Read Hadiyya Issaayyaas Kitaaba 57 Bible Online

Issaayyaas Kitaaba 57 - Hadiyya bible

Issaayyaas Kitaaba 57

¹Muccur manchi lehookko; ihukkaarem eekka ayyim qoossooyyo. Waa'ina gaga uwwito'i manni letamo; muccur keen joriinsi gattamisina lehinne massantamisa ayyim qoossooyyo.

²Xabbeen googonne mattam keen xumminne hoo'llamo; letam ammanem usheexxitamo.

³Ki'nnuwwi gennaa'n ooso, saa'aa'nnekii buubbeesaa'n shumo'ii, kid hinci'llehe.

⁴Ki'nnuwwi naacantakkamok, ki'nnuwwi suume fooqaa'llakkamokii allabo fissitakkamokkii ayyennette? Ki'nnuwwi boqquwwi kee'n oosoo qophphanaa'n shumo'oyyonnihe?

⁵Ki'nnuwwi hujuphphi haqqi lugummuwwannee latu haqqi lugummuwwannee saalmaachchinne shokkitakkam keenoo cebbuwwannee ki'n fonqooqquwwannee ki'nnuwwi ooso kitimtakkam keenoyyonnihe?

⁶Cebbi beyyi qacaalli ki'n waa'uwwi ki'nnuwwanne; oo keen ki'nnuwwina saamome. Aggikkaa hurbaaxxi kitimaa ee keenina hincaa'llakko'ookko; eehannah ookki eese quuqisooyyonnihe?

⁷Qeeraa'l duunnuwwi ludonne saa'immi beyyo dakkakko'o; kitimo hincaa'imminam eehe'enne fittakko'o.

⁸Qophpha'n waa'i misilluwwa u'llummi xufiinsii gooc gubaniinsii worinne saqaltakko'ookko; eese uttakka'a ki'nnuwwi ara'a saa'immina maxattakko'ookko. Ee ara'annem fittakka'a ixxo haraassitakko'ookko; ixxuwwi ara'a iittitakko'i bikkina ixxuwwinne hide'antakko'ookko; ixxuwwika kallemaroomam moo'llakko'ookko.

⁹Shitto'o duntakka'a buurom laphphitakka'a Mooleek yakkam waa'ina otossitakkeena mattakko'o; otossitakkam waa'uwwa hasimmina asse'amaano qee'l uulla Si'ool afeebe'e asse'llakko'o.

¹⁰Taakki lophphimminne qondoodditto. Mulli waa'uwwa hassakkeena lobakata qondooddakko'o; ceentaka'atim uttakko'oyyo; mulli waa'uwwi ki'nnuwwina malaayye uwwookkoka labissakka'a ee keeno ceentakkoo'n hassakko'o.

¹¹Waa'i «Iina qophphantittok ayye badditaatette? Eese tiirimma sabbittok ki wodanonnem dissitbee'ek eesem baddimma sabbittok an sahaa cawwummaareyyonnihe?

¹²Kiikka muccuroomaa baxoo biir issoommo; oo keenim kiina awwaadooyyo.

¹³Hara'mmato siiddeena laattoo ammane hino'o oo wixxaa'llitti waa'uwwi keese gatisona; ixxuwwa hafachchi agookko; fooshshim binnaa'ookko. Ihukkaarem eesenne amma'nnamookkok uulla lagaa'ookko; keesamaakkoo i duunam i gaqqi amaxxi issookko» yukko.

¹⁴Waa'i «Axissehe, axissehe; googo gudissehe. I minaadaphphi googiinsi qoloo luwwa ki'issehe» yoolla.

¹⁵Hundiinsi hanaan ihaa adillan yookkok, summim keesammi ihaa heer heerina hee'ookkok «An sholle'llo'i kee'n tiiro iimiimaa'eena maashaalli keenom baqbaqaa'eena hundiinsi hanaan ihu keesamaakkoo beyyonne hee'oommo. An sholle'llo'i keeninnee maashaalluwwinnee maqire ihoommo.

¹⁶I minaadabina iinniinsi waaroo heechchi ayyaana uwwummo; ee bikkina ixxuwwanne an quuqummi quunqii kasasummokii heer heerina hee'oo'isina issoommoyyo.

¹⁷Ixxuwwi baaxii'l mashka'innee gaga iittimminnee ixxuwwanne quuqaa hee'ummo; hore'em ixxuwwa guzumo'aa annannihaa hee'ummo; ihukkaarem ixxuwwi xiiqqanta'a ixxuwwi googonne matta'a hee'llo'o.

¹⁸«An ixxuwwika baxo hundam moo'aammo; ihukkaarem ixxuwwa fayyiisoommo; ixxuwwam awwonsummuuyyi hara'mmoommo; kichche'llo'i keenom qoxxisoommo.

¹⁹Qee'llonnee abbisonnee yo'i keenina hundinam xumma uwwoommo; an i minaadaba fayyiisoommo.

²⁰Ihukkaarem jor keen hambu'llam haraa shufuraa fissoo cawweena xanoobee'i heekke'oo dambalaqisa.

²¹Ee bikkina baaxiilaan keenina xummi bee'e» yaa Waa'i wocukko.