Read Hadiyya Qeessuwwi Kitaaba 14 Bible Online

Qeessuwwi Kitaaba 14 - Hadiyya bible

Qeessuwwi Kitaaba 14

²«Mat manchi shishiriinsi fayye'aa lasage ihimmi hasisoo muccuroo'm seer kanniinsi woroon yoohane. Oo manchi muccur ihukkis kuramoo balla qeessichchi beyyo hincihona.

³Qeessichchim ee mancho wiidda'n beyyiinsi haxonne fissaa qoossaa moo'ona; manchoom jabbiinsi fayye'aakkoolas

⁴oo manchi muccur cii'ika lamo, digiphphi haqqa, muulli kashar fatiraa hiisoophphaa eebona qeessichchi ijaajona.

⁵Ee lasage muccur bu'i wo'i yoo loqooqo'i buchchi mu'utanne ee cii'iinsi mat duramoo'isina qeessichchi ijaajona.

⁶Digiphphi haqqi buyya, muulli kashar fatira, hiisoophphaa duramoo'n gatu cii'ichchoo ee duramu cii'ichchi xiiganne qeessichchi cefona.

⁷Shishiriinsi muccuroo manchonne ee cii'ichchi xiiga qeessichchi lamar kore wixona; ee lasage oo manchi muccurukkisa la'isona. Fooraam la'm cii'ichchim bararaa marona fatakihona.

⁸Oo muccuru manchi ixxi eddechcha aanshona; ixxi horoore hundam hogoossona; orachchom aanshaqqona. Ee lasage muccur ihaa wiidda'n beyyo daba'llona; ihukkaarem lamar balli afeebe'e ixxi dukkaaniinsi biiranne afuurona.

⁹Lama'l ballanne odim ixxi horoore, haareedda, deemmaa ixxi orachchonne yoo mulli odda hundamii hogoossona; ixxi orachchoo eddechcham wo'inne aanshona; muccuram ihookko.

¹⁰«Oo manchi sadeenti ballanne miiqakkam luwwi bee'i gereebbi ambulluwwika lamoo mat hiinchi gereechchi geexaa hincaa'ona. Ee'isam hurbaaxxi kitimina ihoo wee'l zaytinne cukkamaakkoo sas kiilo'i danaam qamaa leeti'l saxxi suum wee'l zaytaa hincaa'ona.

¹¹Qeessichchim ee mancho hincaa'u kitimmuwwinne maqirem Keesammi Dukkaa'n goocanne i illagenne hincaa'ona.

¹²Ee lasage qeessichchi ee gereebbi ambulluwwiinsi mato leeti'l saxxi suum wee'l zaytinne maqirem hawwojji bikkina hincoo kitim issaa hincaa'ookko. Eeham wonciwoncaa'imminne annanni kitim issaa iina hincaa'ona.

¹³Ee ambula baaxii'l haafixxi kitiminaa shokkiisakka'a hincaa'akkam kitiminaa hincoo fooraam diinate durakkam keesammi beyyonne durona; oohim hawwojji bikkina hincu kitim baaxii'l haafitina hincoo kiti'mmisam qeessichchina sharad ihaa uwwamoo bikkinatte. Ookki hore'em keesamma.

¹⁴Qeessichchi odim ee kiti'm xiigiinsi hofqaxam aa'aa muccurukkisa la'isoo manchaannoonne makki kolli macci ludonnee makki angaannonnee lokkaannonnee lob maxxaarannee labona.

¹⁵Ee'isam qeessichchi wee'l zaytiinsi hofqaxam aa'aa ixxi gaqqi qeddi angi oobbanne dunona.

¹⁶Qeessichchi makki angi maxxaara ee zaytanne cefukkuuyyi lamar kore i illagenne wixona.

¹⁷Qeessichchi ixxi angi oobbanne gatu zaytiinsi ee muccuroo manchi makki macci ludonnee makki angaannonnee lokkaannonnee lob maxxaarannee labona.

¹⁸Qeessichchi ixxi angi oobbanne gatu zayta ee muccuroo manchi horoorenne dunona; ee'isinne qeessichchi ee mancho i illagenne haafissiisookko.

¹⁹«Ee lasage qeessichchi baaxii'l haafixxeka kitima hincaa'aa ee manchina muccuroo'm seera wonshona; ee lasage shokkiisakka'a hincaa'akkam kitimina hincukkoka durona.

²⁰Qeessichchi ee kitima hurbaaxxi kitiminne maqirem kiti'm beyyonne hincaa'ona; ee'isinne ee manchina haafissiisookko; oo manchim muccurookko.

²¹«Oo manchi ee hundam hincaa'eena xanoobee'i buxichchi ihulas wonciwoncaa'imminne ixxi baaxii'l haafitina ihoo mat gereechchi ambula hawwojji kitimina hincaa'ona. Eehanninne maqirem wee'l zaytinne cukkamaakkoo mat kiilo'i er qama hurbaaxxi kitimina hincaa'ona; ee'isam wee'l zaytika leeti'l saxxi suume edaa hincaa'ona.

²²Ee'isam lam handare'e te'im handare'i wotalla matoo baaxii'l haafixxi kitimina matoo odim shokkiisakka'a hincaa'akkam kitimina ixxi malaayqaxinne hincaa'ona.

²³Muccuroo'm seer ihoo sadeenti ballanne ka keeno hundam eebaa Keesammi Dukkaa'n goocanne i illagenne qeessichchina uwwona.

²⁴Qeessichchim ee gereechchi ambulaa wee'l zaytaa aa'aa i illagenne wonciwoncaa'akka'a kitim issaa hincaa'ona.

²⁵Qeessichchi hawwojji bikkina kitim ihaa hincu gereechchom durona; eehanni xiigiinsi hoffokam aa'aa ee muccuroo manchi makki kolli macci ludonnee makki angaannonnee lokkaannonnee lob maxxaalluwwannee labona.

²⁶Qeessichchi ee zaytiinsi hofqaxam ixxi qeddi angi oobbanne dunona.

²⁷Ixxi makki angi maxxaaram eehannonne cefukkuuyyi i illagenne lamar kore wixona.

²⁸Ee'isam ixxi anganne yoo zaytiinsi aa'aa hawwojji bikkina hincu kiti'm xiiga labukkisam ee muccuroo manchi makki kolli macci ludonnee makki angaannonnee lokkaannonnee lob maxxaalluwwannee labona.

²⁹I illagenne haafissiiseena qeessichchi ixxi anganne gatu zayta ee manchi horoorenne dunona.

³⁰Muccuroo manchi handare'iinsi te'im handare'i wottalliinsi mato ixxi malaayqaxa hincaa'ona.

³¹Oo manchi ee handare'iinsi matoo baaxii'l haafixxi kitimina la'mmekaa shokkiisakka'a hincaa'akkam kitimina hurbaaxxi kitiminnem hincaa'oona. Ee'isinne qeessichchi ee muccuroo mancho i illagenne haafissiisookko.

³²Shishiriinsi muccurimmi bikkina qoodamu kitima hincaa'eena xanoobee'i buxichchina ihimmi hasisoo seer kane» yukko.

³³Waa'i Muse'enaa Aarooninaa

³⁴«An ki'nnuwwina uwwoommi Kana'aa'n uulla aaggakkam ammane ki'nnuwwi minneewwiinsi mat jabboo'isa issumlas

³⁵ixxi min jabbukkisa la'u ayyi manchim qeessichchi beyyo maraa ‹I minenne jabbi yookkoka laboolla› yaa kurona.

³⁶Ee minenne yoo mu'ut hundim haashaaramoobee'isa qeessichchi jabbo moo'eena ee mine aagoo'n illage ee miniinsi mu'ut hundim firoo'isa issona; ee lasage mine aagaa qoossaa moo'ona.

³⁷Qeessichchi eekka moo'aa lasage oo jabbi shaano'o te'im bir kashar ihaa gorte'e bi'isukkuuyyi moo'amulas

³⁸qeessichchi ee miniinsi firaa lamar balli afeebe'e xufamoo'isa issona.

³⁹Lama'l ballanne daba'llaa waaraa odim qoossaa moo'ona; oo jabbi gorte'enne illagee'nnaanniinsi exxaa haraaraakkoolas

⁴⁰oo jabbi yoo kinneewwa fissakka'a beero'iinsi tochchonne haashaarammi beyyonne uunjakkamisa issona.

⁴¹Ee'isam woro'l gorte'i hundim huufamaa ee huufamu buchcha beero'iinsi tochchonne haashaarammi beyyonne uunjakkamisa issona.

⁴²Ee lasage ee kinneewwi bikkenne mulli haareechchi kinneewwi aaggaa haareechchi harinne nannakkona.

⁴³«Kina fissakka'a, gorte'e huufakka'ahii hara nannakka'ahii lasage oo jabbi odim ee minenne moo'amulas

⁴⁴qeessichchi maraa qoossaa moo'ona; oo jabbi ee minenne daba'llaa moo'amulas ookki fatakkoobee'i jabbi ihu bikkina oo min haashaaramaakko.

⁴⁵Ee bikkina oo min gindamona; haqqii harii hundim gindamaa beero'iinsi tochchonne haashaarammi beyyonne uunjamona.

⁴⁶Oo min xufamaa hee'u ammane ayyi manchim ee mine aagaakkoohan ihulas uulli hiimeebe'i haashaarammi ihookko.

⁴⁷Ee mine aagaa iinse'ukkok te'im hurbaata itukkok hee'ulas ixxi eddechcha aanshaqqona.

⁴⁸«Ee mine la'mmaagge nannakka'a lasage qeessichchi waaraa moo'oohaare jabbi illagee'nnaanniinsi exxubeelas oo jabbi fataku bikkina oo min muccurukkisa qeessichchi la'isona.

⁴⁹Ee mine muccussimmina lam cii'a, digiphphi haqqa, muulli kashar fatiraa hiisoophphaa hincaa'ona.

⁵⁰Ee cii'iinsi mato muccur bu'i wo'i yoo buchchi mu'utanne durona.

⁵¹Ee lasage digiphphi haeqa, hiisoophpha, ee fatiraa foorinne yoo cii'ichchoo duramu cii'ichchi xiigannee bu'i wo'onnee cefona; eekkam minenne lamar kore wixona.

⁵²Ee'isinne qeessichchi ee mine cii'ichchi xiiginne, muccur bu'i wo'inne, foorinne yoo cii'ichchinne, digiphphi haqqinne, hiisoophphinnee muulli kashar fatirinnee muccuroo'isa issookko.

⁵³Ee lasage foorinne yoo cii'ichcho beero'iinsi tochchonne biir uullanne bararona fatakookko; ee'isinne ee mine see'llisinne muccussookko; oo minim muccur ihookko.

⁵⁴«Kuk keen annanni annanni shishiriinsi, boronshiinsi,

⁵⁵eddechchannee minennee moo'amoo jabbiinsi,

⁵⁶dashshiinsi, jenje'nniinsii bacaro'iinsii

⁵⁷muccurda'e haashaaramda'e la'isimmina awwaadoo seera» yukko.