Read Hadiyya Issaayyaas Kitaaba 60 Bible Online

Issaayyaas Kitaaba 60 - Hadiyya bible

Issaayyaas Kitaaba 60

¹Kiina caakki waaraakko; ki'llaa caakkise; Waa'ikim lombi kiina firaakko.

²Oono'o, tuunsi uulla, gambabbi tuunsim mulli minaadaba ifiisookko. Ihukkaarem Waa'i kiina ki'aakkoo; ixxi lombam ki hanenne moo'isookko.

³Mulli minaadab ki caakki kolli; adilluwwim kiina firu soodaraa'l caakki kolli waarookko.

⁴Xabbitaa ki kululleeta moo'e; hundim wixxaa ki beyyo waarookko. Kiikki goo'n oos qee'l uulliinsi waarookko; ki landam iyyakka'a ki beyyo worakkamo.

⁵Ee ammane dambalaqanne hee'oo amaxxii mulli minaadaphphi goddii ki kolli waaroo bikkina moo'llaa liirantootto; atim maalaltootto; lobakatam liirantootto.

⁶Dut gaameela'i Miidiyaa'mmekaa Eefa'ikaa exxaa ki uullanne wo'mmookko. Hundim Saaba'iinsi worqaa aduruusaa amadda'a waattamo; Waa'am galaxxitamo.

⁷Qeedaa'l gereebbi ki kollonne wixxookko; Nabaayooxxi gereebbi ambulluwwam kitimina awwaaxxitootto; Oo keenim iina kitima hincaa'akkam beyyonne eese liiransoo kitimina ihookko; lombaam i minem lonsoommo.

⁸Iimanenne geeroo duuphphisaa do'nnanne aageena bararoo handare'isaa ku geeroo keen ayyaamo?

⁹Ixxi keese lonsu bikkina wo'inne kibbamaakkoo uulluwwi eese neeyyatinne egeroolla. Isra'ee'l keesammina lombaam ki Moollanni Waa'iina ki ooso ixxuwwi birinnee worqinnem qee'lliinsi woreena Tarsees markabbuwwi gudaa egeraakko.

¹⁰I quunqi bala'inne aphphisaa hee'ummo; ihukkaarem kaba i qishixxato iittinne moo'isoommo. Waaraan ki oota ootookko; ee minaadaphphi adilluwwim kiina awwaadookko.

¹¹Mulli minaadaphpheka amaxxaa qeefadanto'i adilluwwaa ki beyyo worakkam bikkina ki gooc hundi ammanem fooqookko; hiimoo ballam xufamooyyo.

¹²Kiina awwaadoobee'i minaadabii adilii hore'oomam bi'ookko.

¹³Keesammi i mi'n beyyo wereeggiseena Liibaanoosina lombi ihu hoom, saate'ii digibii ki beyyo waarookko. I lokki usheexxoo beyyom an lonsoommo.

¹⁴Keese wor amaddam hee'llo'i kee'n oos waatta'a kiina heeshitamo; keese gaddo'i keen hundim ki lokkonne ubbamo. Keesem «Waa'ina Beero'o; Isra'eelina Keesammi ikkitti Xiyoona» yita'a weeshshamo.

¹⁵Ayyim ki worinne daba'llamoobee'i xadantaattoohanee sabantaattoohanee hee'llitto. Ihukkaarem kaba heer heerina manni keesenne bakke'oohanee qaranchi hundinam liiranchaa ikko'isa issoommo.

¹⁶Mulli minaadaphpheka ado aggootto; adilluwwikam anuuna iiccootto. Anim Yaaqoobina wod ihummi Moollanni kiinam qaraaree gatisaanchoo ihummisa laqqootto.

¹⁷An kiina naas bikkenne worqa, xaa'l bikkennem kin bira, haqqi bikkenne naasa, ki'n bikkennem xaara eeboommo. Xummi keese gassaancho muccuroomim kiina awwonsaanchi ihoo'isa issoommo.

¹⁸Ee lasage ki uullanne damiqqi laachchi macceesamooyyo; ki uulli tochchonnem bichchi te'im gindanchi hee'ooyyo. Ki qasha «Gatisaancho»; gooccuwwam «Galata» yitaa weeshshootto.

¹⁹Ee lasage ballina eelliinchi caakki hiiminam aga'n caakki kiina hasisooyyo. Waa'i kiina heer heeraxxi caakka; ki Moollannim kiina lombi ihookko.

²⁰Waa'i kiina heer heeraxxi caakkaa ki wi'llimmi doollinam lasaanchoo ihoo bikkina ki eelliinchi hore'em aagooyyo; aganim ixxi caakka hoorooyyo.

²¹Ki minaadab hundim muccur ihookko; uullam heer heerina lagaa'llamo; i lombi moo'amoo'isina ixxuwwi an kaashshaa i angi baxoo.

²²Ki'nnuwwiinsi hoffok kuma hore'em hoffokim wodaam minaadab ihookko. An Waa'i amman afoohaare kuk qaqqisaa ihoo'isa issoommo.