Read Hadiyya Issaayyaas Kitaaba 38 Bible Online

Issaayyaas Kitaaba 38 - Hadiyya bible

Issaayyaas Kitaaba 38

¹Ee doollenne Adil Hizqiyaas kee'mmaallisa xissaa lehonne hincaa hee'ukko; Amoox beet hiraagaanchi Issaayyaas moo'eena ixxi beyyo maraa «Waa'i ‹Ka jabbiinsi at fayye'llooyyo; lehimmi kiina gatoobee'i bikkina ki mine axixxe› yoolla» yukko.

²Hizqiyaasim ixxi ille gortanni kollonne dabaraa

³«Waa'a! Ki illagenne ama'nnanchinnee wo'm wodaninnee an kiina awwaadummisaa keese liiransoo luwwam issummisaa sawwihe» yaa Waa'a uunxukko. Qaraaraallisam wi'llukko.

⁴Ee lasage Waa'i Issaayyaasina

⁵«Hizqiyaas beyyo mattaa ‹Kiyyanni Daawiitik Moollanni Waa'i an ki uunxato macceesaammo ki indiiddam moo'aammo; ee bikkina ki umuranne tommoo onti hiinchoo edaammo.

⁶Keesee ka Yerusaalee'm beero'oo Aasoo'l adi'l angiinsi gatisoommo; ka beero'inam oramaa egeroommo› yoolla yihe» yukko.

⁷Issaayyaasim Hizqiyaasina Waa'i uwwu neeyyaxxi sagara wonshoohan ihukkisina uwwamu mare'i kane.

⁸Adil Akaaz mi'n iimane firakkamisina baxisu gardabbanne usheexxoo hafa Waa'i la'mmaaggem tommi gardabbuwwa higaa laso daba'lloo'isa issookko» yaa dabarukko. Oo hafim tommi gardabbuwwa higaa laso daba'llukko.

⁹Hizqiyaas jabbiinsi fayye'ukkisam kanniinsi woroon yoo mazmuura kitaabukko.

¹⁰I umu'l kollonne iinniinsi hee'immi gada'i hooramaa Si'oola dilloommoka labisaa hee'ummo

¹¹Fooraam luwwi hee'oo ka uullanne Waa'a, te'im ka heer uullanne hee'oo qooccanchinne maqirem manna la'mmeka moo'oommoyyo yaa hee'ummo.

¹²I heechchi dangonnem allaaraa'n dukkaa'nnisa gosamaakkoohanee xaaxamaakkoohanee baxamaa beeddoo'n eddechcha dadoo manni xaaxoo mu'utanne muramaa gatu eddechchisa ihaakko yaa sawwaa hee'ummo. Waa'i i umura gundisukkoka labisaa hee'ummo.

¹³Soodaraar afeebe'e laarummuuyyi garummo; hobbichchisa i miqqeewwa hundam iiqansitto; hiimoo ballaa eese u'nnissitto.

¹⁴Huummaantisa laaram hee'ummo; handarekkichchisam amman hundam qitinam hee'ummo; cawwaa iimane asi'mmimminne i illi hoogaa hee'ukko. Moollanna! Ka hawwi hundiinsim eese gatise.

¹⁵Ka hundam issukkok Waa'i ixxi gagam ihu bikkina an mayyeena xanoommo? I heechchi qaraaru bikkina iina diriir bee'e.

¹⁶Moollanna! Manni kiiinninne hee'ookko. I ayyaanim ee'isam ee keeninne fooraam ihookko; eese fayyiissitto; foorinnem hee'issitto.

¹⁷I qaraarim xummanne daba'llookko; dangisoo luwwi hundiinsim eese gatissootto; i baaxiilo hundam uttootto.

¹⁸Si'oolanne keese galaxxookkok matim bee'e; waammantam keenim amma'nnantaattoohaannoomanne neeyyato issitamoyyo; lehu mannim keese heebbisooyyo.

¹⁹An kaba keese galaxxoommisa galaxxiteena xantamok xale'i foorinne yo'i keeno; at amma'nnantaattoohan ikkittisa ixxuwwi anno'i ixxuwwi oosina kuttamo.

²⁰Waa'i eese fayyiisookko; ee bikkina diitta'a aphphinsummuuyyi kiina galaxxi mazmuura hincaa'nnoommo. Ee bikkina ni umu'l doolli hundannem Waa'aannonne Keesammi Minenne muuncan yoo mu'utinne zammalloommo.

²¹Ee lasage Issaayyaas oda'i buyyika xeffo'o dashshanne issitakkolas fayye'ookko; yaa hee'ukko.

²²Adil Hizqiyaasim «Fayye'aa Keesammi Mine mareena xanoommisa la'eena xanoommi mare'i maha?» yaa Issaayyaase xa'mmukko.