Read Hadiyya Issaayyaas Kitaaba 45 Bible Online

Issaayyaas Kitaaba 45 - Hadiyya bible

Issaayyaas Kitaaba 45

¹Minaadaba hundam gassoo'isa issummi, adilluwwika lomba sheelatoo'isa issummi, gooccuwwi xufamoobee'isa ixxi illagenne fooqaa'oommi, an ixxo doo'llaa makki anga amadummi Qiiroosinaa an Waa'i

²«An ki illaginne maroommo; duunnuwwam shiraashiroommo; naas xaa'l gooccuwwam iiqoommo; xaa'l qirqire'uwwam muransoommo.

³Tuunsonnee daphphi beyyonnee wixxaakkoo amaxxa kiina uwwoommo. Ee'isinne keese ki summinne weeshoommi Isra'ee'l Moollanni Waa'i ihummisa laqqootto.

⁴An doo'llummi Yaaqooba, Isra'eela hara'mmitoo'isina at eese laqqibee'aarem an keese ki summinne weeshaammo; Lombi summam kiina uwwaammo.

⁵«Waa'i xale'i anette; iinniinsim bagaan ayyim bee'e. Iinniinsi bagaan mulli Waa'i bee'e. At eese laqqibee'aarem an kiina malaayye uwwoommo.

⁶Kakam issoommok eelliinchi firiinsi ki'isaa eelliinchi aaggi afeebe'e; xale'i iinniinsi bagaan mulli Waa'i bee'isaa manni la'oo'isinatte. An Waa'a; iinniinsi mullek ayyim bee'e.

⁷An tuunsoo caakkaa qooccummo; goddaa buxoomaa eeboommo; an Waa'i ka hundam issoommo.

⁸Iimannuwwa, muccurooma xee'nnisa ga'nnissehe; duubbuwwim aad kiffehe; uulli fooqihona; xummim mutona; muccuroomim maqirem li'ona; an Waa'i qooccaammo» yoolla.

⁹Buchchi mu'utiinsi baxukkaanninne fitamoohaannina aayye! Dor buchchi mu'uta baxoohaannina «Maha baxxoolla?» yoohonnihe? At baxxoo baxdu «Kiina angi bee'e» yoohonnihe?

¹⁰Annina «At qattittok maha?» yoohaannina te'im amana «At xuu'llittok maha qatteenatte?» yoohaannina aayye!

¹¹Isra'ee'l Keesammi, qooccaanchi ihu Waa'i, Waaroo luwwi bikkina «I oos bikkina eese xa'mmitakkammonnihe? I angi bax bikkindu eese ijaajjakkamonnihe?

¹²Uulla baxummok anette; mannam ixxi hanenne qooccaammo; i angi iimannuwwa biddiqaa'aakko; iima'n gogotam ijaajoommok anette.

¹³«Qiiroosa muccuroominne ki'isaammo; ixxi maroo googom an xabbaa'aammo; i beero'i odim baxookko; iikka qeefadanto'i keeno miqo'i bee'em wolabbanonne fissookko» yoolla. Kaka wocukkok gogoxxi Moollanni Waa'a.

¹⁴Waa'i «Gibxi amaxxii Tophphe'i dadda'l mu'utii kiihan ihookko; uullichcha qeeraa'l ihu Saaba'i mannim ki kolli waarookko; kiihanem ihookko; ki lasom awwonookko. Chimchiminne karamaa ki kolli waarimminne ki illagenne heeshaa ‹Hanqinam Waa'i kiinninnette; ixxeensi bagaan mulli Waa'i bee'e› yukkuuyyi uunxookko» yoolla.

¹⁵Gatisaanchi Isra'ee'l Waa'a, at hanqinam ki gaga daphphaa'lloo Waa'a.

¹⁶Qophpha'n waa'uwwa baxxam keen hundim tuuttamo; sholle'llamome; hundim mit ikka'a sholle'llamo.

¹⁷Ihukkaarem Isra'eel Waa'inne heer heeraxxi gatimma siixxookko; ki'nnuwwi heer heerinam tuuttakkamoyyo; sholle'llakkamoyyo.

¹⁸Iimane qooccukkok; ixxi Waa'a; uullam axisukkok, baxukkokii shooho'ukkokii heechchi beyyi ihonatte bagaan diih ihona qooccubee'i Waa'i «An Waa'a; iinniinsi bagaan mullek bee'e.

¹⁹An maaxaqqanne tuunsi beyyonne wocummoyyo; i sawwitem maaxummoyyo; Yaaqoob shumo'ina ‹Kora'am eese hassehe› yummoyyo. An Waa'a! Wocoommokim hanqa; hanqo'an ihu woshsha alallaatoommo.

²⁰«Uulli hundiinsim mulli minaadabiinsi xottakka'a daba'llitakko'i keen hundim mateeyyoominne wixxitakka'a waallehe; i koollonnem hinci'llehe! Haqqinne baxamu misilluwwa iyyitam keenii gatiseena xanoobee'i waa'uwwa uunxitam keenii lachchi bee'i keeno.

²¹Waallehe; ki'nnuwwi meto'o ku'llehe; caakkissakka'a kullehe. Ki'nnuwwi bikkina fitantam keenim issena'i issem a'llantona kullehe; hanenne ihoo luwwi bikkina gaassaa hiraago wocukkok ayyette? An Waa'ayyonnihe? muccuraa gatisaanchoo ihu Waa'i iinniinsi bagaan ayyim bee'e; iinniinsi bagaan mulli Waa'i bee'e.

²²«Uullanne hee'llakkam minaadab hundim gattakkamisina i kollonne daba'llehe; Waa'i xale'i anette. Iinniinsi bagaan mullek bee'e.

²³Dabassamoobee'i hanqo'i neeyyato uwwummuuyyi i gaganne hide'aatette; hundim i beyyo waaraa i illagenne guruphphookko. I summinnem hide'ookko.

²⁴« ‹Muccuroomii malaayyii uwwamookkok xale'i Waa'innette› yita'a i bikkina woccamo; eese sabbam keen hundim i beyyo waatta'a tuuttamo.

²⁵Ihukkaarem Isra'ee'l shumo'i hundim iinninne Waa'inne muccuttamo; nuuram siiddamo.