Read Hadiyya Issaayyaas Kitaaba 7 Bible Online

Issaayyaas Kitaaba 7 - Hadiyya bible

Issaayyaas Kitaaba 7

¹Ooziyaan beet beet Iyyoo'aataamina beet Akaaz Yihuxxi uullanne adil hee'u doollenne Sooriy adil Raaxiinii Isra'ee'l adil Ramaaliy beet Faaquhii orancha hassa'a Yerusaaleema waatto'o. Ihukkaarem kaa'lleena xanto'oyyo.

²Sooriy minaadab Isra'ee'l minaadabinne Yihuxxi minaadaba qasseena a'llanto'isa Yihuxxi adil macceesaa ixxii ixxi minaadabii muggita'a hafachchi heekkeesu haqqichchisa heekke'llo'o.

³Waa'i Issaayyaasina «Atii ki beet Sheeryaashuubii Adil Akaazinne edantakkeena mallehe. Ixxom hanaa'n delbiinsi wo'i waaroo eddechcha aanshoo kee'n uulli gadanonne siiddakkamo.

⁴Ixxi qaphphihonaa baa'oobee'isaa giiranne aphphaa wiriiroo gudee'llisa ikko'i Adil Raaxiina Raamaaliy beeto Adil Faaquhee baddoobee'isa kure.

⁵Sooriy minaadab Isra'ee'l minaadabinnee ixxuwwi adilinnee keesenne dollotto'ookko.

⁶Yihuxxi minaadaba qasseena, u'nnissa'a ixxuwwi kollonne issiteenaa Xabi'ee'l beeto adillanina doo'lliteenaa qooddo'ookkoo.

⁷«Ihukkaarem an Moollanni Waa'i oo ixxuwwi a'llanchi awwaad bee'anee hore'em ihoobee'anee ihukkisa la'isoommo.

⁸Mashka'oomim Sooriyik horoor Damaasqo'o; Damaasqo'ik horoor Raaxiina. Lohayyennee onti hiinchi woronnee Isra'ee'l minaadab binnaa adillaninne weeshanchi gatookko.

⁹Ee'isam Isra'ee'llek horoor Samaare'e; Samaare'ikim horoor adil Faaquhette. «Ee bikkina amma'nnatonne qoxxitakkobeelas uullitakkeena xantakkamoyyo» yukko.

¹⁰Waa'i Akaazina odim

¹¹«Uulli xilliinsem ihukko iima'n libo'iinsi mat mare'e uwwona ki Moollanni Waa'a uunxe» yoo asso asse'ukko.

¹²Ihukkaarem Akaaz «Uunxoommoyyo; Waa'am keenoommoyyo» yukko.

¹³Issaayyaasim dabaraa «Adil Daawiit abaroosa, macceessehe! Manna keentakko'ok hoffe'ukkaare i Waa'am keentakkeenannihe?

¹⁴Ee bikkina Waa'i ixxi gagim mare'e uwwookko. Oon'o, baajaamo lamfoorette ikkamo; goonchi beetom qattamo; summam ‹Amaanu'eela›[1] yita'a weeshshamo.

¹⁵Ixxim jora uraa er doo'llimma xanoo ammane marabo itookko; adom agookko.

¹⁶Ihukkaarem oo ciil jora uraa eroka doo'llimma asheeroo'n illage ee lamem adilluwwikim uulli gindamaa udma'i ihookko.

¹⁷«Oono'o, Isra'eel Yihudiinsi annannukkaanniinsi kid moo'amaa la'oobee'i ammane Waa'i keesenne, ki minaadabannee kiyyanni minennee eebookko. Eeboohim Aasoo'l adila.

¹⁸«Ee ammane Abbaay daajji qee'l tochchiinsi Gibxi minaadaba biimbe'isa, Asoo'l minaadabam diishshisa gugaa waarona Waa'i mare'e uwwookko.

¹⁹Ixxuwwim hishshita'a fitta'a udma'i uulli cebbanne, ki'n girbuwwanne, uttolluwwannee allaachchi biilluwwannee wiiddantamo.

²⁰«Ee ammane Waa'i Efiraaxiis daajji eeqidiinsi aggiisu milaacinne oohim Aasoo'l adilluwwi adilinne ki'nnuwwi horoore, haareeddaa orachchi odda hundamii hogoossookko.

²¹«Ee ammane mat manchina xale'i mat addichchii lam gereechchii hee'ookko.

²²Oo keen lobakat ado uwwoo bikkina oo manchi ixxena hasisoo hurbaata hundam siixxookko. Ee bikkina uullanne gatoo mannik hurbaat maraboo adoo ihookko.

²³«Ee ammane kum bira ihoo mat kum woyi'n kaashshi kaasamu beyyi hundannem uttii halluttii mutookko.

²⁴Uullim uttinnee halluttinnee wo'mmaakkoohan ihoo bikkina minaadab hochchina firookkok xiyyinnettee tokkaashshe'innettee.

²⁵Uttaa halluttaa baddaa wonnanninne abuullakka'a hurbaata wixakkam duunnuwwi kolli ayyim marooyyo. Ihukkaarem diinatii gereebbi allaachchii hosoo beyyi ihookko» yukko.