Read Hadiyya Issaayyaas Kitaaba 46 Bible Online

Issaayyaas Kitaaba 46 - Hadiyya bible

Issaayyaas Kitaaba 46

¹«Beel sholle'ukko; Neebo'i iiqamukko; ku Baabiloo'n qophpha'n waa'uwwi gammaamonne iyyiisamaakko. Oohim hoogaakkoo gammaamina kee'mmaalli iyyi ihaakko.

²Qophpha'n waa'uwwim ixxuwwi gaga gatisseena xantobee'i bikkina qeefadanta'a matto'ookko; oo gammaammi heeshito'o; qophpha'n waa'uwwim sholle'llo'o.

³«Ki'nnuwwi Yaaqoob shumo'i Isra'ee'llek gattakko'i keen hundim uumantakko'i ammaniinsi ki'isaa abooyyummi keen qarantakko'i ammaniinsi ki'isaa iyyummi keen macceessehe.

⁴Lomma'nnitakka'a ki'nnuwwi horoor abo'eebe'em ki'nnuwwa erisa egeroommok anette; anetteme. Ki'nnuwwa baxaammo; iyyoommo; ki'nnuwwina hara'mmoommo; gatisoommome.

⁵«Eehannah eese ayyenne akeekansitakkamuulla? Ayyendu gudissakkamuulla? Kobi'llammoommisina ayyenne moo'ixxansitakkamo?›

⁶Manni ixxuwwika cana fooqaa'lla'a worqa fissitamo; biram keennaanchonne keentamo; ixxuwwina waa'i issaa baxoo'isinam anga qoor mannina diinate miqqamo; baxamaa lasagem ixxena aad heeshta'a otossitamo.

⁷Ki'issa'atim ixxuwwi gudumonne iyyitamo; ixxena gudisso'i beyyonnem dissitamaare ee beyyonne uullookko; ee uullu beyyiinsim mikmikeena xanooyyo. Ayyi manchim ixxi kollonne laaruta'nnim dabachcha uwwooyyo; te'im ayyem hawwiinsi gatiseena xanooyyo.

⁸«Ki'nnuwwi baaxiilaan kaka tiillehe; sawwi'llehe; ki'nnuwwi tiironnem amaddehe.

⁹Gaassika eraa'l woshsha sawwi'llehe; an Waa'a, iinniinsi bagaan mullek bee'e; an Waa'a, iinni'nnoo'ok bee'e.

¹⁰Lasonne ihoo luwwa gaassaahim hanenne waaroo luwwam eraarem wocaammo. I sawwit dabassamoobee'ane; iina liiransoo luwwi hundam issoommo.

¹¹Eelliinchi firiinsi gosoo ammachcho, qee'l uulliinsim i sawwixxeka wonshoo mancho weeshoommo; wocummoka issoommo; sawwummokam wonshoommo.

¹²«Ki'nnuwwi xiiqqantakkam keenii muccuroomiinsi qee'llitakko'oo keenii macceessehe.

¹³An muccurooma eeboommo; oo amman hore'em qee'lloyyo; i gatishshim dasooyyo; Xiyoonina gatimma Isra'eelinam i lomba eddeesoommo» yukko.