Read Hadiyya Issaayyaas Kitaaba 44 Bible Online

Issaayyaas Kitaaba 44 - Hadiyya bible

Issaayyaas Kitaaba 44

¹Waa'i «Ihukkaarem i awwaadaanchi Yaaqooba, an doo'llummi Isra'eela, macceese.

²Keese qooccummok, goosannem baxummokii haara'mmoommokii anette; i awwaadaanchi Yaaqooba, an doo'llummanee iittoommanee ikki bikkina baddititte.

³«Xeebe'u uullanne wo'i; gogu uullannem daajji daadoo'isa issoommo; i ayyaana ki shumo'onne i maassom ki oos oosonne dilliisoommo.

⁴Ixxuwwi Wo'o erisa agu hixisa daadoo bu'i gadanonne yoo Ahaayyi haqquwwisa amman hundam lattam keen ikkamo.

⁵«Mat ‹An Waa'ane› yookko; mullekim Yaaqoob summinne weeshamookko. Odim mullek ‹An Waa'ane› yaa ixxi gaqqi wodanne kitaabookko; ixxi gagam Isra'ee'l summinne weeshookko» yoolla.

⁶Gogoxxi Moollanni, Isra'ee'l minaadabina adilaa gatisaanchoo ihu Waa'i «Illaqqekii lasaqqekim anette; iinniinsi bagaan mulli Waa'i bee'e.

⁷Hino'o, iinni'nnoo'ok ayyette? yoolas wocona; hino'o, i illagenne naqaasha hincaa'ona. Gaassi i minaadaba uumummuuyyi mah hee'uda'e hanenne iheena yoo luwwi mada'e kurona; hanenne waaroo luwwi bikkinam gaassaa kurona.

⁸I minaadaba, badditakkotte; muggitakkotte; gaassi doolliinsi ki'isaa kaballi afeebe'e hanenne ihoo luwwa hundam gaassaa ki'nnuwwina kurummoyyonnihe? Te'im moo'isummoyyonnihe? ka woshshinam ki'nnuwwi iina naqaashshuwwa; Iinniinsi mullek Waa'i yoohonnihe? Hincakka'a maaxamakkam girbi ihoo iinniinsi mullek hore'em bee'e! Ayyem la'oommoyyo» yoolla.

⁹Qophpha'n waa'uwwa baxxam keen hundim awwaad bee'i keeno; oo waa'uwwi kora'i keenome; ixxuwwina woccam keenim qooqquwwa; ixxuwwim lachchi bee'i keen ikko'i bikkina tuuttamo.

¹⁰Mahinam awwaadoobee'i qophpha'n waa'a baxookkok eekkam axisookkok ayyette?

¹¹Qophpha'n waa'a baxoohane bagaan mullaneyyo. Ixxii ixxo labbam keenii tuuttamo; hundim wixxita'a mateeyyanne uullitona; muggitamo; sholle'llamo.

¹²Misila baxeena xaara tumoo manchi xaara massaa giiranne bukkookko; ee xaaram axiseena qoxxaalli wodinne madooshinne aphphisookko; eekka baxoo ammanem sibaarookko, xeebe'ookkoo qondoodookkoo.

¹³Anga qoor manchi usinne keenookko; irisaasinne mare'e issaa hanenne haxara fissookko; huufakkam mu'utinnee mulli mu'utinnem huufaa axisaa mishisoo manni hagaranne dabarookko; ee lasage qophpha'n waa'ina otossakkam beyyonne dissookko.

¹⁴Eekka isseenam digiba murookko; oda'a te'im weddeeshsha doo'llaa haqqoronne yoo haqqinne maqirem li'ona urookko; te'im hooma kaasookko; eekkam xeen li'isookko.

¹⁵Manni mat haqqiinsi kolloo giirina kolloo qophpha'n waa'a baximmina awwaaxxookko; odim kollo giira giiraa iibbixxeenaa hurbaata sareenaa awwaaxxookko; gatu qaxam cabbaraa qophpha'n waa'i misila baxaa ixxi illagenne heeshaa otossookko.

¹⁶Gatu kollinne giira giiraa hurbaata sarookko; maaram saraa goddeebe'e itookko; iibbixxaa lasonnem «Hashshu iibboolla! Danaam giira!» yookko.

¹⁷Eehanniinsi gatu haqqam qophpha'n waa'i issaa baxaa eehanni illagenne heeshaa otossimminne «At iina moollanna; eese gatise» yaa uunxookko.

¹⁸Eehido'i manni matem luwwam la'ooyyo; qoossooyyo; moo'oobee'isam illi gunguussamaakko; qoossoobee'isam wodan ifiisamaakko.

¹⁹Ayyim hindihukkoyyo; lachchi te'im qoossimbee'i bikkina «Haqqa muraa kollooma giirummo; ee gii'l kasharannem hurbaata sarummo; maaram saraa itummo; eehannah gatu haqqinne hinkid shigigaa'oo luwwa baxoommo? Gudeerindu otossimmi hasisoohonnihe?» yeena xanukkoyyo.

²⁰Eehido'i manchi gii'l buchcha itookko; qawwoo'm sawwit ixxo huushisaakko; ee bikkina ixxi gaga gatiseena xanooyyo. Ixxim «Ku i makki anganne yoo qophpha'n waa'i hanqo'i waa'ayyo» yeena xanooyyo.

²¹Waa'i «Isra'eela, at iina awwaadaancho; Yaaqooba, kaka sawwihe; an keese baxaammo; at i awwaadaancho; Isra'eela, an keese xadoommoyyo.

²²Ki hawwojja duuphphisa, ki baaxiilom witriichchisa bi'isaammo. Keese gatisummi bikkina i kolli daba'lle» yoolla.

²³Waa'i ixxi minaadab ihu Isra'eela gatisimminne ixxeka lomba moo'isaakko. Ee bikkina ki'nnuwwi iimannuwwi liiranchinne zammallehe. Uulli xillim ililihe; duunnuwwi, doommuwwii haqquwwii hundim liiranchinne buraaqqehe.

²⁴Kiyyummi godabonne uumu keese gatisaanchi Waa'i «Hundem luwwam qooccummok, iimane mullam biddiqaa'ummokii uulla mullam dahummokii Waa'i anette;

²⁵Qophpha'n hiraagaa'nneka mare'e bi'isoommo; gennaa'nneka kiirimma awwaad bee'an issoommo; qoolluwwi qooroomam himbiriiqoommo; ixxuwwi qooroomam qawwoom issoommo.

²⁶Ihukkaarem i awwaadaa'nneka asso wonshoommo; i asse'amaa'nneka sogitano qoxxisoommo. Yerusaaleema, ‹Manni hee'oo beyyi ikkootto› yoommo. Yihuxxi beero'uwwim ‹Odim baxamookko; gindamu luwwam areesoommo› yoommo.

²⁷Cambalaqina ‹An daajjuwwa gokkisoommi bikkina at goge› yoommo.

²⁸Qiiroosinam ‹Ixxi i allaaraancho; i sawwite hundam wonshookko› yoommo. Yerusaaleemina ‹La'mmaagge baxamona› Keesammi Minim ‹Shooho'amona› yookko yoommo» yoolla.