Read Hadiyya Issaayyaas Kitaaba 52 Bible Online

Issaayyaas Kitaaba 52 - Hadiyya bible

Issaayyaas Kitaaba 52

¹Xiyoona, ki'e; ki'e; ki malaayye edde'e. Keesammi Yerusaalee'm beero'o, ki lombi eddechcha edde'e. Ka lasage ballachchantobee'i keenii haashaarammi keenii aaggamoyyo.

²Yerusaaleema, ki dira giggisse; ki'e; adilla'n barcumannem afuure. Qeefadantakka'a hee'llakkam Xiyoo'n ooso, karantakko'i chimchima ki'nnuwwi gaanjiinsi sheelattakka'a uunjehe.

³Waa'i «Kora'am biteesantakka'a hee'llakko'o. Ee'isam kora'am wolabbanonne fittakkamo.

⁴Illageen Gibxanne hee'llakkeena mattakko'o; ee lasage Aassoo'l minaadabim mashka'i bee'em wor amadukko» yoolla.

⁵Waa'i «I minaadab kora'am maraakko; ixxuwwa ijaajjam keenim ixxuwwanne osatto'ookko. I summim hundi ballam game'llamoolla; eehannah kaba iina keyye mah hee'aate?

⁶Ee bikkina i minaadab i summa laqqamo. Eekkaa gaassaa wocoommok anetti ihummisa ee balla laqqamo. Eeyya anette» yoolla.

⁷Misraachchi sagara kurookkok, xumma alallaatookkok, er danaam woshsham wocookkok, gatimma alallaatookkok, Xiyooninam «Ki Waa'i adil ihaakko» yoohaanni lokki duunnuwwanne hinkaa'nna mishsoohane.

⁸Oono'o, Waa'i Xiyoona waaroo ammane ixxuwwi illinnem moo'llam bikkina beero'o egettam keen sagara iimaa'lla'a ilil yitu'uuyyi mat ikka'a zammattamo.

⁹Ki'nnuwwi Yerusaaleemanne gindantakko'i beyyuwwa, Waa'i ixxi minaadaba qoxxisaakko; Yerusaaleema gatisaakko. Ee bikkina liirammehe; mateeyyoominnem zammallehe.

¹⁰Waa'i keesammi ixxi woda hundem adilluwwi illagennem la'isookko; uulli tochchi hundannem hee'llam keen ni Waa'ika gatisimma moo'llamo.

¹¹Ki'nnuwwi Waa'ika mu'uta iyyitakkam keen annanni ikkehe, annanni ikkehe; eebeyyiinsi fillehe. Haashaarammi luwwa nakkitakkotte; ee beyyiinsi fittakka'a mucculluwwii ikkehe.

¹²Ihukkaarem gaaggaabbakka'a fittakkamoyyo; xottakkamokim gibbakka'ateyyo. Waa'i ki'nnuwwi illaginne higookko; Isra'ee'l Moollannim lasinnetti ihaa egerookko.

¹³Waa'i «Oono'o, i awwaadaanchi qoossimminnette baxookkok; la'amaakkoohan ihookko; iimiimookko; lobakata lombaam ihookko.

¹⁴Lobakat keen muggiteebe'e ixxek hagar ayyi manchaanniinsim annanni ihaa manni hundiinsim lophphaa hawwodamaakkoohan ihookko.

¹⁵Ee bikkina dut minaadab ixxonne maala'llitamo; ixxi mashka'inne adilluwwi suume amaxxitamo. Illageen kurakkobee'i luwwa moo'llamo; macceessobee'i luwwam qoossitamo» yoolla.