Read Hadiyya Issaayyaas Kitaaba 62 Bible Online

Issaayyaas Kitaaba 62 - Hadiyya bible

Issaayyaas Kitaaba 62

¹Xiyoonik muccuroom da'l caa'mmisa bololeebe'e gatimmim belelle'oo caakkisa moo'ameebe'e Xiyoo'n bikkina sa'oommoyyo; Yerusaalee'm bikkinam cawwaa uroommoyyo.

²Mulli minaadab ki muccurooma adilluwwim ki lomba moo'ookko. Waa'i gagim fissoo haareechchi summinne weeshantootto.

³At Waa'i anganne lombi laakkisa ki Moollanni angannem adilla'n mare'isa ikkootto.

⁴Ka lasage «Uunjanto'oohane» yamantooyyo; ki uullim «Diiha» yamamooyyo. Waa'i keesenne liiramu bikkinaa ki uullinam aro'i ihoo bikkinaa ki summi «Waa'i liiramaakkookkotane» ki uullim «Aro'aamotte» yamamookko.

⁵Woraadichchi baajaamo eeboo'isa keese uumukkokim kiina aro'i ihookko. Idaayyichchi idaayyichchonne liiramoo'isam ki Waa'im keesenne liiramookko.

⁶Yerusaaleema, qoto'aa egeroo keeno ki ootanne uullisaammo; ixxuwwi hiimoo ballaa hore'em innaantambee'i keeno. Ki'nnuwwi Waa'a uunxitakkam keeno, hore'em usheexxitakkotte.

⁷Ixxi Yerusaaleema shooho'eebe'ee uullinam galat isseebe'ee usheexxato uwwitakkotte.

⁸Waa'i ixxi makki anginnee wodaam malaayyinnee «Ka lasage ki hurbaata ki diina'i itona uwwoommoyyo; at badattitti haareechchi woyi'n diqaasa od allaggi agooyyo.

⁹Ihukkaarem atoota wixxaa'llam keenim ittamo; Waa'am galaxxitamo. Woyi'n misha feettam keenim i keesammi wixxixxi beyyonne diqaasa aggamo.

¹⁰Higgehe; gooccuwwinne higgehe; googom minaadabina gudissehe; gudissehe; lob googo gudissehe; kinneewwa ki'issehe; mare'em mulli minaadabina moo'issehe» yaa hide'aakko.

¹¹Oono'o, Waa'i heer uulli tochchi afeebe'e «Xiyoo'n landichchona ‹Ki gatisaanchi waarookko; irifo'im ixxi angannette; baxim hundim ixxi illagennette› yi'llehe» yaa alallaataakko.

¹²Ixxuwwi «Waa'i gatisaakkoo Keesammi Minaadaba» yamantamo. Atim «Uunjantobee'i Hasantam Beero'otte» yamantootto.