Read Hadiyya Qeessuwwi Kitaaba 10 Bible Online

Qeessuwwi Kitaaba 10 - Hadiyya bible

Qeessuwwi Kitaaba 10

¹Aaroon oosiinsi Naadaabii Abihii annannichchim ixxuwwi mude'uwwa massita'a giira issito'o; ee giiranne aduruusa wiiriissita'a Waa'ina hincaa'llo'o. Eehido'i giira hincaa'llona Waa'i ixxuwwa ijaajubee'i bikkina oo giir keesamubee'an hee'ukko.

²Ee bikkina Waa'i asse'u giir ixxuwwa itukko; Waa'i illagennem leto'o.

³Muse'em Aaroonina «Waa'i ‹I illagenne hincaa awwaadoo hundim iikka keesammooma lonsona; anim i minaadaphphi illagenne lomba siidoommo› yaa wocu ammane qoxxisaa kurukkok kane» yukko. Aaroonim matem dabachcham uwwoo'n cawwaa urukko.

⁴Muse'e Aaroonina annabbaayyi ihu Uzi'eel ooso Misaa'eelaa Eelxaafaanaa weeshaa «Waattakka'a ka ki'nnuwwi abbaayyuwwika leesha Keesammi Dukkaa'n beyyiinsi ki'issakka'a wiidda'n beyyiinsi haxonne fissehe» yukko.

⁵Ixxuwwim waatta'a Muse'e ijaajukkisannem ee leesha qeessooma'n eddechchinnem wiidda'n beyyiinsi haxonne fissito'o.

⁶Ee lasage Muse'e Aarooninaa Aaroon oosina Ali'aazarinaa Itaamaarinaa «Ki'nnuwwika horoore hogoossitakkotte; eddechcham dereettakkotte; eekka issitakkolas letakkamo. Waa'im ixxi minaadabanne quunqa dilliisookko. Ihukkaarem ki'nnuwwina abbaayyuwwi ikko'i Isra'ee'l minaadab Waa'i asse'u giirinne leto'i keenina wi'lliteena xantamo.

⁷Waa'ik laphphakkam zayti ki'nnuwwanne yoo bikkina Keesammi Dukkaaniinsi fittakkotte; eebeelas letakkamo» yukko. Ixxuwwim Muse'e ijaajukkisanne ikko'o.

⁸Waa'i Aaroonina

⁹«Atii ki oosii letakkambee'isa woyi'n diqaasa te'im dimbisoo mulli agga aggakka'a Keesammi Dukkaana aaggakkambee'isa ege'llehe. Oohim ki'nnuwwi oos oos afeebe'e heer heerina ihoo seera.

¹⁰Ki'nnuwwi keesammaa keesamubee'ekaa, haashaarammaa haashaaramubee'ekaa annanni issitakka'a la'immi hasisookko.

¹¹An Muse'enne ihaa uwwummi seera hundam Isra'ee'l minaadabina losissehe» yukko.

¹²Muse'e Aarooninaa lehiinsi gatto'i lamem oosina Ali'aazarinaa Itaamaarinaa «Waa'ina giirinne hincu hurbaaxxi kitimiinsi gatukkoka massitakka'a qorosho'o sallehe; oohim hore'em keesammi ihu bikkina kiti'm beyyi gadanonne ittehe.

¹³Waa'ina giirinne hincoo kitimiinsi kiinaa ki oosinaa uwwamu sharad ihu bikkina keesammi beyyonne ittehe. Waa'i ee'isa ijaajaakko.

¹⁴Ihukkaarem wonciwoncaa'imminne Waa'ina hincaa lasage qeessuwwina sharad ihu gubeedoo eeddiraasoo atii ki abaroosii ki landam eddaa keesammi beyyonne ittehe. Oohim Isra'ee'l minaadab mateeyyoo'm kitimina hincaa'llam kitim hundiinsim sharad ihaa kiinaa ki oosinaa uwwamaakkoohane.

¹⁵Minaadab di'ira Waa'ina kitim issita'a hincaa'llam ammane ee gubeedoo eeddiraasoo eebbona; oohim Waa'i ijaajukkisanne kiinaa ki oosinaa heer heerina sharad ihaa uwwamaakkoohane» yukko.

¹⁶Muse'e baaxii'l haafixxi kitimina hincaa hee'u fellakkichchi bikkina qoxxisaa xa'mmaa shokkukkisa la'ukko. Muse'em Aaroon oosonne Ali'aazarannee Itaamaarannee lobakata quuqukko.

¹⁷Ixxuwwinam «Baaxii'l haafixxi bikkina hincu kitima keesammi beyyonne mahina ittakko'oyyo? Oo kitim hore'em keesamaakkoohane. Ookki minaadaphpheka baaxiilo haafissiissakkona Waa'i ki'nnuwwina uwwaakkoohane.

¹⁸Ee fellakkichchik xiig Keesammi Dukkaa'n woro aagubee'i bikkina an ki'nnuwwa ijaajummisanne ee kitima keesammi beyyonne itimmi hasisam hee'ukko» yukko.

¹⁹Aaroonim Muse'ena «Baaxii'l haafitina hincu kitima kaballa itaammoohan ihuta'n ookki Waa'a liiransam hee'ukkonnihe? Oono'o, minaadab kaballa baaxii'l haafitina hincoo kitimaa shokkiisakka'a hincaa'akkam kitimaa Waa'i illagenne eebaakko. Ihukkaarem oono'o, kido'i luwwi eesenne afaakko» yaa dabarukko.

²⁰Muse'em eekka macceesaa ee dabachchanne liiramukko.