Read Hadiyya Issaayyaas Kitaaba 54 Bible Online

Issaayyaas Kitaaba 54 - Hadiyya bible

Issaayyaas Kitaaba 54

¹Waa'i «Ate ooso qatbee'i alceenni meentichche, zammare; xuu'llaa qattibee'aante, liiranchinne zammare; sagara iimaa'llaa ililihe. Mashka'oomim aro'i yoo meentichchaanniinsi hollakko'i meentichchi oos lophphaakko.

²Ee bikkina at hee'lloo dukkaa'n beyyo haraasse; du'm eddechchuwwam haraassitaa biddiqaa'e; hore'em hoffiissitte. Usseewwa qeeraa'llise; xiribbuwwam qoxxise.

³Makki kollonnee qeddi kollonnee haraattootto; ki shumo'im mulli minaadaba lago aa'ookko; diihu beero'uwwam heechchi beyyi issookko.

⁴Tuuttoobee'i bikkina baddititte; sholle'lloobee'i bikkina muggititte; woraadda'n ammane keesenne afu tuulle xaddootto; busar meentichchosa keese game'llakko'i doolle tiittooyyo.

⁵Mashka'oomim keese qooccukkok kiina aro'o; ixxi summim gogoxxi Moollanni Waa'a. Isra'ee'l Keesammi keese Gatisaancho; ixxim ‹Heer uullina Waa'a› yamamoohane.

⁶Oosoomma'n ammanenne gadanto'i meentichchosaa sabanta'a wodanonne kichche'llo'i meentichchosaa hee'llitto» yoolla. Ihukkaarem keese gatisaanchi ki Moollanni Waa'i odim keese ixxi kollonne weeshaa

⁷«An keese hofqax ammaninam uraa hee'ummo; ihukkaarem lobakat qishixxatinne i kollonne dabaroommo.

⁸An lobakata quuqummi bikkina hofqax ammaninam keese uraa hee'ummo; ihukkaarem heer heerina hee'oo i iittinne kiina qishixxoommo» yoolla.

⁹Kiina qishixxoo Waa'i «Nohe'i doolle ‹Uulla wo'inne od bi'soommoyyo› yaa sagara aagummisam oono'o, kaba odim ‹An keesenne od quuqoommoyyo› yaa sagara aagoommo. Ka lasage od keese axeeroombee'isam hide'aammo.

¹⁰Duunnuwwi heekke'ookko; hoffi duunnuwwim bi'ookko. Ihukkaarem heer heerina hee'oo i iitti kiinninne qoxxaa hee'ookko. I xummik hidi'l sagarim bi'ooyyo» yoolla.

¹¹Waa'i «At hawwitittok hambu'llaminnem heekke'llittokii qoxximmam hooggittokii Yerusaalee'm beero'o, an keese bito xee'aalli kininne baxoommo; ki shooho'o qoxxisoommok cuquluusa laboo kininnette.

¹²Kininne ootamu ooxxi ludonne yoo goobinaanchom aduu'n ille laboo kininne ki qash goocam inqu yakkam belecce'oo kininne, ki kululleetanne yoo ootam bito xee'aalli kininne baxoommo.

¹³«Ki oos hundim iinniinsi Waa'iinsi losso'oo keen ikkamo ki oosinam lophphaakkoo xumma uwwoommo.

¹⁴Muccuroomanne qoxxitaa uullitootto; damigii wor amadanchii kiinniinsi qee'llookko. Keese baddisookkok hee'ooyyo; dambaq kiinniinsi qee'llookko; ki kollonnem hincooyyo.

¹⁵Keesenne hawwoo afisseena ki'llo'i keen hee'llota'nnim ixxuwwi i beyyiinsi asse'anto'i bee'i bikkina ubbamo.

¹⁶«Oono'o, caninne giira buufoo xaara tumaancho qooccummok anette; ixxi ee mu'uta baxookkok baxamu luwwina awwaadoo'isinatte; bi'isoo'isinam bi'isaancho qooccummok anette.

¹⁷Keesenne qaashakko'i mu'ut chokaatookko; keese kasasoo keen hundam neegattootto; an i awwaadaanina uwwoommi sharad kane; ixxuwwi eroommim iinniinsette» yoolla.