Read Hadiyya Qeessuwwi Kitaaba 15 Bible Online

Qeessuwwi Kitaaba 15 - Hadiyya bible

Qeessuwwi Kitaaba 15

¹Waa'i Muse'enaa Aarooninaa

²«Isra'ee'l oosina ‹Ayyi manchi sha'ixxi orachchiinsim jabbi mashka'inne daadoo luwwi firulas oo manchi haashaaramma.

³Oohim oo daadoo luwwi firukkom firimma uullisukkome oo manchi haashaaramma.

⁴Oo manchi iinse'oo luwwam ihukko afuuroo luwwi hundim haashaaramma.

⁵Ixxeka iinsi beyyo nakku manchi

⁶te'im oo manchi afuuru ayyi luwwannem afuuru manchi ixxeka eddechchaa orachchoo aanshaqqona; uulli hiimeebe'em haashaarammi ihookko.

⁷Ee'isam daadoo luwwi firoo mancho nakkookkok ixxeka eddechchaa orachchoo aanshaqqona; uulli hiimeebe'em haashaarammi ihookko.

⁸Oo daadoo luwwi firoo manchi muccur manchonne anja tuhulas oo manchi ixxi eddechchaa orachchoo aanshaqqona; uulli hiimeebe'em haashaarammi ihookko.

⁹Orachchiinsi daadoo luwwi firoo manchi afuuroo kooram ihukkaare haashaaramma.

¹⁰Oo daadoo luwwi firoo manchi afuuru mu'uta hinkam nakku manhchi uulli hiimeebe'e haashaarammi ihookko; oo manchi afuuru mu'uta hinkam ki'isu manchim ixxi eddechchaa orachchoo aanshaqqona; uulli hiimeebe'em haashaarammi ihookko.

¹¹Orachchiinsi daadoo luwwi firoo manchi anga aanshaqqoo'n mat mancho nakkulas oo manchi ixxi eddechchaa orachchoo aanshaqqona; uulli hiimeebe'em haashaarammi ihookko.

¹²Orachchiinsi daadoo luwwi firoo manchi nakku buchchi mu'ut hinkim iiqamona; haqqi mu'utam ihukkaare wo'inne aanshamona.

¹³« ‹Sha'ixxi orachchiinsi daadoo luwwi firoo manchi ee jabbiinsi fayye'aa lasage muccur iheena lamar balli afeebe'e egerona; ee lasage ixxi eddechchaa orachchoo muccur bu'i wo'inne aanshaqqona; muccuram ihookko.

¹⁴Sadeenti ballina lam handare'e te'im handare'i wotalla eebaa Keesammi Dukkaa'n goocanne i illagennee qeessichchina uwwona.

¹⁵Qeessichchim ee keeniinsi mato baaxii'l haafixxi kitim la'mmekam shokkiisakka'a hincaa'akkam kitim issaa hincaa'ookko; i illagennem ee daadoo luwwi bikkina haafissiisookko.

¹⁶« ‹Ayyi manchikim qansi firaa daadoo ammane ixxi orachcho hundam aanshaqqona; uulli hiimeebe'em haashaarammi ihookko.

¹⁷Qansi daadaa afu ayyi eddechcham ihukko omachcho wo'inne aanshamona; oohim uulli hiimeebe'e haashaarammi ihookko.

¹⁸Mat meentichchoo goonchii sha'ixxi edancha edamamaa lasage ixxuwwi orachcho wo'inne aanshaqqamona; uulli hiimeebe'em haashaarammi ihamookko.

¹⁹« ‹Mat meentichchok aga'n xur waaroo ammane lamar balli afeebe'e haashaarammi ikkamo; ise nakkoo ayyim uulli hiimeebe'e haashaarammi ihookko.

²⁰Isek aga'n xur waaroo ammane ise afuuttam luwwam ihukko iinse'llam luwwi hundim haashaaramma.

²¹Iseka iinsi beyyo nakkoo ayyim ixxi eddechchaa orachchoo aanshaqqona; uulli hiimeebe'em haashaaramma.

²²Afuuttam luwwa nakkookkokim ixxi eddechchaa orachchoo aanshaqqona; uulli hiimeebe'em haashaaramma.

²³Ise iinse'llam beyyo te'im afuuttam luwwa nakkoo manchi uulli hiimeebe'e haashaarammi ihookko.

²⁴Ayyi manchim isenne sha'ixxi edancha edamaa iseka xura nakkulas lamar balli afeebe'e haashaarammi ihookko. Ixxi iinse'oo luwwi hundim haashaarammi ihookko.

²⁵« ‹Mat meentichchok aga'n xur uulloo ammaniinsi higaa lobakat ballina te'im uulloo'n lobakat xiig daadulas oo xiig uulleebe'e aga'n xu'l amma'nnisam haashaarammi ikkamo.

²⁶Ee amman hundam ise iinse'llamokii afuuttam luwwii hundim haashaarammi ihookko.

²⁷Ee keeno nakkoo ayyim haashaarammi ihookko; ixxi eddechchaa orachchoo aanshaqqona; uulli hiimeebe'em haashaarammi ihookko.

²⁸Isek xiig firimma uullulas lamar balli afeebe'e egettona; ee lasage muccuratte ikkamo.

²⁹Sadeenti ballina lam handare'e te'im handare'i wotalla eebba'a Keesammi Dukkaa'n goocanne qeessichchina uwwitona.

³⁰Qeessichchim ee keeniinsi mato baaxii'l haafixxi kitim la'mmekam shokkiisakka'a hincaa'akkam kitim issaa hincaa'ookko; ee'isinne i illagenne qeessichchi iseensi daadaa haashaassoo luwwiinsi haafissiisookko› yitakka'a kullehe.

³¹«Ixxuwwi lambe'enne yoo iikka Keesammi Dukkaana haashaassita'a eehanninne letambee'isa Isra'ee'l ooso haashaassoo luwwiinsi annanni issehe» yukko.

³²Haashaassoo daadoo luwwi te'im qansi daadaa haashaaramu ayyi manchinam,

³³aga'n xur waaru meentichchona, orachchiinsi daadoo luwwi firoo goonchina te'im meentichchonaa haashaaranto'oo meentichchonne sha'ixxi edancha edamoo goonchinaa uwwamu seer kane.