Read Hadiyya Issaayyaas Kitaaba 8 Bible Online

Issaayyaas Kitaaba 8 - Hadiyya bible

Issaayyaas Kitaaba 8

¹Waa'i iina «Lob kirbaasa gudissaa ‹Bi'isseenaa qeefaddeenaa gaaggaabe› yitaa qabar fidalluwwinne kitaabe.

²Amma'nnanto'oo lamem manchom oohim qeessichchi Ooriyoo Baraakiy beet Zakkaaryaasaa naqaashshuwwi issitaa disse» yukko.

³Hofqax ammaniinsi lasonne hiraagaanchotte hee'llo'i i meentichcho iina siitto'o; goonchi beetom qatto'o. Waa'im iina «Summa ‹Bi'isseenaa qeefaddeenaa› yitaa weeshe.

⁴Oo ciil ‹Abba, aadde› yaa weeshimma la'oo'n gaassaa Damaasqo'i amaxxii Samaare'i qeefado'ii Aasoo'l adilinne bogamaa marookko» yukko.

⁵Waa'i la'mmaaggem iina

⁶«Ku minaadab qaphphaa daadoo Saliihoo'm bu'i wo'o sabaa adil Raaxiinaa adil Faaquhee doo'llaakko.

⁷Ee bikkina an Aasoo'l adila malaayyaam ixxi gogotinne maqirem ka minaadabanne ki'oo'isa issoommo; oohim Efiraaxiis daajji aqqaa tochchiinsi tochcho afaa wo'mmoohaannisa.

⁸Dirisukkuuyyim Yihuxxi uulla afookko; aqqaa hundi luwwam ifiisoo bikkina gaanji afeebe'e afookko» yukko. Ihukkaarem Waa'i niinninnette! Biddiqu ixxi ladim ni uulla egerookko.

⁹Ka uulli minaadaba, sha'llammehe. Ihukkaarem baddehe; qee'l uullanne hee'llakkam keenim macceessehe; orina guddehe. Ihukkaarem baddehe. Orina guddehe; ihukkaarem baddehe.

¹⁰A'llammehe; ihukkaarem sawwitakko'isa ihooyyo. Qooddehe; ihukkaarem Waa'i niinninnetti ihu bikkina qooddakko'isa ihooyyo.

¹¹Ka minaadaphpheka googo awwonaa maroombee'isa Waa'i ixxaanninne wodaam malaayyinne qoxxisaa kurukko.

¹²«Ixxuwwi dollotto'o yitamoka ki'nnuwwi yitakkotte; ixxuwwi badditamoka ki'nnuwwi badditakkotte; muggitakkotteme.

¹³An gogoxxi Moollanni keesammi ihummisa sawwi'llehe; xale'i eesem baddehe.

¹⁴Iikki keesammoo'm lombi Yihuxxaanninaa Isra'ee'l minaadabinaa qolanta'a ubbam kina ee'isam Yerusaalee'm minaadabina qaash ihookko.

¹⁵Ee bikkina lobakat keen qolantamo; ubba'atim iiqantamo; qaashannem amadantamo» yukko.

¹⁶Iikka losano egere; i seeram iina awwonaa'n wodanonne koobe.

¹⁷Waa'i Isra'ee'l minaadabiinsi ille dabarukkaarem i amma'nnato ixxonne issoommo.

¹⁸Oono'o, anii iina Waa'i uwwu i oosii Xiyoo'n duunanne hee'oo gogoxxi Moollanni Waa'iinsi Isra'ee'l minaadabina uwwammaammoo mare'ee maalallatoo.

¹⁹Manni ki'nnuwwa «Lobakata wocukkuuyyii hashaashshukkuuyyii kiiroo keenoo wiidda weeshoo keenoo xa'mmehe» yukkaare eehannah minaadab ixxi Waa'a xa'mmimmi hasisam hee'ukkoyyonnihe? Hee'oo kee'n bikkinne wiidda weeshimmi mahina hasisukko?

²⁰Waa'i ki'nnuwwina uwwu seeraa ijaajoo moo'llehe; eehido'i sagaramdu woccobeelas caakki ixxuwwanne bee'e.

²¹Ixxuwwi sibaarinnee u'nninnee uullanne karkaaddamo; sibaa'l lobakatiinsi ki'aa gancattamo. Iimane moo'llu'uuyyi adilaa ixxuwwi waa'aa duuntamo.

²²Uullam heeshta'a moo'llamo; ihukkaarem moo'llamok u'nna, tuunsoo baddisoo umbu'llaa. Ee kee'mmalli tuunsonnem uunjantamo.