Read Hadiyya Qeessuwwi Kitaaba 12 Bible Online

Qeessuwwi Kitaaba 12 - Hadiyya bible

Qeessuwwi Kitaaba 12

¹Waa'i Muse'ena

²«Isra'ee'l minaadabina ‹Mat meentichcho lam foorette ikka'a goonchi beeto qattolas is xur waaroo amma'nnisam lamar balli afeebe'e haashaarammatte.

³Oo ciilim sadeenti ballanne ballachchanchi hasisookko.

⁴Ee'isam oo meentichcho xiig uullaa muccuttam sadii sas ballii afeebe'e keesammi luwwa maham nakkimmi hasisooyyo; Keesammi Dukkaanannem aaggoone.

⁵« ‹Ihukkaarem landichcho qattolas is xur waaroo amma'nnisam tommii soor balli afeebe'e haashaarammatte; xiigiinsi muccuttam lohayyii loh ballii afeebe'e egettona.

⁶« ‹Ee meentichchok muccurimmi amman beeddaa lasage ise qatto'i beet bikkinam ihukko landichchi bikkina shokkiisakka'a hincaa'akkam kitimina mat hiinchi gereechchi ambulaa baaxii'l haafixxi kitimina odim handarekkichcho te'im handarekkichchi geexaa Keesammi Dukkaa'n goocanne eebba'a eehenne awwaadoo qeessichchina eebba'a uwwitona.

⁷Qeessichchim eekka iina hincaa'ookko; haafissiisookkome. Isem xiiqqi dunanchi haashaaranchiinsi muccuttamo; ookki gooncho te'im landichcho qattam meentichchona seera.

⁸«Oo meentichcho gereechchi ambula eebbeena xantambeelas lam handare'e te'im lam handare'i geexa eebba'a matoo shokkiisakka'a hincaa'akkam kitimina la'mmekaa baaxii'l haafixxi kitimina hincaa'llona. Ee'isinne qeessichchi isena haafissiisookko; isem muccuttamo› yitaa kure» yukko.