Read Hadiyya Qeessuwwi Kitaaba 1 Bible Online

Qeessuwwi Kitaaba 1 - Hadiyya bible

Qeessuwwi Kitaaba 1

¹Waa'i ixxi Keesammi Dukkaa'n woronne ihaa Muse'e weeshaa

²«Isra'ee'l minaadabina ‹Ki'nnuwwiinsi ayyim iina lariinsi, gereebbiinsi te'm fella'iinsi hincaa'llehe.

³« ‹Oo hincaa'ookkok lariinsetti ihulas miiqakkam luwwi bee'i labeena doo'llaa hincaa'ona. Oohim i illagenne er kitim ihoo'isina Keesammi Dukkaana aagakkam goocanne hincaa'ona.

⁴Oo manchi ee shokkiisakka'a hincaa'akkam kitimina hincaa'u diinaxxi horoorenne ixxi anga issona; oohim ixxi baaxiil haafamoo'isina eran ihookko.

⁵Oo manchi ee labeena i illagenne durona; Aaroon shumo'iinsetti ihu qeessuwwi eehanni xiiga iina hincaa'llona. Dukkaa'n goocanne yoo kiti'm beyyi midaadduwwi hundannem wixxona.

⁶Ee lasage oo manchi shookkiisakka'a hincaa'akkam kitimina duramu diinaxxeka omachcho coo'ona; qaamafeetam annanni annanni issaa fissona.

⁷Aaroon shumo'iinsetti ikko'i qeessuwwi kiti'm beyyonne haqqa tuubba'a giittona.

⁸Oo qeessuwwi ee qaamafeettuwwa, horooree di'iraa edda'a kiti'm beyyonne tuubamu haqqanne dissitona.

⁹Ihukkaarem oo manchi ee labee'nneka godaphphi mu'utaa lokkuwwaa wo'inne aanshona; qeessichchim ee kitima hundam kiti'm beyyonne shokkiisona; oohim shokkiisakka'a hincaa'akkam kitim ihu bikkina enji eese liiransoohane ihookko.

¹⁰« ‹Oo manchi Shokkiisakka'a hincaa'akkam kitimina gereebbiinsi te'im fella'iinsi hincaa'eena hasulas miiqakkam luwwi bee'i ambula hincaa'ona.

¹¹Eeham kiti'm beyyiinsi hanaa'n qarinne i illagenne durona; Aaroon shumo'i ikko'i qeessuwwim xiiga kiti'm beyyi midaadduwwanne wixxona.

¹²Oo manchim ambu'lleka maara qaamafeetinne annanni annanni issaa lasage qeessichchi ee qaamafeettuwwa, horooree di'iraa edaa kiti'm beyyonne tuubamu haqqanne dissona.

¹³Ihukkaarem oo manchi ee ambu'lleka godaphphi mu'utaa lokkuwwaa wo'inne aanshona. Qeessichchim ee kitima hundam kiti'm beyyonne shokkiisona; oohim shokkiisakka'a hincaa'akkam kitim ihu bikkina enji eese liiransoohane ihookko.

¹⁴« ‹Oo manchi shokkiisakka'a hincaa'akkam kitimina hincaa'eena hasukkok cii'iinsette ihulas handare'iinsi te'im handare'i wotalliinsi hincaa'ona.

¹⁵Qeessichchim eekka kiti'm beyyonne hincaa'ona; gaanjem booqaaqaa annannissona. Horoorem kiti'm beyyonne shokkiisona; xiigim ee beyyi midaadonne taktakihona.

¹⁶Ladoo godaphphi mu'utaa annannissaa kiti'm beyyiinsi eelliinchi firinne gii'lbuchcha fincakkam beyyonne uunjona.

¹⁷Laddeewwam amadaa orachchooma annannissoo'nnim diqaa kiti'm beyyonne giiranne shokkiisona; eehido'i kiti'm enji eese liiransoohane ihookko.