Read Hadiyya Issaayyaas Kitaaba 65 Bible Online

Issaayyaas Kitaaba 65 - Hadiyya bible

Issaayyaas Kitaaba 65

¹Waa'i «Eese xa'mmubee'i keenin i gaga la'isummo; eese hasubee'i keeninam siidamummo. I summa weeshubee'i minaadabinam ‹Yee, yee› yummo.

²Jor googonne marukkuuyyi ixxi sawwixxisanne hee'oo boqqi minaadabina balli hundoomam i anga biddiqaa'ummo.

³Ku minaadab duubbi kaashshi beyyuwwanne i illagenne kitima kitimimminnee buchchi mu'utanne aduruusa wiriissimminnee hundi ammanem eese quuqisoohane.

⁴Waammuwwi lambe'enne afuuttam keeno; maaxammi beyyonne gattam keeno; boonke'i maaram ittam keeno. Haashaarammi maraq ixxuwwi harallanne amaddam keeno.

⁵Ixxuwwi ‹Laa'ihe, an kiinniinsi loboka keesammi ihummi bikkina eesenne hincititte› yitam keeno. Oo woshshi balli hundoomam i quunqi giira xanqisoo keeno.

⁶«Oono'o, i illagenne kitaabamaakko; ee bikkina cawwoommoyyo; ixxuwwi baxisa miqoommo; ixxuwwi angikam bito dabaroommo.

⁷Ki'nnuwwikaa ki'nnuwwi anno'ikaa baaxii'l baado firoommo. Ee'isam duunnuwwanne kitima hincaa'llo'i bikkinaa hoffi duunnuwwannem eese game'llito'i bikkinaa ixxuwwi keenaanchonne anim dabaraa keenoommo; gaassi ixxuwwi baxikam bito miqoommo» yoolla.

⁸Waa'i «Woyin shoganne hee'oo ammane ‹Maassi ixxonne yoo bikkina bi'issakkotte› yakkamisam anim i awwaadaa'n bikkina yaa minaadaba guullaa bi'isoommoyyo.

⁹Yaaqoobina shumo'o uwwoommo; Yihudim i duunnuwwa lagaa'oo'isa issoommo. An doo'llummi keen ee uulla lagaa'ookko. Iina awwaadaanim eehe'enne hee'ookko.

¹⁰Eese hasoo i minaadabina Saaroon gereebbi allaachchi beyyo, Akoo'l cebbim diinat usheexxoo beyyi ihookko.

¹¹«Ihukkaarem ki'nnuwwi eese Waa'a uttakka'ahii i keesammi duunam xaddakka'ahii ‹Er saamo› yamamoo qophpha'n waa'ina maadda gudissakko'o; ‹Er gada'a› yamamoo qophpha'n waa'inam woyi'n diqaasa lubbakkamo.

¹²Ee bikkina an ki'nnuwwi saam bisa'ina ihoo'isa issoommo; hundim duroo keenina heeshtakkamo. An ki'nnuwwa weeshummi ammane yee yitakko'oyyo; wocummaarem macceessakko'oyyo. Ki'nnuwwi i illagenne jor luwwa issitakko'ookko; eese liiransoo bee'i luwwam doo'llitakko'ookko» yoolla.

¹³Ee bikkina Moollanni Waa'i «I awwaadaan ittamo; ihukkaarem ki'nnuwwi sibaattakkamo. I awwaadaan aggamo; ihukkaarem ki'nnuwwi xeebe'llakkamo. I awwaadaan liirantamo; ihukkaarem ki'nnuwwi tuuttakkamo.

¹⁴Lobakata liiranto'i bikkina i awwaadaan zammattamo; ihukkaarem ki'nnuwwi lobakata kichche'llakko'i bikkina wi'llitakkamo. U'nnantakko'i bikkinam ‹Aayye, aayye!› yitakkamo.

¹⁵Ki'nnuwwi summa an doo'llammi i minaadab duunchina awwaaxxookko. An Moollanni Waa'i ki'nnuwwa shoommo; i awwaadaanina mulli summa uwwoommo.

¹⁶Illagee'n hawwi xadamaa i illagiinsi bi'u bikkina uullanne maasse'amookkok iinninne hanqo'i Waa'inne maasse'amookko. Uullanne hiditano hide'ookkokim iinninne hanqo'i Waa'i summinne hide'ookko» yoolla.

¹⁷Waa'i «Oono'o, an haareechchi iimanee haareechchi uullaa qooccoommo. Illagee'n luwwi mahim tiiramooyyo; hore'em sawwamooyyo.

¹⁸Ihukkaarem an qooccoommi luwwanne liirammehe; heer heerinam lobakata liirammehe. Oono'o, an Yerusaaleema liiranchina, ixxonne hee'oo minaadabam lophphaakkoo liiranchina qooccoommo.

¹⁹An Yerusaaleemanne lobakata liiramoommo; i minaadabannem liiramoommo. Ee lasage wi'llikii laachchikii sagar eekke'enne macceesamooyyo.

²⁰Ee lasage oosoommanonnem lehoo ciil te'im umura guulloobee'i lommanchi hee'ooyyo. Xibbi hiincho ihaa lehoo manchi harde'oommaninnem lehukkaannisa, xibbi hiincho ihoo'n lehoo manchim duumamukkaannisa xigamookko.

²¹I minaadab mine baxxa'a ee minneewwannem hee'llamo; woyinam kaassa'a misha ittamo.

²²Mulli manni hee'ona ixxuwwi mine baxxamoyyo; mulli keen itonam kaassamoyyo. I minaadaphphek umur haqqi umu'llisa qeeraa'llookko. An doo'llummi keen ixxuwwi angi baxonne lobakat doolle liirantamo.

²³Ixxuwwii oosii an Waa'i maasse'aammoo shumo'i ikko'i bikkina ixxuwwi bax kora'anem ihooyyo; oosom bichchina qattamoyyo.

²⁴Ixxuwwi weeshshoo'nnim an yee yoommo; wocca'a guullitoo'nnim macceesoommo.

²⁵Oro'ii gereebbii maqire allaa'llookko; hobbim mirgo'isa bura'a itookko; hamashshi hurbaatim buchchi ihookko. Keesamaakkoo i duunanne mahim hawwoddamoyyo; bi'issamoyyome» yoolla. Kaka wocukkok Waa'a.