Read Hadiyya Issaayyaas Kitaaba 42 Bible Online

Issaayyaas Kitaaba 42 - Hadiyya bible

Issaayyaas Kitaaba 42

¹ Waa'i «An malaayye uwwoommok, doo'llummokii ixxonnem liiramoommok i awwaadaanchi kane. I Ayyaana ixxonne dilliisoommo; minaadab hundim ixxim hanqo'i oogato'o siidoo'isa issookko.

²Ixxi sagara iimaa'aa wocooyyo; te'im shuurooyyo; afu beyyi hundannem wocooyyo.

³Diqamu shomboqo'om ihuta'n iiqooyyo; wiriiroo fatiram xoo'isooyyo; ixxi amma'nnanchinne manni hanqo'i oogato'o siidoo'isa issookko.

⁴Uullanne hanqo'i oogat hee'oo'isa isseebe'e; ixxi ceemooyyo; neeyyatom murooyyo; wo'inne kibbamaakkoo uulluwwanne yo'i minaadab ixxi seeranne amma'nnantamo» yoolla.

⁵Iimane qooccukkok; tochchiinsi tochchi afeebe'e biddiqaa'ukkokii uullaa uullanne yoo luwwaa hundam qooccukkokii fooree fooshshaa ixxuwwina uwwu Moollanni Waa'i

⁶«An Waa'i muccuroominne keese weeshaammo; ki angam amadoommo; keesem egeroommo; keese i minaadabina hidi'l saga'llisa eese laqqambee'i minaadabinam caakkisa ikkoo'isa issaammo.

⁷Ee bikkina qooqquwwika ille fooqaa'llootto; tuunsonne karaxxi minenne; yo'i keenom fissitootto.

⁸«Waa'i anette; i summim eehaneme; i lomba mulli keenina galatam anginne baxamu misilluwwina higisaa uwwoommoyyo.

⁹An gaassaa wocummi woshshuwwi hundim wo'mmaakko; kaba odim haareechchi woshsha kuroommo; mutoo'n illageenim ki'nnuwwina la'isoommo» yukko.

¹⁰Waa'ina haareechchi mazmuura zammallehe; heer uulli minaadab hundim galaxxi mazmuura hincaa'llehe. Dambalaq woronne yo'i keen hundim tochchi uulluwwii ee beyyonne hee'llam keenii hundim galaxxitona.

¹¹Udma'i uullii ee uulli beero'uwwii ee'isam Qeedaa'l minaadab hee'oo gattii sagara iimaa'ona. Seela'i beero'i manni liirammatinne zammarona; duu'n ludonnem firaa ilillaaxxi sagara macceesisona.

¹²Waa'inam lomba uwwona; Wo'inne kibbamu uulluwwannem galata alallaatona.

¹³Waa'i wodaam manchisa gaadookko; orina sagara iimaa'aa sha'llamookko; mat o'l manchisam quunqinne ki'ookko; ixxi diina'am kaa'ookko.

¹⁴Waa'i «Qeeraa'l doollina iyyaqqummo; cawwaa urummo i gagam egexxummo. Ihukkaarem kaba baxoommi amman afaakko; xuuchchi amadu meentichchosam laaroommo; nadajji fooshsham fooshshe'oommo.

¹⁵Lob duunnuwwaa hoffi duunnuwwaa bi'isoommo; ixxuwwanne mutu hixee haqqaa hundam gokkisoommo; daajjuwwam gogaalli uulli issoommo; wo'i delbuwwam gokkisoommo.

¹⁶«Illi qooqquwwa kanniinsi illageen matta'a laqqambee'i googonne awwonsoommo; gaassi laqqambee'i googinne massoommo; ixxuwwi illagenne ifiisamaakkoo tuunsom caakkanne dabaroommo; aagammi firammi ihu beyyom gudisoommo; ka hundam an issoommo; ixxuwwam uroommoyyo.

¹⁷Ihukkaarem qophpha'n waa'uwwanne amma'nnantam keen misilluwwinam ‹Ki'nnuwwi ni waa'uwwa› yitam keen hundim laso daba'llitamo; hore'em sholle'llamo.

¹⁸«Ki'nnuwwi macci gawwaakkoo keen hundichchim macceessehe; ki'nnuwwi qooqquwwim xishshaa'llakka'a moo'llehe.

¹⁹I awwaadaanchiinsi loboka qooqukkok ayyi yookko? An asse'ummi awwaadaanchiinsi loboka gawwukkokdu ayyette? Iina amma'nnamaakkoo manchisa qooq ayyi yookko? Waa'i awwaadaanchi'nno'i qooq ayyette?

²⁰Isra'eela, at lobakat luwwa moo'llaatto. Ihukkaarem tiiro issitaa qoossittoyyo; kiikki maccuwwi fooqaakoo keeno ihukkaarem macceessooyyo» yoolla.

²¹Waa'i ixxi muccuroo'm bikkina ixxi seera iimiimaakkoohanee lombaamoo issimminne liiramukko.

²²Ihukkaarem ku minaadab boganta'atii abdaadanta'atii ba'l woronne xufanta'a afuutto'ookko; karaxxi minennem aaggo'ookko; boganto'ookko; abdaadanto'ookkome; agaagaa ixxuwwa gatisukkokim bee'e.

²³Ki'nnuwwiinsi ka woshsha xassaa waaroo amma'n bikkina qoossaa macceesookkok ayyette?

²⁴Yaaqooba boganchina Isra'eelam qeefadanchina higisaa uwwukkok ayyette? kaka issukkok neese hawwondummi Waa'ayyonnihe? ixxi hasoo'isanne hee'lleena ixxi seerinam ijaajanteena hasso'oyyo.

²⁵Ee bikkina ixxeka aphphoo quunqa o'llekam boobana ixxuwwanne dilliisukko; gii'l labaninnem kibbukko; ihukkaarem ixxuwwi qoossito'oyyo; shokkiisukko; ihukkaarem ixxuwwi hindihito'oyyo.