Read Hadiyya Qeessuwwi Kitaaba 2 Bible Online

Qeessuwwi Kitaaba 2 - Hadiyya bible

Qeessuwwi Kitaaba 2

¹« ‹Ayyi manchim iina hurbaatiinsi kitima uwwoo ammane doo'llamaakkoo qamiinsetti ihona; wee'l zaytam hanenne dunona; aduruusam edona.

²Eeham Aaroon shumo'i ikko'i qeessuwwi beyyo eebona; qeessichchim ee qamiinsii zaytiinsii mat fooccaa aduruusaa hundam massona. Giiranne shokkaa enji eese liiransoo kitim issaa tiissiishshan ihona kiti'm beyyonne shokkiisona.

³Eehanniinsi gatu qam qeessuwwina uwwamona; ookki iina giirinne hincu kitim ihu bikkina lobakata keesamaakkohane.

⁴« ‹Oo kitim giiranne saramaakkoohan ihulas ursho'i exxubee'an ihimmi hasisookko; oohim wee'l zaytinne cukkamaa er qaminne saramaakkoo daabbo'o te'im zaytinne cukkakko'oo qorosho'i ihimmi hasisookko.

⁵« ‹Oo kitim gala'anne saramaakkoohan ihulas ursho'i bee'an ihaa wee'l zayti exxaa er qamiinne gudaakkoohan ihona.

⁶Eeham iiqansitaa wee'l zayta dune; ookki hurbaaxxi kitima.

⁷Kitim qure'enne saramaakkoohan ihulas wee'l zaytinne cukkamaakkoo er qamiinsetti ihimmi hasisookko.

⁸Eeham iina hincoo kitim issitaa qeessichchina uwwe; qeessichchim kiti'm beyyonne hincaa'ookko.

⁹Qeessichchi ee kitimiinsi tiissishshina ihoo qaxa aa'aa giiranne shokkaa enjoom eese liiransoo kitim issaa kiti'm beyyonne shokkiisona.

¹⁰Gatuqax qeessuwwina uwwamona; ookki iina giirinne hincu kitimiinsetti ihu bikkina lobakata keesamaakkoohane.

¹¹« ‹Shokkiisakka'a hincaa'akkam kitim ihaa iina hincoo kitiminne ursho'i te'im marab exxaa hincoobee'i bikkina iina hincaa'llakkam hurbaaxxi kitimanne ursho'i exxoone.

¹²Hiinchonne hiinchonne hurbaaxxi atootiinsi ludo iina hincaa'llehe; ihukkaarem eenji eese liiransoo kiti'mmisa ihaa shokkimmi hasisooyyo.

¹³Iina hincaa'lloo hurbaaxxi kitim hundam sooqidinne xee'ise; iikka ki Moollannika hidi'l sooqido ee kitimiinsi gatissitte. Hincaa'lloo hurbaaxxi kitim hundannem sooqido ede.

¹⁴« ‹Ki wix hurbaatiinsi ludo iina hinca'lloo ammane goodakka'a cukkakko'oo hamaam ihona.

¹⁵Oohim hurbaaxxi kitim ihu bikkina wee'l zayta dune; aduruusam ede.

¹⁶Qeessichchi ee kitimiinsii zaytiinsii ihoo qaxaa aduruusaa hundam iina girinne hincoo tiissiishshi kitim issaa shokkiisona.