Read Hadiyya Issaayyaas Kitaaba 49 Bible Online

Issaayyaas Kitaaba 49 - Hadiyya bible

Issaayyaas Kitaaba 49

¹Qee'l uulli tochchonnee wo'inne kibbamaakkoo uullannee hee'llakkam minaadab macceessehe. Iyyummi godabonne hee'ummuuyyam Waa'i eese weeshaakko; qaramoo'nnim gaassaa i summinne weeshaakko.

²I sagara qare'aalli bisa'isa issukko; ixxi angi haforonnem daphphaa'ukko. Aanshamaa shiinshamaakkoo xiyya'isa issukko; ixxi seejji woronnem maaxukko.

³Ixxim «Isra'eela, at iina awwaadaancho; an i lomba keesenne la'isoommo» yukko.

⁴Anim «Awwaad bee'i luwwanne lobakata qondoodummo; kora'i luwwannem i malaayye guullummo; ihukkaarem Waa'i i hanqa gudsookko; i bitom i Waa'i miqookko» yummo.

⁵Waa'i eese lonsaakko; i malaayyi hundim ixxotte. Ixxi awwaadaanchi ihoommisina iyyummi godabonne uumukkok, Yaaqooba ixxi kollonne dabaroommisina Isra'eela ixxi kollonne wixxaa'oommisina issu Waa'i kabadem

⁶«At i awwaadaanchi ihimmi, Yaaqoob shumo'o odim dabattaa an egerummi Isra'ee'l oosom dabattaa worimmi kiina sholle'aalla. An keese heer uulli hundinam qaraar ikkoo'isina, mulli minaadab hundinam keese caakki issaammo» yoolla.

⁷Gatisaanchi ihu Isra'ee'l Keesammi Waa'i lobakata gadamaahii minaadabim ceemaahii gassaaninam awwaadaanchoo ihukkaannina «Adilluwwi keese moo'lla'a uullitamo; adilluwwi oos otossitamo. Mashka'oomim keese doo'llu Isra'ee'l keesammi Waa'i ammi'nnamaakkohan ihu bikkinatte» yoolla.

⁸Waa'i «An doo'llamaakkoo ammanenne macceesummo; gatimmi ballannem hara'mmummo. An keese egeroommo; ka uulla baxxoo'isina, diihaakkoo uulla annannichchinam dabbattaa uwwitoo'isa issoommo.

⁹Anim qeefadanta'a hee'llam keeno ‹Waallehe fillehe› tuunsonne hee'llam keenom ‹Caakkanne fillehe› yitoo'isa issoommo. Ixxuwwim googonne hundannem ittamo; mahim bee'i duun hundannem fella'isa allaa'llitamo.

¹⁰Sibaarii xeebii ixxuwwa amadooyyo; udma'i uulli iibbi te'im eelliinchi ixxuwwa shokkiisooyyo. Ixxuwwina qishixxookkok awwonsookko; wo'i bu'i yoo kollonnem massookko.

¹¹I duunnuwwa hundam goog issoommo; I bobba'uuwwim axisamookko.

¹²Oono'o, qee'l uulliinsi waattamo; mat mat keen hanaa'n qariinsi mulli keen eelliinchi aaggiinsi mulli keen odim Siinii'm[3] uulliinsi waattamo» yoolla.

¹³Waa'i ixxi minaadaba qoxxisaakko; hawwaaninam qishixxaakko; ee bikkina iimannuwwi ilil yi'llehe; uulli liirame; duunnuwwim liiranchinne zammallehe.

¹⁴Ihukkaarem Xiyoon, «Waa'i eese uraakko; Moollannim eese xadaakko» yukko.

¹⁵Waa'i «Ama iicissam is ciila xaddamonnihe? Qatto'i ciilindu qishixxitamoyyonnihe? Ayyi la'ukko ise xadeena xantamo; Ihukkaarem an keese hore'em xadoommoyyo.

¹⁶Oono'o, an keese i angi oobbanne kitaabaammo; an ki qasha hundi ammanem egeroommo.

¹⁷Ki goo'n oos daba'llita'a waattamo; keese gindansito'i keenim kiinniinsi gibbamo.

¹⁸Ki gaanje iimmaa'llaa ki kululleeta moo'e; ki goo'n oos hundim wixxaa ki beyyo waarookko. Hanqinam an hee'oommi Waa'a; ‹ka keen hundam wereeggina idaayyuwwisam xuubaa'nnitootto› yoolla.

¹⁹«Gindantaa udma'i ikkittaarem ki uullim hore'em bi'ukkaarem, kaba ki minaadabina xuqqitootto. Keese xuuxxo'i keen hundim kiinniinsi qee'llitamo.

²⁰Kichchechchinne hee'llitti doollenne qaranto'i ki oos, at macceessittuuyyim ‹Ku beyyi niina lobakata xuqqaakko; niina ihoo haraar beyyo uwwe› yitamo.

²¹Atim ki tiironne ‹Ka ooso iina ayyi qarukko? An kichche'aanchoo alceennaa hee'ummo; qeefadamaammoohanee gadamaammoohanee hee'ummo; ka oos hundam iina ayyi li'isukko? An mullam gataa hee'ummo; eehaare ku oos hundim hanniinsi waatto'o?› yitootto» yukko.

²²Moollanni Waa'i «Oono'o, mulli minaadaba mare'inne weeshoommo. I mare'e dut mulli minaadabina iimmaa'oommo. Ixxuwwim kiikka goo'n ooso qaaphphita'a eebbamo; ki landam gudumonne iyyitamo.

²³Adilluwwi keese li'issam anno'o; ixxuwwi meentim keese abooyyitam keen ikkamo. Ixxuwwi horoore aad heeshaa'lla'a kiina otossitamo. Ki lokki diram aallitamo. Atim ee ammane an Waa'i ihummisa laqqootto. Eese neeyyatinne egettam keen tuuttamoyyo» yoolla.

²⁴Hanqinam wodaam gaadaanchiinsi maate'e ubbuusisimmi mogaalli manchiinsi qeefajjo'o gatisimmi xanamoohonnihe?

²⁵Ihukkaarem Waa'i «Hanqame; wodaam gaadaaniinsi qeefajjo'o massakkamo. Mogaalli keeniinsim maate'e bogakkamo. An kiinninne wocantam keeninne wocamoommo. Ki oosom gatisoommo.

²⁶Keese u'nnisam keen ixxuwwi gaqqi maara ittamisa issoommo; woyi'n diqaasinne dimbitamisa ixxuwwi gaqqi xiiginnem dimbitamo. Eehanniinsi ki'aa manni shumo'i hundim an Waa'i kiina qaraare; keese gatisaanchoo Isra'ee'l malaayyaamoo ihummisa la'ookko» yoolla.