Read Hadiyya Qeessuwwi Kitaaba 19 Bible Online

Qeessuwwi Kitaaba 19 - Hadiyya bible

Qeessuwwi Kitaaba 19

¹Waa'i Muse'ena

²«Isra'ee'l minaadabina ‹An ki'nnuwwi Moollanni Waa'i keesammi ihummi bikkina ki'nnuwwim keesammuwwi ikkehe.

³Ki'nnuwwiinsi annannichchim ixxi amaa annaa lonsona; i Usheexxaxxi ballam egellehe. An Waa'i ki'nnuwwina Moollanna.

⁴« ‹Qophpha'n waa'ina otossitakkotte; te'im xaara bukkitakka'a qophpha'n waa'i misila baxxakkotte. An Waa'i ki'nnuwwina Moollanna.

⁵« ‹Mateeyyoo'm kitima iina kitimtakkam ammane eese liiransoo'isinne hincaa'llehe.

⁶Ee kiti'm maara ee balla te'im ee la'm balli dara ittehe; ihukkaarem saxxi balla afu maara hundam shokkiissehe.

⁷Ki'nnuwwiinsi ayyim saxxi balla afu maariinsi itulas oo kitim haashaaramu bikkina an aa'oommoyyo.

⁸Eehanniinsi itoo ayyim iina keesamu luwwa awwaad bee'i luwwisa xigu bikkina ixxena baaxiil ihookko; ixxi minaadabiinsim annanni ihaa bi'ona.

⁹« ‹Ki'nnuwwi uulliinsi hurbaata muttakkam ammane gaba'lleka muttakkotte; muttakku'uuyyi gatu qiimam laso daba'llitakka'a feettakkotte.

¹⁰Woyi'n misha wixxaa'llakkam ammane guullitakka'a feettakkotte; uullanne ubukkokam ki'issakkotte. Eekka buxii waaraanii qiima fee'llitona. An Waa'i ki'nnuwwina Moollanna.

¹¹« ‹Game'llakkotte. Laggakkotte. Ki'nnuwwina'i ki'nnuwwim qophphano woccakkotte.

¹²I summinne qophphano hide'llakkotte. Iikka ki'nnuwwi Moollannika summa haashaassitakkotte. An Waa'a.

¹³« ‹Ki beshichchonne damigo baxxitte; ixxeka maham boggitte. Balli baxaa'nneka miqo'o gassititte.

¹⁴Duuda duumtitte; illi qooq qolamoo'isa issititte; eese ki Moollanna badde. An Waa'a.

¹⁵« ‹Oogato boqqissakkotte; buxichcho yitakka'a golo'llakkotte; goddaanchom amaxxi yoo bikkina badditakkotte. Ihukkaarem ki'nnuwwi beshichchina hanqa oogattehe.

¹⁶Ki minaadaphphi lambe'enne daba'llantittuuyyi summa bi'issitte; manna lehina afisoo ayyi luwwam issititte. An Waa'a.

¹⁷« ‹Kiina baaxiil ihoobee'isa ki beshichcho hanqinne axeere bagaan wodaninne sabbitte.

¹⁸Baado miqissitte te'im baado amadditte; ihukkaarem ki beshichcho ki gaqqisa iitte. An Waa'a.

¹⁹« ‹I ijaajo egellehe; annanni annanni diinatiinsi mulli shumo'i qaramoo'isa issititte; mat abuullanne lam sire'e wixxitte; lam luwwinne baxamaakkoo eddechcha edde'llitte.

²⁰« ‹Mat manchi ixxena awwaaddam landichcho mulli manchina ladiiseena iittamaa lasage oo iittamu manchi bito miqoo'nnim ladiisaanchi ee landichchonne sha'ixxi edancha edamulas lamim guzumo'antona. Ihukkaarem ise wolabbano siiddobee'i agishshotte ikko'i bikkina lamim lehinne guzumo'anchi hasisooyyo.

²¹Eehido'i baxo baxu manchi ixxi hawwojji haafixxi kitimina mat gereechchi ambula i beyyo eebaa Keesammi Dukkaa'n goocanne hincaa'ona.

²²Qeessichchim ee manchika baaxiilo hawwojji kiti'm gereechchinne haafissiisookko. Anim ixxi hawwojja haafoommo.

²³« ‹Kana'aana aaggakka'a misha mishoo haqqa kaassakkam ammane luxxi sasem hiinchonnem mishoo misha itimmi hasisooyyo. Ee sasem hiinchonnem mishoo misha ittakkotte.

²⁴Soo'l hiinchik odim iina Waa'ina keesamaakkoo galaxxi kitim ihona.

²⁵Ihukkaarem onti hiinchika ittehe; eekka issitakkolas ki'nnuwwi haqqi lobakat misha mishookko. An Waa'i ki'nnuwwina Moollanna.

²⁶« ‹Xiig yoo maara maham ittakkotte; kiittakkotte te'im gennitakkotte.

²⁷Horoore gannaale'e mussiissakkotte; haareeddam gundissakka'a muttakkotte.

²⁸Ki'nnuwwi orachchonne haxara issitakkotte; lehu mannina kichche'llakka'a orachcho muransitakkotte. An Waa'a.

²⁹« ‹Uulli saa'imminnee haashaaranchinnee wo'mmoobee'isa ki landichcho saa'aanchotte ikkona cawwititte.

³⁰I usheexxaxxi balluwwa egellehe; i Keesammi beyyo lonsehe. An Waa'a.

³¹« ‹Wiidda weeshsham keeno te'im kiiraano sogitano xa'mmitakkotte; eekka issitakkolas haashaarantakkamo. An Waa'i ki'nnuwwina Moollanna.

³²« ‹Umuranne shiqoohaannina ki'llaa beyyo uwwe; lommannam lonse; eese ki Moollanna badde. An Waa'a.

³³« ‹Ki'nnuwwi uullanne ki'nnuwwinne maqire waaraan hee'llolas ixxuwwa wor amaddakkotte.

³⁴Ki'nnuwwi moollina Isra'eelina issitakkamisam ixxuwwinam er luwwa issehe. Ki'nnuwwi gaqqisam iittehe; ki'nnuwwi illageen Gibxanne waaraan hee'llakko'isam sawwi'llehe. An Waa'i ki'nnuwwina Moollanna.

³⁵ «‹Ayyem usinne, kiilo'innee mulli keennaanchinnee hawwoddakkotte.

³⁶Qeeraa'llooma, kee'mmaalloomaa dunamoo luwwaa keenakkam hanqo'i keennaanchi ki'nnuwwina hee'ona. Gibxiinsi ki'nnuwwa fissummi Moollanni Waa'i anette.

³⁷An ki'nnuwwina uwwummi seerinaa gatti ogorina hundinamii amma'nnantakko'oo keen ikkehe› yitaa kure» yukko.