Read Hadiyya Issaayyaas Kitaaba 47 Bible Online

Issaayyaas Kitaaba 47 - Hadiyya bible

Issaayyaas Kitaaba 47

¹Waa'i «Taa Baabiloo'n baajaam landichche, dillitaa buchchanne afuure. Taa Baabiloo'n landichche, adilla'n barcumiinsi dille; uullanne afuure; ka lasage at mishissoottotane te'im qacale'ette yamantaa weeshantooyyo.

²Ee bikkina kaba liitimmi ifichcho aa'llaa hurbaata liite; gunguu'llittoka hoore; kiikka qeeraa'l eddechcha gundissaa ki duufa maxare; tartarituyya daajje eeqidonne fire.

³Ki kallemaroom moo'amona; kiikki sho'lle'n la'amona. Baado miqisoommo; an ayyenam qishixxoommoyyo» yoolla.

⁴Neese gatisoo Isra'ee'l Keesammi ixxekim summi gogoxxi Moollanni Waa'a.

⁵Waa'i «Taa Baabiloo'n landichche, tuunsi woronne aage; cawwitaa afuure; ka lasage at ‹Adilluwwi adilatte› yamantaa weeshantooyyo.

⁶I minaadabinne quuqaa hee'ummo; uullam haashaassaa hee'ummo; ki angannem higisaa uwwaa hee'ummo; ihukkaarem at ixxuwwina qishixxittoyyo; lommannannem ihukkaare kee'mmaalli gaanjaqqa iyyiissitto.

⁷Atim ‹Lasaanchi afeebe'e heer heerina adil ihoommo› yitto. Ihukkaarem kakeeno qoossittoyyo; ixxuwwi lasaanchi maha ihooda'em sawwittoyyo.

⁸«Kabadem taa heellamma! Ki gaganne amma'nnantaa hee'lloohaante! Ki tiironnem ‹Anette; iinniinsi bagaan mullek bee'e; ka lasage busaratte ihoommoyyo qaraa qachchi bee'etan ihoommoyyo› yitoottote macceese.

⁹Ihukkaarem mat ayyaamo dangonnem oo lam woshshim keesenne ihookko; maham ki gennimmannee kiirimmannee amma'nnantittaarem busaroomii qattaa qachchi bee'aannoomii malaayyaamisa waarookko.

¹⁰«Ki jor baxonne amma'nnantaa ‹Eese ayyim siidooyyo!› yitto. Odim ‹Anette! Iinniinsi bagaan mullek bee'e› yittaare ki qooroomii lachchii keese huushisaakko.

¹¹Bichchi keesenne waarookko; ki genno'im egedeena xanooyyo. Bito miqqaa dabatteena xantoobee'i hawwi keesenne afookko. Sawwittibee'i bichchi dangonnem keesenne afookko.

¹²Awwaaxxiteena xantoohan ihukkaa'lleensi ciiloommaniinsi ki'issaa awwaaxxitam hee'llitti gennimmaa kiirimmaa yakihe; ayyi la'ukko ki diina'a muggissootti ihookko.

¹³Lobakat sogitano siiddittaarem hoongiinsi fittittoyyo; aganiinsi agan afeebe'e boollaanka moo'llu'uuyyi hiraaggam keenii boollaanka xiggam keenii hino'o waattona; hino'o kaba waatta'a keesenne afoo hawwiinsi gatissona.

¹⁴«Oono'o, ixxuwwa gaaba; giirim itookko; ee gii'l labaniinsem ixxuwwi gaga gatisseena xantamoyyo; manni iibbixxoo gii'l kasharim hee'ooyyo; afuurakka'a iibbixxakkam giirim bee'e.

¹⁵Ki oosoomma'n doolliinsi ki'isaa maqire qondoodaa daddaru keen issiteena xantamok ee qaxame; annannichchim ixxi gaqqi huushanchinne marookko; ihukkaarem keese gatisookkok bee'e» yoolla.