Read Hadiyya Qeessuwwi Kitaaba 11 Bible Online

Qeessuwwi Kitaaba 11 - Hadiyya bible

Qeessuwwi Kitaaba 11

¹Waa'i Muse'enaa Aarooninaa

²«Isra'ee'l oosina ‹Uullanne hee'oo fooraam diinatiinsi kanniinsi woroon yoo keeno ittehe.

³Oohim shuku'l diqammaa alle'oo keenoo.

⁴« ‹Alle'oohane ihaa shuku'l diqamubee'eka te'im shuku'l diqamaakkoohan ihaa alle'oobee'eka ittakkotte. Gaameelakkichchi alle'oohane; ihukkaarem shuku'l diqamubee'i bikkina haashaaramma.

⁵Wexeexichchi alle'oohane; ihukkaarem shuku'l diqamubee'i bikkina haashaaramma.

⁶Shumagichchi alle'oohane; ihukkaarem shuku'l diqamubee'i bikkina haashaaramma.

⁷Bonkekkichchi shuku'lla diqamma; ihukkaarem alle'oobee'i bikkina haashaaramma.

⁸Haashaarammi ihu bikkina ka kee'nneka maara ittakkotte. Leeshoomam nakkitakkotte.

⁹« ‹Dambalaqquwwannee daajjuwwannee hee'oo keeniinsi ladii gilico'ii yoo keeno hundam ittehe.

¹⁰Ihukkaarem wo'i woronne hee'oo ladii gilco'ii bee'i keeno hundam ittakkotte.

¹¹Eehido'i qooccanchuwwi haashaarammi ihu bikkina maara ittakkotte; leeshoomam nakkitakkotte.

¹²Ladii gilco'ii bee'i wo'i woro'l qooccanchi hundim haashaaramma.

¹³« ‹Iima'n cii'iinsi kanniinsi woroon yoo keeno shigigi'llehe bagaan ittakkotte. Oohim hishshammachcho, goolluunsichcho, oosame,

¹⁴sile'e, cingiraalla,

¹⁵annanni annanni qooraanta,

¹⁶guchchekkichcho, qurxumme'e itoo sile'e laboo ammachcho, annanni annanni sile'e,

¹⁷mooqqaqqichcho, hummaantichcho, laco'o, hagar digib shaashooqqi ammachcho,

¹⁸lokko qeeraa'l wo'agaagaancho, qurxumme'e itoo qeeraa'l ammachcho, goolluunsichcho laboo ammachcho,

¹⁹shimala yakkam ammachcho, gaanjo'o, qowqoweesichchoo garashshamee.

²⁰« ‹Lad hee'ukkuuyyi soor lokkinne maroo fooraam qooccanchi hundim haashaaramma.

²¹Ihukkaarem lad hee'ukkuuyyi soor lokkinne maroo keeniinsi uullanne xopheena xanoo gurubbi yoo keeniinsi kanniinsi woroon yoo keeno ittehe.

²²Oohim qawwaawwa, kochcha'nnaa annanni annanni hoffi kochcha'nnaa.

²³Ihukkaarem lad hee'ukkuuyyi soor lokkinne maroo qooccanchi hundim haashaaramma.

²⁴« ‹Kanniinsi woroon yoo diinaxxi mashka'inne haashaarantakkamo. Ee kee'nneka leesha nakkoo ayyim uulli hiimeebe'e haashaaramma.

²⁵Ee kee'nneka leesha ki'isoo ayyim eddechcha aanshaqqona; uulli hiimeebe'em haashaaramma.

²⁶« ‹Ihukkaarem shuku'l hee'aa diqamubee'ekii alle'oobee'ekii ki'nnuwwina haashaaramma; ki'nnuwwiinsi ee kee'nneka leesha nakkoo ayyim haashaaramma.

²⁷Soor lokki hee'aa oobbinne maroo keen hundim ki'nnuwwina haashaaramma; ee kee'nneka leesha nakkoo ayyim uulli hiimeebe'e haashaaramma.

²⁸Ee kee'n leesha ki'isoo ayyim ixxi eddechcha aanshaqqona; uulli hiimeebe'em haashaaramma. Oo keen ki'nnuwwina haashaaramma.

²⁹« ‹Uullanne mikmikoo qooccanchuwwiinsi kanniinsi woroon yoo keen ki'nnuwwina haashaaramma. Oo keenim fuuxe'e, dabayya, maanxoganna,

³⁰annanni annanni qoce'e, naachcha, gabalo'o, arajjeenaa hungubbaa.

³¹Uullanne mikmikoo keeniinsi ku keen ki'nnuwwina haashaaramma. Ka keeno te'im ka keeniinsi lehukkoka nakkoo ayyim uulli hiimeebe'e haashaaramma.

³²Oo keen lehaa uboo mah luwwim haashaaramma. Oohim haqqinne, carqinne, omachchinne te'im oddinne baxamu mu'utam ihulas wo'onne cefamona. Uulli hiimeebe'em haashaarammi ihaa lasage muccur ihookko.

³³Ka keeniinsi mat lehaa ayyi buchchi mu'uxxi woronnem ubulas ee mu'utanne yoo luwwi hundim haashaarammi ihoo bikkina ee mu'uta iiqqehe.

³⁴Ee mu'uxxi wo'iinsi itakkam hurbaatanne afulas oo hurbaat haashaaramma. Ee mu'utanne hee'oo agakkam luwwi hundim haashaaramma.

³⁵Oo keen lehaa uboo luwwi hundim haashaaramma. Xuf yoohanem ihukko xuf bee'i midachchi iiqamona. Oo keen ki'nnuwwina haashaaramma.

³⁶Ka kee'nnek leesh nakku ayyi luwwim haashaaramma; ihukkaarem wo'i bu'i te'im wo'i yoo delbi haashaaramooyyo.

³⁷Ee'isam zeretta nakkulas oo zeretti muccura.

³⁸Ihukkaarem zerettanne wo'i dunamaa lasage ee kee'n bayit nakkulas oo zeretti ki'nnuwwina haashaaramma.

³⁹« ‹Maara ittakkam diinatiinsittem ihulas bayitukkoka nakkoo ayyim hiim afeebe'e haashaaramma.

⁴⁰Ayyim ee bayitiinsi itulas ixxeka eddechcha aanshaqqona; uulli hiimeebe'em haashaaramona. Ee kee'n bayita ki'isookkokim ixxeka eddechcha aanshaqqona; uulli hiimeebe'em haashaaramma.

⁴¹« ‹Uullanne biqinne shurukkuuyyi maroo qooccanchi hundim haashaarammi ihu bikkina ittakkotte.

⁴²Biqinne shuroo keen, soor lokkinne maroo keen te'im lobakat lokki yoo qooccanchi hundim haashaarammi ihu bikkina ittakkotte.

⁴³Ka keeniinsi maham itimminne ki'nnuwwi gaga haashaassitakkotte.

⁴⁴An ki'nnuwwina Moollanni Waa'a. An keesammi ihummi bikkina ki'nnuwwi gaga annanni issehe; keesammuwwam ikkehe; biqinne shurukkuuyyi mikmikoo qooccanchuwwa itimminne ki'nnuwwi gaga haashaassitakkotte.

⁴⁵An ki'nnuwwina Moollanni iheena Gibxiinsi ki'nnuwwa awwonsaa fissummi Waa'i anette. An keesammi ihummi bikkina ki'nnuwwim keesammuwwi ikkehe.

⁴⁶« ‹Fooraam diinatinaa cii'inaa, wo'onne hee'oohanninaa uullanne mikmikoo qooccanchinaa hundinam ihoo seer kane.

⁴⁷Muccurannee muccur ihubee'aannonnee oohim itakkamokaa itakkambee'i diinatee qoossitakka'a annanni issitakka'a laqqehe› yi'llehe» yukko.