Read Hadiyya Qeessuwwi Kitaaba 13 Bible Online

Qeessuwwi Kitaaba 13 - Hadiyya bible

Qeessuwwi Kitaaba 13

²«Ayyi manchonnem dashshi te'im jenje'n te'im bacaro'i firaa baddisoo jabbi ihulas qeessichchi Aaroon beyyo te'im qeessuwwi ikko'i ixxi oosiinsi mat beyyo massakkona.

³Qeessichchim ee jabbo qoossaa moo'ona; eehannikim oddi qadaallaa oo beyyi cebbulas ookki shishira. Qeessichchim oo manchi haashaaramukkisa la'isona.

⁴Ihukkaarem oo jabbi orachchonne qadaallaa kululleet cebbubeelasii oddi qaadaallubeelasii qeessichchi ee mancho lamar balli afeebe'e annanni ihaa hee'oo'isa issona.

⁵Qeessichchi odim lama'l ballanne qoossaa moo'ona; oo jabbi eraa'llisam ihaa haraaroo'n yoolas odim lamar ballina annanni ihaa hee'oo'isa issona.

⁶Odim qeessichchi lama'l ballanne qoossaa moo'ona; oo jabbi haraarimmi bikkenne quubaa moo'amulas ookki qosha bagaan oo manchi muccur ihukkisa la'isona. Oo manchim ixxi muccuroo'm bikkina eddechcha aanshaqqona.

⁷Ihukkaarem qeessichchi moo'aa muccur ihukkisa la'isaa lasage oo jabbi haraaraa moo'amulas oo manchi odim qeessichchi illagenne hincihona.

⁸Qeessichchim qoossaa moo'ona; oo jabbi illagee'nnaanniinsi exxaakkoohan ihulas ookki shishir ihu bikkina oo manchi haashaarammi ihukkisa la'isona.

⁹«Ayyi manchom shishir amadulas qeessichchi beyyo eebakkona.

¹⁰Qeessichchim ee mancho qoossaa moo'aa ee manchonne odda qadaallisoo qadaalli dashshi hee'ulasii ee dashshannem kashar maar moo'amulasii

¹¹ookki annaakkoo shishir ihu bikkina oo manchi haashaaramukkisa qeessichchi la'isona. Ixxi haashaaramukkis caakkaa la'amu bikkina annanni ihaa mulli hee'oo'isa issimmi hasisooyyo.

¹²Oo jabbi lokki xuranqiinsi horoo'l saraat afeebe'e itaakkoohan ihukkisa

¹³qeessichchi qoossaa moo'ona. Oo jabbi ee manchi orachchi hundannem afaa orachcho qadaallisaakkoohan ihulas oo manchi muccur ihukkisa qeessichchi la'isona.

¹⁴Ihukkaarem dashshanne kashar maar moo'amulas oo manchi haashaarammi ihookko.

¹⁵Qeessichchi odim qoossaa moo'aa oo beyyi maar ihaa kasharaakkoohan ihulas oo manchi haashaaramukkisa la'isona. Kashar maar ihoo'isa issookkok shishir ihu bikkina oo manchi haashaaramma.

¹⁶Ihukkaarem oo beyyi daba'llaa qadaallulas qeessichchi beyyo daba'llaa marona.

¹⁷Qeessichchi odim qoossaa moo'aa omar qadaallaakkoohan ihulas oo manchi muccur ihukkisa la'isona.

¹⁸«Mat manchi orachchonne dashshi fayye'aakkoo beyyi hee'aa

¹⁹lasage odim ee beyyonne qadaallaakkoo dashshi te'im kasharaakkoo bacaro'i firulas qeessichchi beyyo maraa moo'amona.

²⁰Qeessichchim qoossaa moo'ona; oo jabbi ee beyyo cebbisaa odda qadaallisaakkoohan ihulas ookki dashshinne asheeraakkoo shishir ihu bikkina oo manchi haashaaramukkisa la'isona.

²¹Ihukkaarem oddi qadaallubee'isa, beyyi cebbubee'isaa fayye'oolli ihukkisaa qeessichchi moo'ulas oo manchi lamar ballina annanni ihaa hee'oo'isa issona.

²²Oo jabbi edukkuuyyi marulas ookki shishir ihu bikkina oo manchi haashaaramukkisa qeessichchi la'isona.

²³Ihukkaarem oo bacaro'i eraa'llisam ihaa haraaroo'n yoolas ookki oma'l qoonca bagaan mulluwwi ihubee'i bikkina oo manchi muccur ihukkisa qeessichchi la'isona.

²⁴«Giir shokkiisaakkoo mat manchi orachchik qoonci abballulas te'im baar kashar ihulas

²⁵eekka qeessichchi qoossaa moo'ona. Ee qoonci kululleetanne yoo oddim qadaallulasii oo beyyim mulli beyyiinsi cebbulasii ookki gii'l shokki mashka'inne orachchonne firaakkoo shishir; ee bikkina oo manchi haashaaramaakkoohan ihukkisa qeessichchi la'isona. Ookki shishira.

²⁶Ihukkaarem oddi qadaallubee'isa, beyyi cebbubee'isaa fayye'oolli ihukkisaa qeessichchi moo'ulas oo manchi lamar ballina annanni ihaa hee'oo'isa issona.

²⁷Lama'l ballanne qeessichchi edaa moo'ona; jabboom illagee'nnaanniinsi exxaakkoohan ihukkisa moo'ulas ookki shishir ihu bikkina oo manchi haashaaramukkisa la'isona.

²⁸Ihukkaarem oo bacaro'i eraa'llisam ihaa haraaroo'n yoolasii fayye'ukkuuyyi marulasii ookki gii'l shokki mashka'inne firu qoonciinsi bagaan mulluwwayyo. Ee bikkina oo manchi muccur ihukkisa qeessichchi la'isona.

²⁹«Mat manchaannonne te'im meentichchaannonne horoorenne te'im eergaxanne omar hee'ulas

³⁰qeessichchi ee omara qoossaa moo'ona; oo beyyi mulli beyyiinsii cebbaa ee beyyi oddim baaraa wiculas ookki horoorenne te'im eergaxanne firoo boronsha te'im shishir ihu bikkina oo manchi haashaaramukkisa qeessichchi la'isona.

³¹Ihukkaarem oo beyyi mulli beyyiinsi cebbubee'isaa oddi heemachchubee'isaa qeessichchi qoossaa moo'aa oo manchi lamar balli afeebe'e annanni ihaa hee'oo'isa issona.

³²Lama'l ballina qeessichchi odim ee boronsha moo'ona; oo beyyi illagee'nnaanniinsi exxubeelas, oddi baarubeelasii mulli beyyiinsi lophphaa cebbubeelasii

³³oo manchi omaru beyyo nakkoo'n kululleetanne yoo oddooma hogoossona. Qeessichchi odim lamar balli afeebe'e oo manchi annanni ihaa hee'oo'isa issona.

³⁴Odim qeessichchi lama'l ballanne ee omara qoossaa moo'ona; boronshi illagee'nnaanniinsi exxubeelasii oo beyyi mulli beyyiinsi lophphaa cebbubeelasii oo manchi muccur ihukkisa qeessichchi la'isona; ixxi eddechcham aanshaqqaa muccur ihona.

³⁵Ihukkaarem ixxi muccur ihukkis la'amaa lasage oo boronshi illagee'nnaanniinsi exxulas

³⁶qeessichchi odim moo'ona. Boronshi illagee'nnaanniinsi exxaakkoohan ihulas oo manchi haashaaramaakkoo bikkina baar oddi yoo'isaa bee'isaa moo'immi hasisooyyo.

³⁷Ihukkaarem qeessichchi sawwixxisanne omar illagee'nnaanniinsi edubeelasii fayya'i heemachchi oddi mutulasii oo omar fayye'aakko. Oo manchim muccuraakko; muccur ihukkisam qeessichchi la'isona.

³⁸«Mat manchonne te'im meentichchonne qadaalli bacaro'i hee'ulas

³⁹qeessichchi qoossaa moo'ona; oo bacaro'i ajaar ihulas ookki hanenne firaakkoo hawwodoobee'i jenje'n ihu bikkina oo manchi muccura.

⁴⁰Mat manchik sammi murugulas ookki booyyinna bagaan oo manchi muccura.

⁴¹Illaginne te'im afarinne murugulasim ookki booyyinna bagaan oo manchi muccura.

⁴²Ihukkaarem sammaannonne te'im illaqqi booyyinnanne baar kashar omar hee'ulas ookki shishira.

⁴³Qeessichchim eekka qoossaa moo'aa sammaannonne te'im illaqqi booyyinnanne dashshukkok shishira loboo baar kashare omar ihulas

⁴⁴ee mancho shishir amadu bikkina haashaaramaakko. Ixxi horoo'l oma'l mashka'inne haashaaramukkisa qeessichchi la'isona.

⁴⁵«Shishir amadu manchi dereerammi eddechcha edde'ona; ixxi horoorem tiroone. Ixxi suumennem eddechcha ifiisona; ee lasage ‹An haashaaramma! Haashaaramma!› yukkuuyyi laarona.

⁴⁶Oo jabbi ixxonne yoo qax ammanenne oo manchi haashaaramma; mulli manniinsi annanni ihaa wiidda'n beyyiinsi haxonne mullam hee'ona.

⁴⁷«Jabbi gereebbi oddinne te'im talbi fatirinne baxamaakkoo eddechchanne,

⁴⁸eddechchi fatiranne te'im eddechcha dadakkam mu'utanne, talbi fatiranne te'im gereebbi oddanne, omachchonne te'im omachchinne baxamu ayyi luwwannem moo'amaa

⁴⁹hagar buylab te'im kashar ihulas ookki daba'llamoo jabbi ihu bikkina ee eddechcha qeessichchi moo'ona.

⁵⁰Qeessichchi qoossaa moo'aa lasage oo jabbi moo'amu luwwi hundam lamar balli afeebe'e annanni issona.

⁵¹Qeessichchi odim lama'l ballanne moo'aa jabbi illagee'nnaanniinsi exxaakkoohan ihulas ookki shishira; oo luwwim haashaaramma.

⁵²Eekka qeessichchi giirinne shokkiisona; mashka'oomim ookki baasukkuuyyi maroo shishir ihu bikkina giirinne bi'immi hasisookko.

⁵³«Ihukkaarem qeessichchi ee jabbo qoossaa moo'oohaare illagee'nnaanniinsi exxubeelas

⁵⁴oo jabbi yoo luwwi wo'inne aanshakkona ijaajona; lamar balli afeebe'e annanni issaa dissona.

⁵⁵Ee lasage odim qeessichchi qoossaa moo'ona; oo jabbi illagee'nnaanniinsi exxubeeta'nnim hagar daba'llubeelas haashaaramma. Haninnem ihukko worinne jabbi moo'amoo eddechchi hundim giirinne shokkona.

⁵⁶Ihukkaarem oo eddechchi te'im mu'ut wo'inne aanshamaa lasage qeessichchi odim qoossaa moo'oohaare oo jabbi illageen yoo'isiinsi fatakaakkoolas mare'i yoo qax beyyi xale'e omachchaanniinsi te'im carqi eddechchiinsi dereeraa hoorona.

⁵⁷Ihukkaarem oo jabbi odim daba'llaa moo'amulas illagee'nnisiinsi exxoolli ihu bikkina eehanni annichchi shokkiisona.

⁵⁸Jabbu luwwa aanshaa lasage oo jabbi fatakkulas la'mmaaggem aanshona; ee lasage muccur ihookko» yukko.

⁵⁹Gereebbi oddinne te'im talbi fatirinne te'im omachchinne baxamu eddechchi jabbulas haashaaramukkisaa haashaaramubee'isaa la'akkam seer kane.