Read Hadiyya Issaayyaas Kitaaba 41 Bible Online

Issaayyaas Kitaaba 41 - Hadiyya bible

Issaayyaas Kitaaba 41

¹Waa'i «Ki'nnuwwi wo'inne kibbamaakkoo uullanne hee'llakkam minaadaba, cawwitakka'a macceessehe! Minaadab malaayye qoxxisona; i illagennem hincaa wocona; oogaxxi dummichchanne edammona.

²«Kaa'ookkoka eelliinchi firiinsi ki'isaa eebukkok ixxena awwaadoo'isinam weeshukkok ayyette? Mulli minaadaba higisaa ixxena uwwukko; adilluwwam ixxi illagenne ubbuusukko; ixxi bisa'inne aphphisaa di'llisa binnaa'ukko; ixxi xiyyinnem hafachchanne binnu gaaphphisa issukko.

³Ixxuwwa hollansukko; matem hawwi bee'em illagenne higaa marukko; ixxi lokkim gaassi hance'aa la'oobee'i googo taakke'ukko.

⁴Kaka baxukkokii issukkokii agannika siyya'a qoodookkok ayyette? An Waa'i illageenim hee'ummo; ka lasagem hee'oommok anette.

⁵«Wo'inne kibbamaakkoo uullanne hee'llam minaadab an issummi luwwi hundam moo'llo'ookko; ixxuwwim baachchinne huxe'llo'ookko; wixxita'atim i beyyo waatto'ookko.

⁶Mat mullaannina hara'mmookko; abbaayyim abbaayyina ‹Qoxxe!› yookko.

⁷Angi bax qooroom yoo manhchi worqa muccussoo mancho qoxxisookko; qophpha'n waa'a heedinne cabbaraa lii'llisookkokim musmaarinne aphphisukkuuyyi amaxxansaa baxoohaannina ‹Qoxxe! yookko; qophpha'n waa'i mikmikoobee'isa issita'a mat beyyonne musmaarinne tollitamo.

⁸Ihukkaarem iina awwaadaanchi Isra'eela, I minaadab ikkoo'isina doo'llummi at i kobichchi Abrihaam shumo'o.

⁹An keese uulli tochchiinsi worummo; qee'l uulliinsim keese weeshummo; ‹At i awwaadaancho› yaa keese doo'llummo bagaan uunjummoyyo.

¹⁰An kiinninne maqirette ihummi bikkina baddititte; An kiina Moollanni ihummi bikkina muggititte. An keese qoxxisoommo hara'mmoommome; kaachcha uwwoo i wodinnem keese bakkiisoommo.

¹¹Keesenne quuqqo'i keen hundim kaa'anta'a tuuttamo; kiinninne uullixxantam keen hundim bi'llammo; hore'em hee'llobee'aannisa ikkamo.

¹²Ki diina'a hassootto; ihukkaarem ixxuwwa siiddooyyo. Kiinninne orantam keenim hore'em hee'llobee'aannisa ikkamo.

¹³‹Hore'em baddititte muggititte; kiikka makki anga amadaa hara'mmoommo› yaa keese qoxxisansoommok an ki Moollanni Waa'ana'e» yukko.

¹⁴Waa'i «Daquuchchi'nno'i qacaalli Isra'eela, an kiina hara'mmoommi bikkina baddititte. Keese gatisoommi Isra'ee'l keesammi anette.

¹⁵Oono'o, an keese haareechchi qare'aalli inqi yoo hurbaata ganakkam mu'uxxisa issoommo. Duunnuwwam hurbaaxxisa gantootto; hoffi duunnuwwam gantaa gaab issitootto.

¹⁶Iimanenne axuruunsitootto; hafachchim fii'aa massookko; hambu'llamim binnaa'ookko; ee ammane an kiina Waa'i ihummi bikkina liirantootto; Isra'ee'l keesammi ihummi eesennem nuura siiddootto.

¹⁷«Buxii hawwaanii wo'o hassamo; siiddamoyyo; ixxuwwi leella'im xeebinne gogoohaare an Waa'i ixxuwwi uunxato macceesoommo; an Isra'ee'l Waa'i hore'em ixxuwwa uunjoommoyyo.

¹⁸Gogaalli duunnuwwanne daajjuwwi daadoo'isa issoommo; cebbuwwannem dadoo bu'uwwa fooqaa'oommo; uulli udma'uwwam wo'i delbi issoommo; gogaalli uullim bu'i daadoo beyyi ihookko.

¹⁹Digiba, giraara, barsanaataa weeraa uulli udma'anne mutisoommo; gogaalli uullannem digib, hoom, saate'ii weerii wo'mmaakkoo doom issoommo.

²⁰Iikki Waa'i angi ka hundam issukkisa anim Isra'ee'l Keesammi kaka qooccummisa hundim moo'aa xassoo'isinaa qoossaa la'oo'isinatte» yukko.

²¹Isra'ee'l adil Waa'i «Ki'nnuwwi mulli minaadaba, meto'o ku'llehe; naqaasham hincaa'llehe.

²²Woshshoom ihoo ammane lanqoommisina hanenne ihoo luwwi hundam hino'o ki'nnuwwi waa'uwwa eebbehe niina kuttona; kanniinsi illageen ihu luwwi hundam hino'o niina kuttona; tiratoomam mat mat issita'a niina la'issona.

²³Ki'nnuwwi waa'uwwi ikkakko'isa lanqoommisina hanenne ihoo luwwi hundam hino'o niina kullehe; ki'nnuwwina ha'yyoolas hino'o er luwwa issehe; te'im moo'nnaa ki'nnuwwa baddinaa hambalaachchammoommisina boobana dilliissehe.

²⁴Ki'nnuwwii ki'nnuwwi baxii awwaad bee'ane. Ki'nnuwwina otossiteena hassam keenim shigigaa'llam keeno.

²⁵«Mato awwonsaancho hanaa'n qariinsi ki'saammo; ixxim waarookko; eelliinchi firiinsi waarookkok i summa weeshoohane; buchchi mu'uta baxoo manchi mu'uta baxakkam hara hance'oo'isam ixxim gassaano ha'llisa hance'ookko.

²⁶Neese lanqoommisinaa hanqame yinoommisinaa gaassiisiinsi ki'isaa kaka wocukkok ayyette hee'ukko? Ka quuxo caakkisaa kurukkok te'im alallaatukkok ki'nnuwwiinsi matem sagaram wocukkok bee'e.

²⁷Luxxeka ka alallaato Xiyoonina kurummok anette; Yerusaaleeminam mishiraachcha kuroo asse'amaancho asse'aammo.

²⁸Qophpha'n waa'uwwi kolli daba'llaa moo'ummi ammane ixxuwwiinsi mat sagaram wocookkok hee'ukkoyyo; matim i xa'mmichchina dabachcha uwwukkoyyo.

²⁹Ee bikkina ku qophpha'n waa'uwwi hundim awwaad bee'i keeno; maham issiteena xantamoyyo; malaayyi bee'i keenoo hoogaanoo» yukko.