› yoo asso asse'ukko» yukko.

³⁰Ee lasage Issaayyaas adil Hizqiyaasina «Ku hundim wo'mmo'isina mare'oom kane; ka maaragee waaroo maaragee wixakkoo'n li'ukkokaa gobbe'i hurbaataa ittakkamo; ihukkaarem saxxi hiinchonne ki'nnuwwi gaqqi hurbaata wixxakka'a atootissakkamo; woyinam kaassakka'a misha ittakkamo.

³¹Yihuxxi uullanne bichchiinsi gatto'i keen hundim uullanne nigga massaa li'aa mishoo duubbi kaashshisa ikkamo.

³²Yerusaaleemiinsii Xiyoo'n duuniinsii bichchiinsii gattam keen hee'llamo. Gogoxxi Moollanni Waa'ik to'achchi eekka issookko.

³³«Ee bikkina Aasoo'l adi'l bikkina Waa'i ‹Sanaakireem ka beero'o hore'em aagooyyo; mat xiyyim ixxonne darabamooyyo; agira amadu gaadanchim ixxi kollonne hincooyyo; dichchirinnem kibbamooyyo.

³⁴Ee bikkina ixxi ka beero'onne aagoo'nnim waaru googinnem daba'llaa elle'ookko; kaka wocummok an Waa'a.

³⁵I gaqqi lombi bikkinaa i awwaadaanchi Daawiitina uwwummi neeyyaxxi saga'l bikkinaa ka beero'o an i gagoomim qasamaa gatisoommo› yoolla» yukko.

³⁶Ee hiimom Waa'i asse'amaanchi Aasoo'l gaadaa'n wiiddananne aagaa mat xibbee sadeentayyee onti kum gaadaanoo shukko; soodaraar daranne manni diriiriinsi baqoo ammanenne hundim lehaa siidamukko.

³⁷Ee lasage Aasoo'l adil Sanaakireem laso daba'llaa Naanaawe'e maraa afuurukko.

³⁸Balliinsi mat balla Niisarook yakkam qophpha'n waa'ina otossakkam minenne otossukkuuyyim ixxi oosiinsi lam Adiraameeleekii Saari'eexerii bisa'inne shito'o; ixxuwwim xotta'a Araaraata gibbo'o; ixxi beyyonnem Asraadoona yakkam ixxi beet adil ihukko.