Read Hadiyya Issaayyaas Kitaaba 63 Bible Online

Issaayyaas Kitaaba 63 - Hadiyya bible

Issaayyaas Kitaaba 63

¹Ku kashar eddechcha edde'aa Eedoomanne yoo Booxiriinsi waarookkok ayyette? Ku edde'ukkis mishsoo lophphaakkoo malaayyinne taakke'oo ayyette? Muccuroominne wocaa gatisimmi malaayyi yoo Waa'i anette.

²Woyi'n diqaasina misha ciinsoo manchaannisa ki eddechchi mahina kasharukko?

³Waa'i «An ciinsakkam beyyonne woyina mullam hancaacummo; ee ammane minaadabiinsi matim iinninne hee'ukkoyyo. An ixxuwwa i quunqinne hancaacummo; i bala'innem xaansummo; i eddechchim ixxuwwi xiiginne bi'aakko; hundem eddechcham xussaammo.

⁴Baado firoommi balla qoodaammo; gatisoommi hiinchim afaakko.

⁵Moo'ummo; ihukkaarem hara'mmoo ayyim hee'ukkoyyo. Hara'mmookkok hee'ubee'i bikkinam maalalummo. Ee bikkina i gaqqi wodim gatimma eebukko; i quunqim iina hara'mmukko.

⁶I quunqinne minaadaba hance'ummo; i bala'innem xaansummo. Ixxuwwi xiigam uullanne dunummo» yaa dabarookko.

⁷Waa'i niina issu luwwi hundinam, eroomminaa ixxo galaxxisoo baxinaa ixxi qishixxaxxisinnee biijoo'mmisinnee Isra'ee'l minaadabina issu eroommi hundam kuroommo.

⁸Waa'i «Hanqinam ixxuwwi i minaadaba; qophphantambee'i i ooso» yukko. Ixxuwwinam gatsaanchi ihukko.

⁹Ixxuwwi u'nnanne hundannem ixxim u'nnamukko; ixxi illagenne hee'oo asse'amaanchim ixxuwwa gatisukko. Ixxi iittinnee qishixxatinnem ixxuwwina tisso miqukko. Illagee'n doollenne hundannem ixxuwwa ki'isaa iyyukko.

¹⁰Ihukkaarem ixxuwwim boqqito'o; Keesammi Ayyaanam qaraassito'o. Ee bikkina ixxi ixxuwwina diinakkichchi ihukko; ixxi gagim ixxuwwinne oramukko.

¹¹Ee ammane ixxena awwaadaanchi Muse'e hee'u gaassi doolle tiittamo; gereebba allaaraanchinne maqirem dambalaqiinsi fissukkok hannonnette? Ixxeka Keesammi Ayyaanam ixxuwwanne issukkokidu hannonnette?

¹²Ixxi lombaam malaayye Muse'i makki anganne issukkok, ixxi summi heer heerina weeshamoo'isina ixxuwwi illagenne wo'o baxxansukkok

¹³farashshi biir uullanne firiixoo'isa qo'llitoo'n xillorinne higisukkok hannonnette?

¹⁴cebbanne aad dilloo la'llisa Waa'ik Ayyaan ixxuwwa usheexxaxxi kolli awwonsukko. Ki minaadaba ee'isinne awwonsittok ki summi lophphoo'isinatte.

¹⁵Iimaniinsi aad moo'e; keesammaa lombaamoo ihu ki adilla'n miniinsi aad moo'e. Kiikki to'achchii wodii hannonnette? Ki biijoomii qishixxatii niinniinsi qee'llaakko.

¹⁶Abrihaam neese la'ubee'aarem, Isra'eelim qoossubee'aarem at niina Anna; Moollanna, at niina Anna. Ki summi gaassiinsim neese gatisaancho.

¹⁷Moollanna, ki googiinsi huushammoommisa issittok mahinatte? Keese baddinoombee'isam mahina ni wodano duudissitto? Kiina gulummi ihu ki sullinaa ki awwaadaa'n bikkinaa yitaa daba'lle.

¹⁸Kiikka keesammi beyyo hofqax ammanina ki minaadaba ixxi gaqqan issaa hee'ukko; ihukkaarem kaba ni diina'i ki mine hance'amaakko.

¹⁹Neese gaassi doolliinsim ijaajammumbee'aannisaa ki summinne weeshammumbee'aannisaa inkaammo.