Read Hadiyya Issaayyaas Kitaaba 48 Bible Online

Issaayyaas Kitaaba 48 - Hadiyya bible

Issaayyaas Kitaaba 48

¹Yaaqoob ooso, ki'nnuwwi Isra'ee'l summinne weeshantakko'i keen, Yihuxxi shumo'i ikkakko'i keen Waa'i summinne hide'llakkam keen, hanqinne te'im muccuroominnetti ihoo'n Isra'ee'l Waa'a weeshshakkam keen,

²«Keesammi beero'onne hee'nnommi keeno; summi gogoxxi Moollanna yamamu Isra'ee'l Waa'anne bakke'nnommi keeno» yitakkam keen macceessehe.

³Waa'i «An ka illagee'n luwwa lobakat doolliinsi gassaa kuraammo; oohim i suumiinsi firaakko; eekkam laqqakkamisa issaammo. An dangonnem baxummo; oo keenim taaphanukko.

⁴Mashka'oomim at hinkaa'nna xiiqqammaanchida'e an la'oommo. Ki axik bu'an xaara; ki miinim naas xaara.

⁵Ee bikkina an ka woshsha hundam kiina gaassaa kurummo. Iheena illageenim la'isummo. Oohim ‹I waa'uwwi kaka issito'o. Haqqinnee xaarinnee baxanto'i misilluwwi kaka qooddo'ookko› yitoobee'isinatti hee'ukko.

⁶«Ka woshsha hundam macceessaatto; hundam moo'e; oohim hanqi ihukkisa naqqasooyyonnihe? Kabadiinsi ki'isaa haareechchi haareechchi luwwa, daphphu luwwaa laqqibee'i luwwaa kiina kuroommo.

⁷Ixxuwwi qooccanto'ok kabadette bagaan gaasseyyo; ixxuwwi bikkina kanniinsi illageen macceessittoyyo. Ee bikkina ‹Ixxuwwi bikkina kanniinsi illageenim la'oommo› yiteena xantooyyo.

⁸At macceessittoyyo; te'im laqqittoyyo; gaassi doolliinsim ki'isaa macceesseena hassoobee'an hee'ukko; at qawwiisaanchi hee'llittisa oosoommaniinsi ki'saa boqqa yamantittisa la'aammo.

⁹«I summi bikkina yaa i quunqa egexxoommo; galaxxameena yaa iyyaqqoommo. Oohim keese muransaa bi'isoombee'isinatte.

¹⁰Oono'o, an keese kin bi'llis ihubee'aarem bukkaa muccussaammo; hawwi midachchannem keenaammo.

¹¹An i gaqqi bikkina; i gaqqi bikkina yaa issoommo. I gaga hinkid sholliisoommo? I lombam ayyenam uwwoommoyyo» yoolla.

¹²Waa'i «Yaaqooba, an weeshummi Isra'eela, macceessehe; an anetteme; luxxekim anette; lasaanchim anette.

¹³Uulla i angi shooto'aakko. I makki angim iimanenne biddiqaa'aakko; an weeshoommi ammane hundim mateeyyanne uullitamo.

¹⁴Waa'i «Hundim mateeyyoominne Wixxitakka'a macceessehe; waa'uwwiinsi gaassaa ka keeno wocukkok ayyette? An doo'llummi i kobichchi ixxi suwwixxeka Baabiloonanne issoo'isa issoommo. Ixxi wodim Baabiloona aphphisookko.

¹⁵An i gagim wocaammo; hanqo'isam an weeshaammo. An ixxo woroommo; ixxi baxim ixxena taaphanookko.

¹⁶I kollonne hinci'llehe; kaka macceessehe; gaassi doolliinsi ki'isaa maaxaqqanne wocummoyyo; oo luwwi hundim ihukkuuyyi an eehe'enne hee'ummo» yoolla. Kabadem eese Moollanni Waa'ii ixxi Ayyaanii asse'aakko.

¹⁷Keese gatisaanchi Isra'ee'l Keesammi Waa'i, «Kiina e'lloo luwwa hundam losisoommi at marimmi hasisoo googo awwonsoommi ki Moollanni Waa'i anette.

¹⁸«I ijaajo qoxxitaa macceessaattoota'n ki xummi daajjisa, ki muccuroomim dambalaq wo'i moo'llisa iham hee'ukko.

¹⁹Ki shumo'im shashsha'llisa, ki oosim uulli buchchisa iham hee'ukko. Ixxuwwi summim i illagiinsi shiinshamoo'n hee'am hee'ukko» yoolla.

²⁰Baabilooniinsi fillehe; Baabiloo'n manni uulliinsi gibbehe. «Waa'i ixxena awwaadaanchi Yaaqooba gatisaakko» yoo mishiraachchi sagara lobakat liiranchinne uulli tochchi hundam afeebe'e alallaattehe.

²¹Waa'i ixxuwwa udma'anne awwonsu ammane wo'o xeebe'llo'oyyo. Wo'i kiniinsi firoo'isa issukko; kina foshokaa'aa wo'o malaayyaamisa daassukko.

²²Waa'i «Boqqi keenina xummi bee'e» yoolla.