Read Hadiyya Qeessuwwi Kitaaba 17 Bible Online

Qeessuwwi Kitaaba 17 - Hadiyya bible

Qeessuwwi Kitaaba 17

¹Waa'i Muse'ena

²«Aarooninaa ixxi oosinaa ee'isam Isra'ee'l minaadab hundinamii

³‹Isra'ee'l minaadabiinsi ayyim mirgo'o te'im gereechcho te'im fellakkichcho iina kitim issaa wiidda'n beyyonne te'im wiidda'n beyyiinsi tochchonne durulas

⁴keesammi beyyonne iina kitim issaa hincaa'eena Keesammi Dukkaa'n gooc illagenne eebubeelas xiig kora'am dunamukkaannisa xigamaa ixxonne oogatamookko; minaadabiinsim annanni ihaa bi'ona.

⁵Ee bikkina Isra'ee'l oos biir beyyonne kitimina duttamoka i beyyo Keesammi Dukkaa'n gooc illagenne hincaa'llona; qeessichchim mateeyyoo'm kitim issaa iina hincaa'ookko.

⁶Xiigam Dukkaa'n goocanne yoo kiti'm beyyonne wixookko; di'iram eese liiransoo enji ihona shokkiisookko.

⁷Isra'ee'l minaadab amma'nnatiinsi ixxuwwa qeessoo habusina ixxuwwika fooraam diinate beyyi hundannem kitim issita'a durimminne iina boqqimmi hasisooyyo; Isra'ee'l minaadab ka seera waaroo doollenne hundannem egettona› yihe yaa ijaajaakko.

⁸«Ixxuwwina odim ‹Isra'ee'l oosiinsi te'im ixxuwwi lambe'enne hee'oo waaraaniinsi ayyim shokkiisakka'a hincaa'akkamoka te'im mulli kitima

⁹iina hincaa'eena Keesammi Dukkaa'n gooca eebubeelas oo manchi i minaadabiinsi annanni ihaa bi'ona.

¹⁰« ‹Isra'eeliinsi te'im ixxuwwinne hee'oo waaraaniinsi ayyim xiiga itulas oo manchi i illagenne sabamaakkoohene; ixxi minaadabiinsim annanni ihaa bi'ona.

¹¹Fooraam luwwi hundikim foor hee'ookkok xiigannette; xiig kiti'm beyyonne dunamaa ki'nnuwwika baaxiilo haafissiisoo'isa issaammo. Mannina haafite siidisiisookkok xiiga.

¹²Ee bikkina Isra'eelina «Ki'nnuwwiinsi te'im ki'nnuwwi lambe'enne hee'oo waaraaniinsi ayyim xiiga itoone» yaammo.

¹³« ‹Isra'ee'l oosiinsi te'im ixxuwwi lambe'enne hee'oo waaraaniinsi ayyim itakkam bii'l moochchiinsi te'im cii'iinsi hochchaa amadulas xiiga uullanne dunaa buchcha ifiisona.

¹⁴Fooraam luwwi hundikim foor hee'ookkok xiigannette. Ee bikkina an Isra'eelina «Fooraam luwwi hundikim foor xiig ihu bikkina ayyi fooraam luwwi hundikam xiiga ittakkotte. Xiiga itoo ayyim ixxi minaadabiinsi annanni ihaa bi'ona» yaammo.

¹⁵« ‹Isra'eeliinsi te'im waaraaniinsi ayyim bayta te'im moochchi shu diinate itulas ixxi eddechchaa orachchoo aansha'ona; uulli hiimeebe'e haashaarammi ihookko; ee lasage muccurookko.

¹⁶Ihukkaarem orachchoo eddechchaa aansha'ubeelas ee baaxii'l mashka'inne guzumo'amookko› yihe» yukko.