Read Hadiyya Issaayyaas Kitaaba 51 Bible Online

Issaayyaas Kitaaba 51 - Hadiyya bible

Issaayyaas Kitaaba 51

¹Ki'nnuwwi, muccurooma awwontakkam keen, Waa'am hassakkam keeno, macceessehe. Hinkido'i kiniinsi fittakkoda'ee hinantakko'i baree sawwi'llehe

²Ki'nnuwwina anni hee'u Abrihaamee, ki'nnuwwa qatto'i Saara'aa hino'o moo'llehe. An abrihaame weeshoommi ammane xale'i ixxi gag hee'ukko. Ihukkaarem an ixxo maasse'ummo, ixxi shumo'om fikkaannisummo.

³Waa'i «Hanqoomam Yerusaaleemaa gindamu Yerusaalee'm woronne hee'llam keenoo qoxxisookko, qishixxookkome. Udma'i uulla Eden gannattisa awjinni biiram Waa'i duubbi kaashshi beyyisa issookko. Ixxonnem liiranchii ilillaatii galatii mazmuu'l sagarii macceesamookko.

⁴«I minaadaba, macceessehe; an ki'nnuwwina yoommi luwwam macceessehe; seer iinniinsi firookko, i oogatim eese laqqam bee'i minaadab hundinam caakki ihookko;

⁵Iikki muccuroom qaqqisa hincaakko. I gatisimmim afukkuuyyatte. I wodim adilluwwi hundinam hanqo'i oogatto eebookko; wo'inne kibbamu uulluwwi i gatisimma neeyyatinne egettamo.

⁶Ille iimmaa'llakka'a iimane moo'llehe, uullam aad heeshtakka'a moo'llehe. Iimannuwwi wirii'llisa binnaa bi'ookko; uullim eddechchisa ebeerookko; uullanne hee'oo mannim sabuuttisa qaqqisaa bi'ookko. Ihukkaarem i gatisimmi heer heerinam hee'ookko; i muccuroominam lasaanchi bee'e.

⁷Ki'nnuwwi muccurooma laqqakkam keenii, i seerim ki'nnuwwi wodanonne yoo keenii macceessehe; manni ki'nnuwwa gadoohaaree game'lloohaaree ki'nnuwwi badditakkotte.

⁸Ixxuwwa bil eddechcha itoo'isa itookko. Ihukkaarem i gatisimmi heer heerinam hee'ookko. I muccuroomim qaranchiinsi qaranchi afeebe'e hee'ookko.

⁹Waa'i malaayye ki'e; ki'e malaayyem edde'e; gaassi hee'u doollenne, hee'u qaranchuwwanne hundannem, hee'ukkisam kabadem ki'e. Dambalaq woronne hee'oo, Ra'aaba yamamoo moochchichcho muransittok atette.

¹⁰At gatissitti keen higgona, lobakata xilli wo'o gokkissaa xilli worinne googo fissittok atette.

¹¹At agaaggi keen hundim, lobakat liiranchinne zammattu'uuyyi Xiyoona daba'llita'a waattamo. Eekke'em kichchechchiissii wi'llimmiinsii gatta'a heerii heerina liiranchinne hee'llamo.

¹²Waa'i «Ki'nnuwwa qoxxisoommok mexxo'i anette; eehannah lehoo manni ooso, hixisa qaqqisaa gogoo manchi beeto, mahina badditakkamuulla?

¹³Uulla qooccukkokaa iimanem biddiqaa'u ki'nnuwwa qooccaanchi Waa'a xaddakka'ahinnihe? ki'nnuwwa bi'isseena guddo'i, wor amaddam kee'n quunqiinsi ki'aa hinkaa'n balli afeebe'e baachchinne hee'llakkamo? kanniinsi eehid ixxuwwi quunqi ki'nnuwwa horem nakkooyyo.

¹⁴Karanta'a hee'llam keen qaqqisonne tirantamo; karanta'a hee'llam barennem letamoyyo; ixxuwwina hasisoo hurbaatam hooggamoyyo.

¹⁵Wo'i moor gugona dambalaqa heekkeesoommok an ki Moollanni Waa'a; i summim gogoxxi Moollanni Waa'a.

¹⁶I sagara ki suumenne issummo; i angi hafannem daphphaa'ummo. Iimannuwwa biddiqaa'ummok, uullam shooho'ummok Xiyooninam ‹At i minaadaba› yummok anette» yoolla.

¹⁷Waa'i angiinsi quunqi agga aggittok chufim gatoobee'isa dimbisoo agga humbullo cuungitaa aggitti Yerusaaleema, ki'e, ki'e; ki'llaa uulle.

¹⁸Keese awwonsookkok ayyimbee'e; at qattaa li'issitti ki oosiinsi, kiikka anga amadaa awwonsookkok hore'em hee'ukkoyyo.

¹⁹Oono'o, hawwonne hawwi keesenne afaakko. Oohim gindanchaa bichchaa, sibaaroo oraa, eehannah keese ayyi qoxxisookko?

²⁰Qaashanne amadamu kukkussichchisa ki oos gooqqi lambe'i hundannem ubaakko. Ixxuwwanne Waa'ik quunqi ki Moollannikim axeellat dillaakko.

²¹Ee bikkina woyi'n diqaasinnetti ihoo'n hawwinne dimbittaanno kaka macceese.

²²Ixxi minaadabina agaagoo ki Moollanni Waa'i, «Ki'nnuwwa tartaraa'oo aggi humbullo i quunqi humbullom ki'nnuwwi angiinsi massoommo; ka lasage ee humbulliinsi i quunqa od aggooyyo.

²³An ixxo ‹Ki hanenne taakke'nnona iinse'e› yitu'uuyyi keese hawwissam kee'n anganne higissaa uwwoommo. Atim ki afare uullisaa taakke'amantam gooqqisaa issitaa hee'llitto» yoolla.