Read Hadiyya Qeessuwwi Kitaaba 20 Bible Online

Qeessuwwi Kitaaba 20 - Hadiyya bible

Qeessuwwi Kitaaba 20

¹Waa'i Muse'ena

²«Isra'ee'l minaadabina ‹Ki'nnuwwiinsi te'im ki'nnuwwinne hee'oo waaraaniinsi ayyim Mooleekina oosiinsi mato higisaa uwwulas hundem Isra'ee'l oosim kininne aphphissa'a shitona.

³Ayyim ixxi oosiinsi mato Mooleekina higisaa uwwimminne iikka Keesammi Dukkaanaa Keesammi Summaa haashaassulas oo manchi i illagenne sabamaakkoohane. Ixxi minaadabiinsim annanni issaa bi'isoommo.

⁴Ihukkaarem oo manchi issukkoka hundam minaadab moo'aa cawwulasii lehinne guzumo'ubeelasii

⁵ee manchonnee ixxi abaroosannee an quuqoommo; ee'isinne iina amma'nnancha hoogga'a Mooleekina otossimminne ixxenne maqirette ikkam keenoo ee manchoo ixxuwwi minaadaphphi lambe'iinsim annanni issaa bi'isoommo.

⁶« ‹Ayyi manchim sogitano xa'mmeena wiidda weeshsham kee'n beyyoo kiiraa'n beyyoo marulas ee manchonne i quunqa dilliisoommo. Ixxi minaadaphphi lambe'iinsim annanni issaa bi'isoommo.

⁷An ki'nnuwwina Moollanni Waa'i ihummi bikkina ki'nnuwwi mannoomato keessehe; keesammuwwam ikkehe.

⁸I seera egellehe; wonshehem. Ki'nnuwwa keesoommi Waa'i anette.

⁹« ‹Ayyi manchim ama te'im anna game'llaa sholliisulas lehona; leh ixxonne oogatamukkok amaa annaa duumimminne hawwodu bikkinatte.

¹⁰« ‹Mat manchi mulli manchi meentichchonne saa'ulas, saa'u ixxii saa'llo'i isee lamim letona.

¹¹Mat manchi ixxi anni arenne sha'ixxi edancha edamulas ixxi anna sholliisaakkoo bikkina ixxii oo meentichchoo lamim letona. Ixxuwwanne oogatamukkokim ixxuwwi hawwojji bikkinatte.

¹²Mat manchi ixxi beetaarenne saa'ulas lamim letona; ixxuwwina yoo qarooma saa'imminne haashaassamaakkoo bikkina ee xiigina ixxuwwi gagim xa'mmantamo.

¹³Mat goonchi meentinne edancha isso'isam mulli goonchinne edancha issulas haashaassoo baxo baxxo'i bikkina lamim letona; ee xiigina ixxuwwi gagim xa'mmantamo.

¹⁴Mat manchi amaa landichchoo eebulas ee issamu haashaassoo bax bikkina sasom giirinne shokkiisakka'a shakkona; eehido'i jor luwwi ki'nnuwwi lambe'enne ihimmi hasisooyyo.

¹⁵Mat manchi meentinne edamakkamaannisa fooraam diinatinne edamulas ixxii oo fooraam diinatii lamim letona.

¹⁶Mat meentichcho meentii goonii edamoohaannisa fooraam diinatinne edantolas isee oo fooraam diinatii lamim letona. Ee xiigina ixxuwwi gagim xa'mmantamo.

¹⁷« ‹Mat manchi ixxena anninne te'im amanne aayyatte ikko'ota eebaa isenne sha'ixxi edancha edamulas ookki tuulli ihu bikkina ixxuwwi minaadaphphi lambe'iinsi annanni ihamaa bi'amona. Ixxi aayyanne edamu bikkina hawwo aa'ookko.

¹⁸Mat manchi aga'n xur waaraakkoo meentichchonne sha'ixxi edancha edamulas muccuroo'm seera gindamu bikkina lamim ixxuwwi minaadaphphi lambe'iinsi annanni ikka'a bi'llona.

¹⁹« ‹Mat manchi ixxi adanne te'im ixxi amaayyanne sha'ixxi edancha issoone; eekka issimmi qarooma bi'isimmi ihu bikkina lamim hawwo aa'llamo.

²⁰Mat manchi ixxi annabbaayyaantenne iinse'aa sha'ixxi edancha edamulas ixxi annabbaayyo sholliisaakkoo bikkina ixxii oo meentichchoo lamim hawwo aa'llamo; ooso qaramoo'nnim lehamookko.

²¹Mat manchi ixxi abbaayyi meentichcho eebulas ookki haashaassoohane; ixxi abbaayyi lombam sholliisookko; ee mashka'inne lamim oos be'em gattamo.

²²« ‹Ki'nnuwwi aaggakkamisa issoommi Kana'aa'n uulli ki'nnuwwa saboobee'isa iikka seeraa gatti ogoraa hundam egellehe; wonshehem.

²³Ki'nnuwwi illagiinsi holloommi minaadaphphi losano awwontakkotte; ixxuwwi eehido'i jor baxo baxxo'i bikkina sabaammo.

²⁴Ihukkaarem ixxuwwika uulla lago aa'llakkamo; adii marabii daadoo uulla lago aa'llakkamisina ki'nnuwwina uwwoommo; mulli minaadabiinsi annanni ikkakkamisina issummi ki'nnuwwi Moollanni Waa'i anette.

²⁵Ee bikkina muccur ihu fooraam diinate muccur ihubee'i fooraam diinatiinsi, muccur ihu cii'am muccur ihubee'i cii'iinsi annanni issitakkamo; haashaaramma yaa la'isummi fooraam diinatinnee cii'innee ee'isam uullanne mikmikoo luwwi hundinnem ki'nnuwwi gaga haashaassitakkotte.

²⁶An Waa'i keesammi ihummi bikkinaa iihan ikkakkonam mulli minaadabiinsi annanni issummi bikkinaa iina keesantakko'oo keen ikkehe.

²⁷« ‹Wiidda weeshsham keen te'im kiiraan goonchom ihukko meentichcho letona; kininne aphphisakka'a shakkona; oo keen letamok ixxuwwi hawwojji bikkinatteme› yihe» yukko.