Read Hadiyya Issaayyaas Kitaaba 56 Bible Online

Issaayyaas Kitaaba 56 - Hadiyya bible

Issaayyaas Kitaaba 56

¹Waa'i ixxi minaadabina «Hanqa egellehe; er baxo baxxehe; iikki gatisimmi waareena, i muccuroomim la'ameena hincaakko.

²Usheexxaxxi balla haashaassoo'n lonsookkok, jora baximmiinsi qee'llaa gaga ege'llookkok maasse'amaakkoohane» yoolla.

³Waa'i kollonne hincu waaraanchi «Hanqinam Waa'i ixxi minaadabiinsi eese annanni issookko» yoone. Muleessa'im «An gogaalli haqqichcho» yoone.

⁴Waa'i «I Usheexxaxxi balla lonsaa, eese liiransoo luwwam doo'llaa i hidi'l sagaram egeroo muleessa'uuwwina

⁵i Keesammi Minennee i ooxxi woronnee goon oosina landi oosinaa yoohaanniinsi lophphoo tiissiishshi luwwaa summaa ixxuwwina uwwoommo. Heer heerinam bi'oobee'i summam uwwoommo» yoolla.

⁶Waa'ina awwaaddeenaa ixxi summam iittita'a otossiteenaa ixxi kolli hincitam waaraanina, Usheexxaxxi balla haashaassitoo'n lonsitam keeninaa ixxi hidi'l sagaram egettam keenina hundinamii Waa'i

⁷«I Keesammi duunanne woroommo; eese uunxakkam minennem liiransoommo; iina kitima hincaa'akkam beyyonne shokkiisakka'a hincaa'akkam kitimaa mulli kitimmuwwaa hincaa'llam ammanem aa'oommo. Oohim i min minaadab hundinam ‹Uunxaxxi mine› yamamoo bikkinatte» yoolla.

⁸Isra'eeliinsi binnito'i keeno wixxaa'oo Moollanni Waa'i «Wixxito'i kee'n beyyonne mulli keenom wixxaa'oommo» yoolla.

⁹Ki'nnuwwi udma'i uullanne yoontakke'i moochchi hundim ki'nnuwwim doo'm wo'l moochchi hundim ittakkeena hinci'llehe.

¹⁰Isra'ee'l awwonsaan qooqquwwa; hundim lachchi beekeeno; hundim duud wisha; muunta'ahim xantamoyyo; ixxuwwi diriiraammuwwa; iinse'lla'ahim haqaawwe'llamo.

¹¹Itimma iittaalluwwa; itaa goddoobee'i wishisa. Qoossitambee'i allaaraano; hundim ixxuwwi gaqqi googonne matto'o; annannichchim ixxi gagina awwaadoo luwwa siixxeena geeramookko.

¹²Ixxuwwim «Waallehe; woyi'n diqaasa angona; dimbisoo agginnem xeebo mu'llinona; kaballa ihukkisam soodom ihookko; kaballaanniinsi sooxxek lophpookko» yitamo.