Read Hadiyya Issaayyaas Kitaaba 9 Bible Online

Issaayyaas Kitaaba 9 - Hadiyya bible

Issaayyaas Kitaaba 9

¹Ihukkaarem u'nnanne hee'u keen ka lasage neeyyat bee'an ihooyyo. Illagee'n doolle Zaabiloo'nnekii Niftaalee'm uullii sholle'nnanne hee'ukko. Ihukkaarem lasaanchi doollenne Yoordaanoosiinsi eeqidonne Dambalaq gooqqi gammalanne mulli minaadab hee'oo Galii'l uullim lomba siidookko.

²Tuunsonne hee'am hee'u minaadab oono'o, caakka moo'ukko. Tuunsi uullanne hee'oo keeninam caakki firukko.

³Waa'a, ki minaadaba dutissitto; liiranchinnem wo'mmitamisa issitto. Manni atoota wixxaa'oo ammane te'im qeefajja baxxamoo ammane liiramoo'isa ki minaadabim at issitti luwwanne liiramookko.

⁴Gaassi doolle Miidiyaa'm manna kaa'llittisam kabadem ki minaadabanne iyyiisamu gaanjaqqaa cekkonne yoo biccoo iiqansitto. Ki minaadaba wor amadimminne gassam hee'ukkokam kaa'llitto.

⁵O'l manni kobe'ii xiiginne bi'aakkoo ixxuwwi eddechchii hundim giiranne shokkookko. Gii'l haqqisam aphphookko.

⁶Oono'o, niina ciilichchi qaramaakko! Goonchi beetim uwwamaakko! Ixxi niina awwonsaanchi ihookko. Summim «Maalalsiisoo sogaancho, malaayyaam Waa'a, heer heeraxxi annaa xummina daannaa» yamamookko.

⁷Adilla'n daannoomina gabal bee'e; adillanim heer heeraxxi xummi leeraakkoohan ihookko. Kabadiinsi ki'isaa heer heerina hanqinnee golo'oombee'i oogato'innee wo'mmaakkoo adillan Daawiit adilla'n barcumanne qoxxoo'isa issookko. Gogoxxi Moollanni Waa'ik to'achchi kaka isseena qoodaakko.

⁸Waa'i Yaaqoob shumo'i ihu Isra'eelanne oogatoohan ihukkisa la'isaakko.

⁹Isra'ee'l minaadabii Samaare'i beero'onne hee'llam keenii kaka issukkok Waa'i ihukkisa laqqamo; ihukkaarem bolxitam keenoo xiiqqaammuwwaa ikka'a

¹⁰«Harinne baxakko'i minneewwi gindamaakko; ihukkaarem neese daballaa cabbaramaakkoo kininne banxoommo; oda'i utubbuwwi iiqamaakko; ihukkaarem neese doo'llamaakkoo liibaanoos haqqinne uullinsoommo» yitamo.

¹¹Ee bikkina Waa'i ixxuwwinne uullixxantam keeno ki'isookko; diina'im ixxuwwanne ki'llamisa issookko.

¹²Eelliinchi firoo kollinne Sooriy manna eelliinchi aagoo kollinnem Filisxee'm manna asse'aa Isra'ee'l minaadaba qassamisa issookko; oo hundim ihaa Waa'ik quunqi billukkoyyome; ixxi angim guzumo'eena biddiqukkisame.

¹³Ihukkaarem Isra'ee'l minaadab ee guzumo'u Waa'i kollonne daba'llukkoyyo; gogoxxi Moollannam hasukkoyyo.

¹⁴Ee bikkina Waa'i mexxo'i mat ballanne Isra'eeliinsi horoo'llisaa sheeri'mmisaa, dimbaaphphi caafisaa shomboqo'isaa ikko'i keeno murookko.

¹⁵Horoor lommannaa la'anto'oo keenoo; sheerim odim qophphano losissam hiraagaano.

¹⁶Ka minaadaba awwonsitam keen huushissamuulla; minaadabim googiinsi firaa jaljalloolla.

¹⁷Ee bikkina Waa'i harde'i keenonne liiramooyyo; adaraalluwwinaa busar meentinaa qishixxooyyo; hundim Waa'a baddoobee'anee jora issoohanee ihaakko; hundim shigigaa'oo sagara wocoohane; oo hundim ihaa Waa'ik quunqi billukkoyyome; ixxi angim guzumo'eena biddiqukkisame.

¹⁸Ee bikkina ka minaadaphphek jolli uttaa halluttaa itoo gii'llsa; udma'anne dooma itoo gii'llisa wiriir xabbaa uullu utuphphisa.

¹⁹Gogoxxi Moollanni Waa'i quunqinne uulli shokkookko. Minaadabim gii'l haqqisa ihookko; abbaayyim abbaayyo gatiseena xanooyyo.

²⁰Godditeebe'e ittamo; ihukkaarem sibaatto'isame. Ee'isam mulli kollinne fii'lla'a ittamo; ihukkaarem godditamoyyo. Lasaanchonne ixxuwwi oosom ittamo.

²¹Oohim Minaase Efireema Efireemim Minaase qasookko. Lamem sullim mat ikka'a Yihuxxi minaadabanne ki'llamo. Oo hundim ihaa Waa'ik quunqi billukkoyyome; ixxi angim guzumo'eena biddiqukkisame.