Read Hadiyya Issaayyaas Kitaaba 61 Bible Online

Issaayyaas Kitaaba 61 - Hadiyya bible

Issaayyaas Kitaaba 61

¹ Moollanni Waa'ik Ayyaan i hanennette; buxina mishiraachchi sagara alallaatona Waa'i eese doo'llaakko; wodan iiqamu keenom caccona qeefadanto'i keenina wolabbano karanto'i keeninam tirancha alallaatona eese asse'aakko.

²Ee'isam Waa'i niina eroomma issoo hiinchi bikkinaa ni Moollannim ni diina'iinsi baado miqisoo balli bikkinaa alallaatona wi'lloo keeno qoxxisona

³«Waa'i ixxi lombina kaasaakkoo muccuroo'm haqqa» yamantona Xiyoonanne wi'llitam keeno gii'lbuchchi bikkenne laakka, wi'l bikkenne liirancha zayta, kichchechchi bikkinne galaxxi eddechcha uwwona eese asse'aakko.

⁴Ixxuwwim gaassiinsem ki'isaa gindamu beyyuwwa dabatta'a baxxamo; illageen gindamu keenom dabatta'a baxxamo; lobakat qaranchiinsi illageen gindamaa diihu beero'uwwa dabatta'a baxxamo.

⁵Waaraan ki'nnuwwi gereebba allaattamo; mulli keen odim ki'nnuwwi uulla abuullaanoo woyi'n kaashshi beyyo egeraanoo ikkamo.

⁶Ihukkaarem ki'nnuwwi «Waa'ina qeessuwwa; ni Moollanninam awwaadaano» yamantakkamo. Mulli minaadaphphi amaxxa ittakkamo; ixxuwwi goddannem heellantakkamo.

⁷Ixxuwwi tuutto'i bikkenne lam suume aa'llitamo; sholle'llo'i bikkinnem ixxuwwi uullanne liirantamo. Ixxuwwi uullik sharad eraa'llaanniinsi lam suum ihookko; heer heerinam liirantamo.

⁸Waa'i «An Waa'i hanqo'i oogato iittoommo; gamoo hawwojjaa saboommo; ixxuwwi baxikam hanqo'isinne miqoommo; ixxuwwinnem heer heerina hee'oo sagara aagoommo.

⁹Ixxuwwi shumo'i mulli minaadaphphi lambe'enne ixxuwwi oosim manni lambe'enne la'amaakkoohan ihookko. Ixxuwwa moo'oo hundim an Waa'i maasse'aammoo shumo'i ikko'isa qoossookko» yoolla.

¹⁰An Waa'anne liiramoommo; i foorim i Moollannanne lobakata liiramookko. Mashka'oomim idaayya'n eddechcha edde'u idaayyichchisaa wereeggi eddechcha edde'llo'i idaayyichchosaa ixxi gatimmi eddechcha iina eddeesaakko; ixxi gatimmi eddechcha iina eddeesaakko; muccuruoo'm kaabbam i hanenne edaakko.

¹¹Uulli mutaano mutisoo'isaa duubbi kaashshi beyyim fiishsho'o li'isoo'isaa Moollanni Waa'im muccuroomaa galataa hundem minaadaphphi illagennem mutisookko.