Read Hadiyya Issaayyaas Kitaaba 5 Bible Online

Issaayyaas Kitaaba 5 - Hadiyya bible

Issaayyaas Kitaaba 5

¹An i beshichchi bikkinaa woyi'n kaashshi beyyi bikkinaa zammaroommo. I beshichchina duu'n harishanne woyi'n kaashshi beyyi hee'ukko.

²I beshichchi uulla abuullaa kina feeraa fissukko; doo'llam woyinam ee beyyonne kaasukko. Ee kaashshi lambe'ennem egerakkam godo'o baxukko; misha ciinsakkam barem hinukko; ee lasage er misha mishookkoo yaa egerukko. Ihukkaarem qaraaroo misha mishukko.

³Ee bikkina i beshichchi «Yerusaalee'm minaadabaa Yihuxxi minaadaba! Hino'o, i lambe'ennee i woyi'n kaashshi lambe'ennee yoo woshshi moo'llakka'a oogattehe.

⁴I woyi'n kaashshi beyyina issumbee'i luwwi yoohonnihe? Eehanniinsi mulleka issimmi hasisoo luwwi yoohonnihe? Eehaare er misha mishookkoo yaa egerummaare mahina qaraaraalla mishukko?

⁵«Kaba an i woyi'n beyyonne issoommi luwwi kane; kululleetanne yoo qasha gindoommo; moochchi allaa'lloohanee daabbaroo beyyoo issoommo.

⁶Ee lasage oo woyi'n beyyo shuqunamoobee'i udma'i uulli ihoo'isa issoommo. Uttinnee halluttinnee ifiisamoo'isa issoommo; xeenim ga'nnoobee'isa duuba ijaajoommo» yukko.

⁷Gogoxxi Moollanni Waa'ina woyi'n beyyoo yamamukkok Isra'ee'l minaadaba. Yihuxxi minaadab ixxi liiramoo kaashshisa; ixxuwwi er baxo baxxamo yaa neeyyato issaa hee'ukko; ihukkaarem manna shitam keen ikko'o. Hanqa oogattamo yaa neeyyato issaa hee'ukko; ihukkaarem hanqa bi'isso'i bikkina minaadaphphek laachchi lophphukko.

⁸Mulkee'nneka abuulli uulla hoo'lliteenaa uulla xale'i ixxuwwi gulummi issiteenaa minenne mine abuullannem abuulla eddam keenina aayye!

⁹An macceesummuuyyim gogoxxi Moollanni Waa'i «Mishisoo lob minneewwi hundim diihookko; ee minneewwannem hee'oo manni hee'ooyyo.

¹⁰Tommi qaash uullanne kaasakko'i woyiniinsi sadeenti liitir woyina ciinsakkamo; lam kontaal hurbaata wixakko'i uulliinsi xale'i tommoo sadeenti kiilo'oo siidakkamo» yukko.

¹¹Dimbisoo agga hasseena daram ki'llam keeninaa woyi'n diqaas shokkiiseebe'e aggu'uuyyi soodissam keeninaa aayye!

¹²Ixxuwwi maaddanne maasinqo'inne, diitta'inne, dibbe'innee xurumbinnee kaddu'uuyyi woyi'n diqaasa aggamo; ihukkaarem Waa'ika er baxo qoossitamoyyo.

¹³Ee bikkina ixxi minaadab lachchoonginne qeefadamookko; awwonsaan sibaarinne beeddookko; minaadabim wo'o hoogaa xeebe'ookko.

¹⁴Ee bikkina Si'ool godabo haraassaahii suume fooqaa'aahii ixxuwwa egeraakko; minaadab, minaadaphphi awwonsaan, kaddam keenii hawwisaanii eehe'e dillitamo.

¹⁵Manni hundim sholle'ookkoo hawwookko; bolxoo keenim sholle'ookko.

¹⁶Ihukkaarem gogoxxi Moollanni Waa'i ixxi lobaannooma hanqo'i oogatinne la'isookko; ixxi keesammoomam hanqinne la'isookko.

¹⁷Gereebbi geexxuwwi illagee'n biirannem allaa'llookko; di'ir lijjuwwii fella'i geexxuwwii gindamu beyyuwwanne hixe itookko.

¹⁸Qawwiishshi usinne baaxiilo, faraxxi gaare'i usinnem hawwojja ixxuwwi gaganne gosaassam keenina aayye!

¹⁹«Neese ni illinne moo'nnoommisina Waa'i isseena qoodu luwwa qaqqisaa issona, Isra'ee'l keesammi qoodu luwwa lanqoommisinam ixxi sawwit wo'mmona» yitam keenina aayye!

²⁰Jora erane erokam jora yitam keenina, tuunso caakka caakkam tuunso yitam keeninaa xee'aalla qaraaraalla qaraaraallam xee'aalli issitam keeninaa aayye!

²¹Ixxuwwi gaga hayyo'uuwwaa qoolluwwaa issita'a xiggam keenina aayye!

²²Woyi'n diqaasa agimmina geedduwwa dimbisoo agga hamaarimminam malaayyaammuwwi ikko'i keenina aayye!

²³Maqanxa aa'lla'a hawwodu mancho kora'am fatakita'a hawwodu manchi hanqa bi'issam keenina aayye!

²⁴Ee bikkina giir bura'a itoo'isa hixim shokkaa bi'oo'isa ixxuwwik lugum shamaa bi'ookko; fitim di'llisa binnookko. Ixxuwwi gogoxxi Moollanni Waa'ika seera gaddo'ookko; Isra'ee'l keesammikam sagara sholliisso'ookko.

²⁵Waa'i quunqi ixxi minaadabanne dillaakko; ixxi anga ki'isaahim aphphisaakko; duunnuwwi huxe'aakko; leesh goog hundannem haccisa ubaakko; oo hundim ihaa Waa'i quunqiinsi daba'llukkoyyome; ixxi angi guzumo'eena ki'ukkisam yookko.

²⁶Waa'i mulli minaadaba qee'lliinsi weeshoo mare'e uullisookko; uulli tochchi hundiinsim weeshookko; ixxuwwim geettu'uuyyi qaqqissa'a waattamo.

²⁷Ixxuwwi lambe'enne hoogaanchi dimii hee'ooyyo; iinse'oohii diriiroohim bee'e; ixxuwwi ladimim tiramooyyo; caamma'i fatirim muramooyyo.

²⁸Xiyyi shobamaakkoohane; tokkaashshe'im chokkoramaakkoohane. Ixxuwwi faraxxi konte'im banci'nnoohane; faraxxi gaare'uuwwi shafe'im hambu'llami'nnoohane.

²⁹Hobbisa toxxamo; hobbichchi geexisam muuntamo. Hochchita'a amaddo'oka quunquuntu'uuyyi massitamo; ubbuusiseena ayyim xanooyyo.

³⁰Ee balla dambalaq hambu'llamisa guggu'uuyyi Isra'ee'l minaadabanne waattamo. Oono'o, ayyim uulla moo'ulas tuunsinnee hawwinnee kibbamukkisa la'ookko; duubim caakka tuunsiisookko.