Read Hadiyya Issaayyaas Kitaaba 58 Bible Online

Issaayyaas Kitaaba 58 - Hadiyya bible

Issaayyaas Kitaaba 58

¹Waa'i «Sagara iimaa'llaa laare; egedditte; ki sagara xurumbisa macceesise. I minaadabina ixxuwwi booqqooma, Yaaqoob mininam ixxuwwi baaxiilo kure.

²Ixxuwwi eese hundi ballam hassamo; i googom laqqeena hassamoka labbamo; hanqo'i baxo baxoohaannisaa iikka ixxuwwi Waa'ika seera urubee'i minaadaphphisaa hanqo'i oogato'ina eese uunxitamo; an Waa'i ixxuwwi kollonne hincihona hassamo» yoolla.

³Minaadabim «At moo'lloobeelas neese mahina soommannummo? At mahannem xiggoobeelas neese mahina gaga sholliinsummo?» yitamo. Waa'im «Ki'nnuwwi soommantakkam balla ki'nnuwwi tii'lleka issitakkamo; ki'nnuwwi baxissakkam keenom jawweessakkamo.

⁴Ki'nnuwwi soomma'nnek lasaanchi joranchaa fitanchaa ihu bikkina mogaallisinne aphphixxantakkamo; eehido'isinne soommantakkam soomman ki'nnuwwik uunxat iimanenne macceesamoo'isa issooyyo.

⁵An doo'llummi soomman kido'anennihe? Manni ixxi gaga sholliisookkok xale'i kido'i ballannennihe? Horoore shomboqo'isa heeshaa'immannihe? Te'im xiddi eddechcha edde'akka'a gii'l buchchanne biqqiiqqimmannihe? Eehannah ki'nnuwwi soommano yitakkamok kanennihe? An kido'i soommanonne liiramoommoka labissakka'atennihe?

⁶«An hasoommi soomman wor amadimmika chimchima muttakkona, gaanjaqqika usa tittakkona, wor amadanto'i keeno wolabbanonne fissitakkonaa gaanjaqqi hundam iiqqakkonayyonnihe.

⁷Ki'nnuwwi hurbaata sibaaraanchinne baxxantakkamisina, min bee'i buxuchcho ki'nnuwwi mine aagissakkamisina, habiillito'i keeninam eddeessakkamisinaa ki'nnuwwi qarmanninam ille jottakkabee'isinayyonnihe?

⁸«Ee ammane ki'nnuwwik caakki soodaraa'l laaqqisa bololookko; fayya'oomim qaqqisaa mutookko; ki'nnuwwi muccuroom illage higaa marookko; Waa'ikim lombi ki'nnuwwina agir ihookko.

⁹Ee ammane eese weeshshakkamo; anim macceesoommo. Hara'mmatinam laattakkamo; anim ‹An yoommo› yoommo. «Wor amadimmi gaanjaqqa, boqqoo'm woshshaa maxxaarinne moo'ishshaa qeessitakkolas

¹⁰sibaarukkaannina qishixxitakkolasii hawwaanina hasisoo luwwa uwwitakkolasii ki'nnuwwi caakki tuunsonne caakkookko; ki'nnuwwi tuunsim samgud ballisa ihookko.

¹¹An hundi ammanem keese awwonsoommo; ki foorem er luwwinne goddisoommo; ki miqem qoxxisoommo; atim wo'inne qufu kaashshi beyyisaa xoo'oobee'i wo'i bu'isaa ikkootto.

¹²Gaassiinsi ki'isaa gindamu beyyuwwi baxamookko; lobakat qaranchik shooho'i areesamookko. Atim ‹Iiqamma cacoohane; heechchi googo haareechchisoohane› yamantootto» yoolla.

¹³Waa'i «Usheexxaxxi ballanne mattoo beyyiinsi ki lokko egeddilas, keesamaakkoo i ayyaamonnem ki tii'lleka issitbeelas, Usheexxaxxi ballam ‹Liirancha, Waa'ika keesamaakkoo ballam lonsamma› yitlas ki gaqqi googonne marimmiinsi, ki gaqqi doo'lla issimmiinsii awwaad bee'i woshsha wocimmiinsii egexxantaa lonsitlas

¹⁴ee ammane eesenne liirantootto; uullaannonne qoffittuwwanne fissoommo; kiyyannika Yaaqoob amaxxam godditaa ittoo'isa issoommo» yoolla. Kaka Waa'i wocaakko.