Read Hadiyya Issaayyaas Kitaaba 6 Bible Online

Issaayyaas Kitaaba 6 - Hadiyya bible

Issaayyaas Kitaaba 6

¹Adil Ooziy lehu hiinchonne Waa'i qeeraa'l lombi adilla'n barcumanne afuuraakkoo moo'ummo. Ixxek lombi eddechchim Keesammi Mine ifiisaa hee'ukko.

²Suraafeelluwwi ixxi kululleetanne uullita'a hee'llo'o; ixxuwwina annannichchinam loh lad hee'ukko; oo keen annannichchim lam ladinne ille, lam ladinne odim lokko ifiissam hee'llo'o; lam ladinnem barattam hee'llo'o.

³Oo asse'amaan ixxuwwina'i ixxuwwim aa'aqqantu'uuyyi «Keesamma, keesamma, keesamma! Gogoxxi Moollanni Waa'i keesamma! uulli hundim ixxi lombinne wo'mmaakko» yitam hee'llo'o.

⁴Ixxuwwi laachchi sagarim Keesammi Mi'n shooho'o heekkeesukko; oo minim wiriirinne wo'mmukko.

⁵Anim «Oono'o, i suum haashaaramma; hee'oommokim suum haashaaramaakkoo manninnette. I illinne gogoxxi Moollanni Waa'a adila moo'ummi bikkina bi'aammo, iina aayye!» yummo.

⁶Ee asse'amaaniinsim mat bararukkuuyyi i beyyo waarukko; ixxi angannem kiti'm beyyiinsi massaa amadu gii'l kashar yoo qaph hee'ukko.

⁷Ee gii'l kasharinnem i suume nakkaa «Oono'o, ku gii'l kashar ki suume nakku bikkina ki hawwojji shiinshamaakko; ki baaxiilim haafamaakko» yukko.

⁸Ee lasage Waa'i «Ayye asse'oommo? Iina asse'amoodu ayyette?» yukkuuyyi macceesummo; Anim «Oono'o, an maroommo; eese asse'e» yummo.

⁹Ixxim «Eehan ihulas ka minaadaphphi beyyo mattaa ‹Macceesimmina macceessakkamo; ihukkaarem qoossitakkamoyyo. Moo'immina moo'llakkamo; ihukkaarem hindihitakkamoyyo› yihe.

¹⁰Odim «Illinne moo'llambee'isa, maccinne macceessambee'isa, wodaninne qoossitambee'isaa i kollonnem daba'llita'a fayye'llambee'isaa ka minaadaphphek wodan duudoo'isa, macci gawwo'isaa illi moo'oobee'isaa isse» yukko.

¹¹Anim «I Moollanna, kuk ihookkok hinki amman afeebe'e?» yaa xa'mmummo. Ixxim «Beero'uwwi gindamaa, minneewwim manna hoogaa diiheebe'ee uulli mahimbee'i udma'i iheebe'ee.

¹²An ka minaadaba qee'l uulla holloommo; uullam udma'i issoommo.

¹³Tommiinsi mat manchi ee uullanne gatuta'nnim ixxim bi'ookko; ihukkaarem qilxo'oo giraaraa murakka'a lasage gatoo gugu'mmisa keesammi shumo'im uullanne gugu'mmisa ihaa hee'ookko» yaa dabarukko.