Read Hadiyya Issaayyaas Kitaaba 55 Bible Online

Issaayyaas Kitaaba 55 - Hadiyya bible

Issaayyaas Kitaaba 55

¹Waa'i «Ki'nnuwwi xeebe'llakkokeen hundim wo'i kolli waallehe; diinat beekeenim waattakka'a bitaa'llakka'a ittehe; woyi'n diqaasaa adom diinatbee'em kora'am bitaa'llehe.

²Ki'nnuwwika diinate hurbaat ihoobee'i luwwanne mahina bi'issakkamuulla? Goddisoobee'i luwwindu mahina malaayye guullitakkamuulla? Macceessehe, i woshsha macceessehe; er hurbaata ittehe; ki'nnuwwim doo'llammi hurbaatinne liirammehe.

³«Macce i kolli daballehe; i kollonnem hinci'llehe; Macceessehe, foorinnem hee'llakkamo. Qooxxaalli i iittinne Daawiitina hide'ummisam ki'nnuwwinnem heer heerina hee'oo hidi'l sagara aagoommo.

⁴Oono'o, ixxi minaadabina naqaasha, awwonsaanchoo gassaanchoo ihoo'isa issaammo.

⁵Oono'o, laqqoobee'i minaadaba weeshshootto; keese la'oobee'i minaadabim qaqqisaa ki kolli waarookko. Oohim an Isra'ee'l keesammi ihummi ki Moollanni Waa'i i lombinne iimiimaa'ummi bikkinatte» yoolla.

⁶Waa'i siidamoo ammane hassehe; hincoo ammane weeshshehe.

⁷Jor manchi ixxi googo baaxiilaanchim ixxi sawwite urona. Waa'i kolli daba'llona; ixxim qishixxookko; ni Moollanni kolli daba'llona; ixxek haafit lobakata.

⁸Waa'i «I sawwit ki'nnuwwaannisayyo; i googim ki'nnuwwi gooqqisayyo.

⁹Iiman uulliinsi qee'lloo'isam i goog ki'nnuwwi googiinsi i sawwitim ki'nnuwwaanniinsi qee'llaakkoohane.

¹⁰«Xeenii baradii iimaniinsi ga'nnaa uulla aashisoo'isa mutisaa mishoo'isa issoohaannisa sire'e wixaa hurbaata itoohaannina uwwoo'n iimane daba'lloobee'isam

¹¹i suumiinsi firoo sagarim ee'isam kora'a i beyyo daba'llooyyo. I sawwixxeka issookko; asse'ummokam wonshookko.

¹²«Ki'nnuwwim liiranchinne fittakkamo; xumminnem geegesantakkamo. Duunnuwwii hoffi duunnuwwii ki'nnuwwi illagenne zammattamo. Haqquwwim liiranchinne anga aphphissamo.

¹³Utti bikkenne hoom hallutti bikkennem baarsanaat yakkam haqqi mutookko. Oohim iina tiissiishshanee heer heerina bi'oobee'i mare'ee ihookko» yoolla.