Read Hadiyya Issaayyaas Kitaaba 40 Bible Online

Issaayyaas Kitaaba 40 - Hadiyya bible

Issaayyaas Kitaaba 40

¹Ki'nnuwwi Moollanni Waa'i «Qoxxissehe! I minaadaba qoxxissehe!

²Yerusaalee'm minaadaba qoxxissehe; agidda'n doolli beeddaakko; baaxiilim haafamaakko; baaxii'l bikkina lam qinxite guzumo'amukkisa kullehe» yoolla.

³ Alallaaxxi sagar «Udma'i uullanne ni Moollannina googo gudissehe; udma'anne Waa'ina googo bachchitakka'a axissehe.

⁴Baallii cebbii wo'mmona; lob duunii hoffi duunii toroshamaa shiraashiramona; aagammi firammi uulli gudona.

⁵Ee ammane Waa'ik lombi caakkaa la'amookko; manni hundim eekka mateeyyoominne moo'ookko; kaka wocukkok Waa'a» yoolla.

⁶Mat sagarim «Alallaaxxi sagara woce!» yukko. Anim «Mayyaa woco?» yummo. Oo sagarim «Manni hundim hixisa; ixxi lombim biir uulli fiitisa;

⁷Waa'ik hafachchi hafachchoo ammane; hix gogoo'isam fiitim giggiroo'isa mannim ee'isam giggiroohane.

⁸Hanqinam hix gogookko; fiitim giggirookko. Ihukkaarem ni Moollanni sagar heer heerinam qoxxaa hee'ookko» yukko.

⁹Xiyoona, iim shiqaakkoo duunanne fire; mishiraachchi sagaram alallaate Xiyoona, ki sagara iimaa'llaa woce; mishiraachchi sagaram alallaate; woce baddititte; Yihuxxi uullanne yo'i beero'uwwina «Oono'o, ki'nnuwwi Moollanni» yitaa kure.

¹⁰Moollanni Waa'i wodaam malaayyinne gasseena waarookko; miqo'im ixxi angannette; miqoo tissim ixxi beyyonnette.

¹¹Allaachcham allaaraanchisa abooyyookko; wotallam matissaa wixxaa'ookko; ixxi anginnem qaaphphaa massookko; ixxuwwi ammo'om qishixxatinne awwonsookko.

¹²Cambalaqa ixxi oobo'onne iimanem ixxi taachcho'onne uulli buchcham qunuunchonne keeneena xanookkok ayyette? Lob duunnuwwaa hoffi duunnuwwaa keennaanchonne keenookkok ayyette?

¹³Waa'ina «Ka'isa isse» yaa ijaajookkok ayyette? Ixxo losiseenaa sogeenaa xanookkokdu ayyette?

¹⁴Lachcha siideena Waa'i ayye a'llansukko? Hanqo'i oogaxxi googdu ixxena ayyi losisukko? Lachcha losisukkokii qoossimmi googo moo'isukkokii ayyette hee'ukko?

¹⁵Mulli minaadab Waa'i illagenne jaalo'onne taku wo'isa; keennaanchonne yoo di'llisa; wo'inne kibbamu uulluwwim ixxi illagenne sho'lle'aalli di'llisa.

¹⁶Liibaanoosanne yoo diinat hundim kitimina Haqquwwim kiti'm giirina ihooyyo.

¹⁷Waa'i illagenne minaadab hundim mahayyome. Ixxuwwi ixxi illagenne mahannem xigantambee'i kora'i keeno.

¹⁸Waa'a ayyenne akeekansitakkamo? Ayyendu kobi'llansitakkamo?

¹⁹Ixxi haqqa cabbarakka'a baxakko'i misi'llisayyo; xaara bukkaan birinne baxxa'a worqinne goolabakko'aannisayyo; kin birinne baxakka'a uullisakko'i qophpha'n waa'isayyo.

²⁰Eehid baxeena amaxxi bee'i buxichchi butumbuutoobee'i haqqa doo'llaa uboobee'isa anga qoor manchinne baxisookko.

²¹Kaka hore'em laqqakkamoyyonnihe? Macceessakko'oyyonnihe? Gaassi doolliinsidu ki'nnuwwina kuramukkoyyonnihe? ku uulli shooho'amukkaanniinsi ki'isaa qoossitakko'oyyonnihe?

²²Waa'i uulliinsi hanaan adilla'n barcumanne afuuraakko; uulli minaadab ixxi illagenne qawwaawwisa; ixxi iimane du'm eddechchisa biddiqaa'aakko; dukkaa'nnisam heechchi beyyi issaa kaasaakko.

²³Adilluwwa ixxi sholliisookko; heer uulli gassaanom hee'llobee'aannisa issookko.

²⁴Ixxuwwi haareechcho wixakko'aannisaa kaasakko'aannisaa; uullannem nigga massubee'i kaashshisa; Waa'i hafachcha asse'oohaare qaqqisom goggamo; gaaphphisam binnita'a bi'llamo.

²⁵Keesammi Waa'i «Eehaare eese ayyenne akeekansitakkamo? Ayyendu kobi'llansitakkamo?» yoolla.

²⁶Xabbitakka'a iima'n kolli moo'llehe! Ka moo'llakkam boollaankuwwa qooccukkok ayyette? Ixxi o'l gogoxxisa awwonsookko; ixxuwwikim xig hinkaa'nda'e la'ookko; annannichchom ixxi gaqqi summinne weeshookko; ixxek malaayyii wodii hore'em lobane; ee bikkina ixxuwwiinsi matim bi'ooyyo.

²⁷Yaaqoob shumo'i ikkakko'i Isra'eela! «Waa'i eese moo'imma uraakko; hanqo'i oogato hoogummaare cawwaa uraakko» yitaa qaraattoottok mahinatte?

²⁸Hore'em laqqooyyonnihe? Hore'em macceessittoyyonnihe? Waa'i heer heerina hee'oo Moollanna; ka uulli hundam qooccukkok ixxotte; ixxi hore'em hoogooyyo te'im ceemooyyo; ixxi sawwitem saarayyaa la'ookkok matim bee'e.

²⁹Ixxi hoogu keenina malaayye uwwookko; qacu keenom qoxxisookko.

³⁰Woraadduwwam yakkota'n hooggamo; ceentamome; harde'uwwim qacca'a ubbamo.

³¹Ihukkaarem Waa'anne amma'nnanta'a hee'llam keen ixxuwwi malaayye haareechchissamo; gaaqichchisam ladinne barattamo; geettamo; ceentamoyyo; mattamo hooggamoyyo.